muslim.uz
Мамлакатимиздаги 2070 та жоме масжидда Рамазон ҳайит намози ўқилди
Бугун эрта тонгдан юртимиздаги барча жоме масжидлари юртдошларимиз билан гавжум бўлди. Мавжуд 2070 та жоме масжидида Рамазон ҳайити муносабати билан ҳайит намози ўқилди.
Мўмин-мусулмонлар ҳайит намозини эмин-эркин, кўтаринки руҳда адо этиши учун масжидларда қулай шароит яратилди. Масжидларга туташ кўчалар вақтинча ёпилиб, намозхонлар учун жойлар ажратилди. Ички ишлар, соғлиқни сақлаш ва бошқа мутасадди идоралар вакиллари навбатчилиги ташкил этилди.
Нуроний отахонлар ушбу қутлуғ кунда юртга тинчлик-фаровонлик, қут-барака сўраб дуолар қилди.
Юртимиздаги жоме масжидларида ўқилган ҳайит намозидан тайёрланган фоторепортажни эътиборингизга ҳавола этамиз:
- Тошкент шаҳри Чилонзор туманидаги “Ҳасанхон қори” жоме масжидида.
2. Қорақалпоғистон Республикасида Нукус шаҳридаги «Имом эшон Муҳаммад» жоме масжидида.
4. Бухоро шаҳридаги “Волидаи Абдулазизхон” жоме масжидида.
5. Жиззах вилояти Дўстлик туманидаги “Янги қишлоқ” ҳамда Зомин туманидаги “Маърифатли” жоме масжидларида.
6. Навоий шаҳридаги “Алишер Навоий” жоме масжидида.
7. Наманган вилояти Давлатобод туманидаги “Юсуфхон ўғли Қосимхон” жоме масжидида.
8. Самарқанд шаҳридаги “Намозгоҳ” жоме масжидида.
9. Сирдарё вилоятидаги “Гулистон” жоме масжидида.
10. Сурхондарё вилояти Термиз шаҳридаги “Султон Саодат” жоме масжидида.
11. Тошкент вилояти Тошкент туманидаги “Раҳим ота” жоме масжидида.
12. Қашқадарё вилояти Қарши шаҳридаги “Кўк гумбаз” ҳамда Ғузор туманидаги “Ҳазрати Мирижанда ота” жоме масжидларида.
13. Фарғона шаҳридаги “Тоиба” жоме масжидида.
14. Хоразм вилояти Урганч шаҳридаги “Охун бобо” жоме масжидида.
Камола ЮСУПОВА,
ЎзА суратлари
Muborak Ramazon hayiti yurtimizda keng nishonlanmoqda
#Axborot_24 |
#10apr #uzbekiston24
Iqror manzili: Sodiq Samarqandiy da’vatlari bu – katta fitna!
©️O‘zbekiston xalqaro islom akademiyasi
Рамазон — ниятлар мақсадларга муштарак айём
Асрлар давомида халқимиз учун маънавий поклик, меҳр-оқибат, хайру-саховат айёми сифатида қадрланиб келинган муборак Рамазон ойида қилинган ҳар бир эзгу амал яхшиликларни бошлаб келиши билан қадрли ой саналади.
Бугун, 10 апрель эрта тонгдан мамлакатимиздаги масжидларда ҳайит намозлари ўқилиб, қалбларимизга қувонч индирган шукуҳли кунлар, тинч ва осойишта кунлар қувончи янада зиёда бўлиши, халқимизнинг бахту саодати тўкис, хонадонларимиз файзу тароватга тўлиши учун дуолар қилинди.
Дарҳақиқат, Рамазон ойи инсонийлик, сабр-қаноат каби фазилатларни эъзозлаш, тинч ва фаровон ҳаётни қадрлаш, одамларни бир-бирига ҳамжиҳат бўлиб яшашга даъват этадиган дамлар эканлиги билан қадрлидир.
Мамлакатимизда амалга оширилаётган кенг кўламли ислоҳотларнинг бош мақсади ҳам инсонни улуғлаш, аҳолига зарур шарт-шароитларни яратиб бериш, эзгу ишларни зиёда қилиш асносида жамиятда соғлом турмуш тарзини рўёбга чиқаришга қаратилганлиги билан аҳамиятлидир.
Рамазон ойи халқимизнинг меҳр ва саховат, оқибат ва ҳиммат каби юксак фазилатларни ўзида мужассам этганлиги бажарилаётган эзгу амалларда ўз аксини топмоқда.
Ушбу байрам халқимизнинг миллий анъана ва урф-одатларига уйғун ҳолда ўтказилмоқдаки, бу ҳар бир ишда, хусусан, мамлакатимизда “Яшил макон” умуммиллий ҳаракатида, кам таъминланган оилалар ҳолидан хабардорликда, аҳоли даромадини ошириш, турмуш даражасини юксалтириш, кўча ва хиёбонлар, маҳалла ва гузарлар ободлигига эътибор, чет элларда умргузаронлик қилаётган ватандошларга кўрсатилаётган кўмак, шижоатли ёшларимизни баркамол инсонлар бўлиб камолга етиши йўлида амалга оширилаётган кенг миқёсли саъй-ҳаракатлар кейинги йилларда Янги Ўзбекистон тамойилига айландики, бу, Ватан тараққиётини янги босқичга олиб чиқишда зарур шарт-шароитларни яратмоқда. Ниятлар мақсадларга муштарак эканлигини кўрсатмоқда.
Инсон қадрини улуғлаш, унинг ҳақ-ҳуқуқларини таъминлаш ҳар недан-да улуғ неъмат саналади. Давлатимиз раҳбари муборак Рамазон ҳайитини нишонлаш арафасида халқимизга хос эзгулик, бағрикенглик, меҳр-оқибат ва кечиримли бўлиш каби олижаноб фазилатларнинг ёрқин ифодаси сифатида “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонни имзолаши ортидан Рамазон айёми кунларида юзлаб хонадонларга шукроналик, хурсандчилик олиб кирди.
Куни кеча Давлатимиз раҳбарининг халқимизга йўллаган Рамазон айёми табригида айтилганидек, сидқидилдан қилинган дуо ва ниятларимиз, эҳсон ва амалларимиз ҳозир дунёда юзага келган ғоят мураккаб ва таҳликали вазиятда диёримиздаги тинч ва осойишта ҳаётни кўз қорачиғидек асраб, янада ҳамжиҳат бўлиб, халқ манфаатини таъминлашга қаратилганлиги билан аҳамиятлидир. Қадриятларимизни асраш, улуғлаш билан бирга замонавий билим ва касб-ҳунарларни пухта эгаллаган ёш авлодни камолга етказиш, Ватан тупроғини кўзига тўтиё қилиб яшайдиган инсонлар этиб тарбиялаш халқимиз қалбидаги эзгу ниятки, бу, “Эзгулик – шиоримиз, маърифат – қуролимиз” эканлиги Рамазон айёмининг мазмун-моҳиятида ўз ифодасини топмоқда.
Тўлқин Рўзиев, ЎзА
Ислом тинчлик динидир
Юртимизда тинчлик, фаровонлик ва миллатлараро ўзаро тотувлик ҳукм сурмоқда. Бу бебаҳо неъматларнинг қадрига етиш барчамизнинг бурчимиздир. Бу тинчлик, тараққиёт ва фаровонлик ўз-ўзидан бўлаётгани йўқ, албатта. Бу, авваламбор, Аллоҳ таолонинг бизга раво кўрган чексиз инояти бўлса, иккинчидан, ҳукуматимиз томонидан виждон эркинлиги ва диний бағрикенгликни таъминлашда олиб борилаётган оқилона ислохатлар натижасидир.
Бугунги кунда ёш авлод онгида шукроналик хиссини кучайтириш, соф диний таълимотларни ёшларга етказиш, уларни халқпарварлик, ватанпарварлик, миллий ва диний қадриятларга садоқат руҳида тарбиялаш муҳим аҳамиятга эгадир.
Айни пайтда, айрим ёшларда дунёвий ва диний билимларнинг саёзлиги, уларда соф диний тушунчаларнинг асл мазмунини билмаслик ҳам диний экстремистик ғояларнинг тарқалишига сабаб бўлиши мумкин.
Улар ҳеч қандай асоссиз мусулмон диёрларни “куфр диёри” деб эълон қилиб, у ердагиларни “ҳижрат” қилишга ундаш орқали турли низо ва фитна ўчоқларига жалб қилиш, қўлга қурол олиб тинч аҳоли вакиллари ва бошқа дин вакилларини қириш орқали минтақада уруш оловини ёқиш, жиҳод тушунчасини нотўғри талқин қилиш орқали ёшларни қотилликлар қилишга чорлаш билан шуғулланадилар.
Муқаддас Ислом динини ниқоб қилиб олганлар экстремистик ва террористик ҳаракатлар қилаётганлар ҳеч қандай асоссиз мусулмон диёрларни “куфр диёри” деб эълон қилиб, у ердагиларни “ҳижрат” қилишга ундаш орқали турли низо ва фитна ўчоқларига жалб қилиш, қўлга қурол олиб тинч аҳоли вакиллари ва бошқа дин вакилларини қириш орқали минтақада уруш оловини ёқиш, жиҳод тушунчасини нотўғри талқин қилиш орқали ёшларни қотилликлар қилишга чорлаш билан шуғулланадилар.
Қуръони каримда бегуноҳ одамларнинг жонига қасд қилиш қораланади. Жумладан, “Нисо” сурасининг 93-оятида бундай марҳамат қилинади: “Кимда-ким қасддан бир мўминни ўлдирса, унинг жазоси жаҳаннамда абадий қолишдир. Яна унга Аллоҳ ғазаб қилгай, лаънатлагай ва унга улкан азобни тайёрлаб қўйгай”.
Ҳадисларда ҳам бу борада кўплаб хабарлар келган. Жумладан, Имом Термизий ривоят қилган ҳадисда бундай дейилади: “Расулуллоҳ соллаллоҳу алайҳи васаллам: “Аллоҳ таолонинг наздида бир мусулмон кишининг ноҳақ қатл этилишидан кўра, ёруғ дунёнинг барбод бўлиб кетиши енгилроқдир”, дедилар”.
Юқоридаги мулоҳаза ва далиллар, диний-экстремизм ва терроризмнинг нафақат умумэътироф этилган замонавий қонунлар, балки ислом дини асосларига ҳам зид эканини кўрсатади.
Шундай экан, диний-экстремизм ва терроризмга қарши курашда барчамиз ўз масъулиятимизни ҳис этишимиз, огоҳ бўлишимиз, ватанимизнинг келажаги учун жавобгар эканимизни унутмаслигимиз лозим.
Сайдуллоҳ Ғаниев,
Уйчи туман "Ислом Нури" жоме
масжид-имом хатиби
Мақолалар
