muslim.uz
Муфтий ҳазратларининг Қорақалпоғистон диёрига сафарлари бошланди
Бугун, 3 декабрь куни Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедовнинг Қорақалпоғистон Республикаси бўйлаб сафарлари бошланди.
Тараққиётимизнинг янги даврида бошқа минтақалар қатори Қорақалпоқ диёри ривожланишига ҳам улкан эътибор берилмоқда. Бугунги кунда Нукус шаҳридан бошлаб, туманлар марказлари, шаҳар ва қишлоқлар, ҳатто чекка овулларгача ҳар томонлама ўзгариб, ривожланиб бормоқда. Бунда, айниқса, давлатимиз Раҳбарининг бевосита ташаббуси билан изчил амалга оширилаётган ривожлантириш дастурлари муҳим аҳамият касб этмоқда.
Ўзгаришлар баробарида диний-маърифий соҳада амалга оширилаётган ислоҳотлар, масжид-мадрасаларни янада обод этилиши, мўмин-мусулмонларнинг диний эҳтиёжларини қондиришга қаратилган саъй-ҳаракатлар кўпчиликни мамнун этмоқда.
Ташрифдан кўзланган мақсад ҳам қорақалпоқ диёрида диний-маърифий соҳада олиб борилаётган ишлар билан яқиндан танишиш, имом-хатиблар билан учрашиб, уларни қийнаётган масалалар юзасидан фикр алмашиш, муаммо ва таклифларни тинглаш, ўз навбатида, амалга оширилган ишларни фуқаролар юз-кўзида кўришдан иборатдир.
Куннинг биринчи ярмида Нукус шаҳридаги “Имом Эшон Муҳаммад” жоме масжидида имом-хатиблар иштирокида йиғилиш бўлиб ўтди. Ушбу йиғилишда тизимда олиб борилаётган ишлар таҳлил қилиниб, мавжуд муаммолар тингланди, ечими бўйича аниқ таклифлар берилди.
Шунингдек, мамлакатимиз бўйлаб олиб борилаётган кенг кўламли ислоҳотларнинг мазмун-моҳияти, бугунги тинч ва осойишта кунларнинг қадрига етиш ва шукроналик ҳисси билан яшаш каби жиҳатларга алоҳида тўхталиб ўтилди.
Йиғилиш якунида "Вақф" хайрия жамғармаси томонидан имом-хатибларга Қуръони карим тарқатилди.
Қорақалпоғистон сафари давом этмоқда.
Ўзбекистон мусулмонлари идораси Матбуот хизмати
Нишонга урилган гаплар: “Асл эркаклик рукуъ ва саждаларни кўпайтиришдадир”
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Аллоҳ таолога дуо қилар экансан. Ҳеч қуруқ қолмайсан. Ё сўраганинг берилади. Ё сендан бир бало даф қилинади. Ёки охиратга захира ажр бўлади. Шу яхшироқ ва боқийроқдир.
“Ховатир роқия журнали”
*****
Улар чин эркаклик хотинни кўпайтиришда деб билишади ва шу ишлари билан мақтанишади. Лекин асл эркаклик рукуъ ва саждаларни кўпайтиришдадир.
“Ховатир роқия журнали”
*****
Атрофда бўлаётган ишлар сабабли сиқилиб, жинни бўлиб қолмаслик учун намозларингда, кунлик вазифаларингда, Робингга бўлган ишонч ва Унга қиладиган муножотларингда бардавом бўл!
“Ховатир роқия журнали”
*****
Роббимга сажда қилсаму, шу саждада бир муддат ўзимни унутсам. Кейин фаришталар менинг исмимни зикр қилиб, “Фалончининг ўғли фалончи сажда қилган ҳолида вафот этди” дейишса. Эй Роббим, хотимамизни гўзал қилгин!
“Ховатир роқия журнали”
*****
Фақат Аллоҳ таоло учун бошингни саждага қўйсанг, У Зот сенинг қадрингни кўтариб қўяди.
“Ховатир роқия журнали”
*****
Болажонлар – ёлғон гапирмайдилар, ғийбат қилмайдилар, мунофиқлик қилмайдилар, хиёнат қилмайдилар, хушомад қилмайдилар, макр қилмайдилар. Улар Аллоҳ таолонинг покиза бандаларидир.
“Ховатир роқия журнали”
Интернет материалларидан тўплаб,
таржима қилувчи Нозимжон Иминжонов
Динбузарлар даъвоси
Бугунги ҳаёт гўзал, тинч, осойишта. Лекин бу ёруғ оламни зулматга, одамлар ҳаётини ҳалокатга айлантирувчилар афсуски, қанча-қанча бегуноҳларни йўлдан адаштирмоқда, хонавайрон этмоқда, қонини тўкмоқда. Барча мутассиб оқимларнинг даъватларига яхшилаб назар ташланса, исломга ёт нарсалар экани маълум бўлади. Улар Қуръон, ҳадисдан «далил» келтирадилар, лекин фақат ўз фойдалари учун яъни, умуман Қуръон ҳадис далолат қилмайдиган маьноларда тушунтирмоқчи бўладилар», Турли хилдаги эътиқодларни ўзларининг ғаразли мақсадларига асос қилиб олган барча оқим ва тоифалар юртимизга ҳар турли йўллар билан суқилиб кириб, кишилар ва ёшларнинг онгини бузғунчи ақидасини синдиришга ҳаракат қилмоқдалар.
Бундай оқимларнинг барчаси ўз йўлларига юрмаганларни кофирга чиқариб ўлдиришга ҳукм қиладилар. Аслида Исломда ким «Лаа илааҳа иллаллоҳ, Муҳаммадур росулуллоҳ», деса, у мусулмондир. Ким Ислом арконларини бажарса, уни кофир деб аташ жоиз эмас. Аллоҳ таоло Тавба сурасида: «Агар тавба қилсалар, намозни тўкис адо этсалар ва закотни берсалар, йўлларини бўшатиб қўйинглар. Албатта, Аллоҳ ўта мағфиратлидир, ўта раҳмлидир», деб марҳамат қилган (5-оят). Уларнинг фаолияти оддий ҳалқнинг қийналиши, қони тўкилиши, муқаддас ислом динига доғ тушишидан бўлак нарсага олиб келмаган. Улар турлича бўлишидан қатъий назар, асл мақсади ҳокимият бойликка эришиш бўлиб, соф ислом таълимотидан йироқ, фақат исёнга ундовчи оқимлар бўлиб келган. Барча мутассиб ақидапараст оқимлар фожеаси шундаки, улар иймон, эътиқод билан маърифат, дин ва фалсафа ўртасидаги фарқ, уларнинг моҳиятини ўзларининг фикр доираларида талқин қиладилар.
Шунингдек, Расулуллоҳ соллаллоҳу алайҳи васаллам: «Сизларга вой бўлсин! Шўрингиз қурсин! Қаранглар, мендан кейин бир-бирининг бўйнига урадиган кофир бўлиб кетманглар», деганлар.
Бошқа бир ҳадисда: «Ким «Лаа илааҳа иллаллоҳ», деса, мендан жонини, молини сақлабди. Фақат ҳаққи билан бўлса, мустасно. Уларнинг ҳисоби Аллоҳнинг зиммасидадир», деганлар.
Шунингдек, Ибн Умар ва Оиша онамиз розияллоҳу анҳум: «Аҳли қиблани кофирга чиқариш йўқ», дейишган. Ушбу масала энг хатарли масалалардандир, чунки бу ерда мўмин-мусулмонларнинг қонини, жонини ҳалол санаш бор, уларнинг ҳурматини, мол-мулкини, ҳуқуқларини оёқости қилиш бор.
Аллоҳ таоло Нисо сурасида айтади: «Ким бир мўминни қасддан ўлдирса, жазоси жаҳаннамдир. Унда мангу қолувчидир. Аллоҳ унга ғазаб қиладир, уни лаънатлайдир ва унга улкан азобни тайёрлаб қўядир» (93-оят).
Набий соллаллоҳу алайҳи васаллам: «Ким ўз биродарига «Эй кофир!» деса, икковидан бири ўша бўлади», деганлар.
Аллоҳ таоло мусулмонлигини эътироф қилиб турган кишини ўлдиришдан ғоятда қаттиқ огоҳлантирган. Бу ҳақда Нисо сурасида: «Агар сиздан четлансалар ва сиз билан урушмасдан, тинчликни таклиф қилсалар, Аллоҳ сизларга уларнинг зиддига йўл бермас» дейилган (90-оят).
Набий соллаллоҳу алайҳи васаллам қўшнини ширкда айблашдан ва унга қарши қилич кўтаришдан қаттиқ огоҳлантирганлар. У зот: «Сизларга бўлишидан энг хавсираган нарсам, бир киши Қуръонни ўқиб.... сўнг ундан ажраб ва орқасига отиб юбориб, қўшнисига қилич кўтарган ва уни ширкда айблашидир", деганлар.
Нафақат қуролсиз ва уруш қилмаган мусулмонни, балки ҳар қандай инсонни ўлдириш мумкин эмас. Усома ибн Зайд розияллоҳу анҳунинг «Лаа илааҳа иллаллоҳ» деган бир одамни ўлдириб қўйгани ҳақидаги машҳур қиссада Расулуллоҳ соллаллоҳу алайҳи васаллам унга «Лаа илааҳа иллаллоҳ», деса ҳам ўлдирдингми?» деб қайта-қайта сўрайверганлар. Усома розияллоҳу анҳу: «Эй Аллоҳнинг Расули! У буни қуролдан қўрққанидан, хавфсираб айтди», деганида, у зот: «Сен унинг қалбини ёриб кўрдингми?» деганлар.
Инсонларга ўлим тилаш, улар жонига қасд қилишни Ислом дини қаттиқ қоралайди. Аллоҳ таоло Қуръони каримда: “Кимки бирон жонзот ўлдирмаган ва у ерда бузғунчилик қилиб юрмаган одамни ўлдирса демак, гуё барча одамларни, ўлдирибди, кимки унга ҳаёт ато этса (яъни ўлдиришдан бош тортса) демак, гуё барча одамларга ҳаёт берибди”, дейди (Моида сураси, 32-оят). Ушбу оят ва ҳадиси шарифдан кўриниб турибдики, ноҳақ одам ўлдирган инсоннинг жазоси жаҳаннам, Аллоҳнинг лаънати ва азобидир. “Ислом шиорилари”ни даъво қилаётган бузғунчиларнинг инсонлар ҳаётига бу қадар бепарво қараётгани, чумолига ачингандек ачинмаслиги ушбу ояти каримада хабар берилган ваъидларга айни муносибдир.
Динни ниқоб қилиб олган динбузарларнинг энг асосий даъволаридан бири давлат раҳбарига итоат этмай “халифалик” ўрнатишдир. Мусулмон киши Қуръони Карим Нисо сурасининг 59-ояти ҳукмига кўра ишбоши ва раҳбарларига бўйсуниши зарур. Аҳли сунна вал жамоа ақидасида бу аниқ белгилаб қўйилган.
Расулуллоҳ (соллаллоҳу алайҳи ва саллам) хабар бердилар: “Кимки ўз амиридан бирор нохушлик кўрса, бас, сабр қилсин! Чунки, кимки султон буйруғидан бир қарич ташқари чиқса, жоҳилият ўлимида вафот этибди” (Бухорий, 9/7053-7054, 7143; Муслим, 3/1849). Мазкур ҳадиси шарифда давлат раҳбарига итоат этиш шартлиги таъкидланган.
Видолашув ҳажида Расулуллоҳ (соллаллоҳу алайҳи ва саллам) бундай деганлар: “Раббингизга ибодат қилинглар, беш вақт намозингизни ўқинглар, рамазон ойи рўзасини тутинглар, молларингизнинг закотини адо қилинглар ва ишингиз эгаларига итоат этинглар, (шундай қилиб) Раббингизнинг жаннатига киринглар!” (Ҳоким, 1/19). Ушбу ҳадис Имом Муслим (раҳимаҳуллоҳ) шартига кўра саҳиҳдир.
Расулуллоҳ соллаллоҳу алайҳи ва саллам: “Кимки умматимга қарши чиқса-ю, уларнинг яхшисини ҳам, ёмонини ҳам уриб ўлдирса, уларнинг мўминлигидан парво қилмаса, (мусулмонлик ва тинчлик-омонлик) аҳдини қилган кимсанинг аҳдига вафо қилмаса, бас, у мендан эмас ва мен ҳам ундан эмасман!”.
Мустаҳкам эътиқод, соф ақида ҳар бир киши ҳаётининг асл моҳияти бўлиши лозим. Юрт тинчлиги, осойишталигига путур етказадиган, ватандошларимизни чалғитадиган ёт ғояларга қарши курашиш барчамизнинг бурчимиздир. Аллоҳ таоло бизга ато этган тинчлик, барқарорлик ва хотиржамлик каби улуғ неъматлар қадрига етишимиз, уларни ҳимоя қилишимиз зарур. Тинчлик осойишта юртда хотиржам яшаш эса катта бахтдир.
Ўктам Қурбаниязов, Амударё тумани «Нўғой эшон» жоме масжиди имом-хатиби.
Қорақалпоғистонлик умрачилар муборак заминга жўнаб кетди
Кеча Қорақалпоғистон Республикасидан 74 нафар фуқароларимиз Умра зиёратини адо этиш учун Нукус халқаро аэропортидан Саудия Арабистонига жўнаб кетди. Уларни кузатиш жараёнида Қорақалпоғистон Республикаси Вазирлар Кенгаши, Қорақалпоғистон мусулмонлари қозиёти, ал-Беруний номидаги ўрта махсус ислом билим юрти ва оммавий ахборот воситалари вакиллари иштирок этди. Зиёратчиларнинг ибодатларини Аллоҳ таоло Ўз даргоҳида қабул қилишини сўралди.
ЎМИ Матбуот хизмати
Уламолар бисотларидан
Имом Ибн Ражаб раҳимаҳуллоҳ шундай деганлар: “Баъзи тақводор зотлар кечаси бошларини эгиб, худди тиланчидек, қўлларини чўзиб, жим ўтиришар эди. Бу зорлик, мискинлик ва фақирликнинг энг етук кўринишидир. Бу кўриниш дуо пайтида қалбнинг Аллоҳ азза ва жаллага зорланиши, синиқлиги, муҳтожликни кучли ҳис қилиш ҳамда У Зотнинг ҳузурида ҳожати борлигининг белгисидир. Дуонинг ижобати (банданинг) берилиб, муҳтожлигини изҳор қилиб дуо қилиш миқдорига қараб бўлади. Имом Авзоий раҳимаҳуллоҳ “Уламолар “Дуонинг афзали Аллоҳга муҳтожлигини кўпроқ изҳор қилиб, Унга тазарруъ қилиб дуо қилишдир” дейишар эди” деганлар”.
“Намозда хушуъ қилиш”
*****
Ҳукамолардан баъзилари шундай дейишган: “Моли камайганига маҳзун бўлиб, умри тугаб бораётганига маҳзун бўлмаган кишидан ажабландим”.
Ибн Абу Дунё раҳимаҳуллоҳнинг “Заммуд дунё” асарларидан
*****
Ибн Қаййим раҳимаҳуллоҳ шундай деганлар:
“Аллоҳ таоло Ўзининг Китобида фақат икки нарсани шифо сўзи билан сифатлаган: Қуръонни ва асални. Буларнинг иккиси ҳам шифодир. Қуръон қалбларнинг шифоси бўлиб, қалб учун гина, адашиш, шубҳа ва шаҳватлардан шифодир. Асал эса танага шифо бўлиб, тана учун кўплаб касалликлардан, чиқиндилардан ва офатлардан шифодир”.
“Саодат ҳовлисининг калити”
*****
Аллоҳ таоло: “Уй”ни одамлар учун масаба... жойи қилганимизни эсланг” деб марҳамат қилган.
Ибн Қаййим раҳимаҳуллоҳ бу оят борасида шундай деганлар: “Аллоҳ субҳанаҳу ва таоло бу оятда Байтини одамлар учун масаба қилганининг хабарини бермоқда. Яъни одамлар дунёнинг турли бурчакларидан ҳар йили у ерга келадилар. Ҳеч қачон у ерга боришдан умидни узмайдилар. Киши Байтнинг зиёратига қанча кўп борган бўлса, шунча соғинчи ортаверади”.
“Зодул маъод”
*****
Фузайл ибн Иёз раҳимаҳуллоҳ ўғилларининг тарозу палласини кийими билан артаётганини кўрдилар ва ундан “Нега бундай қиляпсан?” деб сўрадилар. Шунда фарзандлари “Мусулмонларга йўлдан учиб тушган чангни тортиб бермаслик учун” деб жавоб берди. Бу жавобни эшитган Фузайл раҳимаҳуллоҳ йиғладилар ва “Албатта, сенинг бу ишинг, эй болажоним, менинг наздимда иккита (нафл) ҳаж ва йигирмата умрадан афзалдир” дедилар.
“Улуғлар уммати”
*****
Ибн Қаййим раҳимаҳуллоҳ шундай деганлар: “Оғриқ ва машаққатлар ё эҳсон ва раҳмат. Ё адл ва ҳикмат. Ё ислоҳ ва ундан кейин келадиган яхшиликка тайёрланиш. Ёки ундан-да қийинроқ оғриқни даф қилиш (га сабаб)дир”.
“Иллатлар шифоси”
*****
Саъийд Жарийрий раҳимаҳуллоҳ бундай деганлар: “(Салафи солиҳларимиз) кундузларининг аввалини ҳожатларини битириш, турмушларини ислоҳ қилиш билан, кундузларининг охирини эса Роббиларига ибодат қилиб, намоз ўқиш билан ўтказардилар”.
“Ҳилятул авлиё”
Интернет маълумотлари асосида Нозимжон Ҳошимжон тайёрлади
Мақолалар
