muslim.uz

Пятница, 07 Октябрь 2022 00:00

Таъсирли мавъизалар намозхонларга манзур бўлмоқда

Шу кунларда юртимизнинг ўнлаб таниқли уламо ва имом-хатиблари Тошкент вилоятининг бир қатор туманларидаги масжидларга ташриф буюриб, пешин ва хуфтон намозларидан сўнг жамоатга илмий мавъизалар қилиб бермоқда. Бундай манфаатли маърузалардан аҳоли ҳам мамнун.
6 октярбь куни ана шундай суҳбатлар Ўрта Чирчиқ тумани масжидларида ташкил этилди. Унда Ўзбекистон мусулмонлари идораси раиси, ўринбосари Иброҳимжон домла Иномов ҳамда Обиджон домла Мирҳамидовлар пешин ва хуфтон намозига “Фирдавс” жоме масжидига ташриф буюриб, намоздан сўнг жамоатга таъсирли мавъиза қилиб бердилар. Шу билан бирга суҳбат давомида йиғилганлар ўзларининг қизиқтирган саволларига уламоларимиздан жавоб олдилар.
Бундай илмий суҳбатлар “Бобохон Ота” масжидида Собиржон домла Рустамов ва Мусахон Бобоев, “Саид Муҳаммад Вали” жомесида Раббим домла Муҳаммадиев ва Абдулҳамид Маликов, “Усмон Ота” масжидида Мансур Даминов ва Мирвоҳид Миржалилов, “Бургалик” масжидида Дониёр Файзуллаев ва Зокир Зиятдинов, “Ҳазрати Назарали Бобо” жомесида Ибн Турсун Билолқори ҳамда Рашид Рустамов, “Ҳазрати Умар” масжидида Раҳимберди Раҳмонов ҳамда Суннатуллоҳ Эрназаров каби имом-хатибларимиз томонидан ташкил этилиб, жамоатга манфаатли мавъизалар қилинди.
Эътиборлиси, мазкур суҳбатларнинг тез-тез ташкил этилаётгани намозхонларнинг маърифий билими юксалишига хизмат қилмоқда. Буни уларнинг уламоларимизга бераётган саволларидан ҳам англаш мумкин.

Ўзбекистон мусулмонлари идораси матбуот хизмати

Бўлим Ўзбекистон янгиликлари

Пятница, 07 Октябрь 2022 00:00

Ҳазрати имом мажмуасига зиёрат

“Кўкалдош” ўрта махсус ислом таълим муассасаси 1-курс талабаларининг дарсдан сўнг бўш вақтларни мазмунли ўтказиш ҳамда аждодлар мероси билан яқиндан танишиш мақсадида гуруҳ раҳбарлари бошчилигида Ҳазрати имом мажмуасига зиёрат уюштирилди.

Мажмуадаги Қаффол аш-Шоший мақбараси зиёрат қилинди, Бароқхон мадрасасида фаолият юритиб келаётган ҳунармандлар фаолияти билан таништирилди. Шунингдек, Тошкент ислом институтига ташриф буюриб, институт фаолияти билан танишдилар. Мўйи Муборакда сақланаётган “Усмон Мусҳафи” номи билан машҳур қўлёзма билан танишишди. Талабалар тадбир доирасида тарихий ёдгорлик билан танишиш билан бирга унинг тарихий аҳамияти, жаҳон тарихида тутган ўрни ҳақида қизиқарли маълумотларга эга бўлдилар.

Ўзбекистон Мусулмонлари идораси етакчи мутахассиси Камолиддин Маҳкамов талабалар билан суҳбатлашиб “Усмон Мусҳафи” таърифи ҳақида қимматли маълумотларни баҳам кўрди. Таништирув жараёнида 2007 йил Тошкент шаҳрининг “Ислом маданияти пойтахти” деб эълон қилинишида юртимизда “Усмон Мусҳафи” нинг асрлар мобайнида сақланиб келаётганлиги ҳамда 1997 йил “Усмон Мусҳафи” ЮНЕСКО халқаро ташкилоти томонидан жаҳон дурдоналари рўйхатига киритилганлиги каби ҳозирги кунда талабалар учун муҳим ҳисобланган маълумотларни баён қилди.

«Кўкалдош» матбуот хизмати

Бўлим Ўзбекистон янгиликлари

Четверг, 06 Октябрь 2022 00:00

Муфтий ҳазрат: Устоз-муаллимларнинг мақоми жуда ҳам улуғ (видео)

Тошкент ш. "Абу Сахий" масжиди, 2022 йил 30 сентябрь

Ўзбекистон мусулмонлари идораси Матбуот хизмати

Бўлим МУФТИЙ МИНБАРИ

Четверг, 06 Октябрь 2022 00:00

Отинойиларга сертификат топширилди

Ўзбекистон халқаро ислом академиясида республикамиздаги 88 нафар отинойига Академия ҳузуридаги Малака ошириш марказида 36 соатлик малака ошириш ўқувларининг биринчи даврасини томомлагани тўғрисида сертификат тақдим этилди.

Шу муносабат билан ташкил этилган тадбирда Дин ишлари бўйича қўмита раиси ўринбосари Дилбар Ғуломова, Ўзбекистон мусулмонлари идораси раиси ўринбосари Иброҳимжон Иномов, Малака ошириш маркази директори Ҳусниддин Aҳмедов ва тингловчилар иштирок этди.

Маросим давомида Ўзбекистон мусулмонлари идораси томонида диний-маърифий соҳада узоқ йилдан буён самарали меҳнат қилиб келаётган отинойиларга ташаккурнома ва эсдалик совғалар ҳам топширилди.

Ўзбекистон мусулмонлари идораси Матбуот хизмати

Бўлим Ўзбекистон янгиликлари

Четверг, 06 Октябрь 2022 00:00

Жаҳолатга қарши маърифат билан кураш замон талаби

Жаҳолат бу жамиятдаги энг хунук ва ёмон ҳолат бўлиб, бу инсониятни тубанлик ботқоғига олиб борувчи ва инсонийликдан чиқарувчи йўлдир. Жаҳолат туфайли инсонлар ўзларини инсон эканлигини ва дунёга нима учун келганини билмайдиган ҳолатга келадилар. Бунинг оқибатида ҳалол, харом, эзгулик, ватанпарварлик, садоқат ва бошқа ҳислатларни билмай ҳаёт кечирадилар.

Жаҳолатнинг давоси албатта бу маърифатдир. Маърифат орқали инсон етук даражага етади ва инсонга лойиқ бўлган барча эзгу ҳислатларни ўзида мужассам этиб, ёмон ва чиркин одатлардан ўзини сақлаб юради.

Маърифатли инсон Аллоҳнинг олдида ҳам инсонлар наздида ҳам мартабаси баланд бўлади. Бу хусусида Аллоҳ таоло Қуръони каримнинг «Мужодала» сурасининг 11-оятида: «Аллоҳ сизлардан иймон келтирганларнинг ва илм берилганларнинг даражаларини кўтарадир».

Яна Аллоҳ таоло Қуръони каримда маърифатли инсон билан маърифатсиз инсон баробар бўлмаслигини «Зумар» сурасининг 9-оятида шундай баён қилади: «Биладиганлар билан билмайдиганлар тенг бўлармиди?!»

Маърифатли инсонни дунёда ҳам мақоми баланд бўлади. Инсонлар уни ҳурмат қилиб, маслаҳат сўраб билмаганини ўрганиб, фарзандларини шундай илмли бўлишини орзу қилиб ва мажлисларида жойнинг тўрига ўтқазиб ҳурматини жойига қўядилар. Бу маърифатли инсоннинг дунёдаги мақоми, охиратдаги мақомини тасаввур қилаверинг.

Дунёда содир бўлаётган қўпорувчиликлар, ёвузликлар, қотилликлар, хунрезликлар ва шунга ўхшаш барча ёмон иллатларнинг замирида илмсизлик ётади. Биз илм эгалари бундай тоифа инсонлар билан маърифат ила курашиб, уларнинг қилаётган амалларини жаҳолат ва разолатдан бошқа нарса эмас эканлигини исботлаб бера олсак жамиятга катта фойда келтирган бўламиз ва жамиятнинг фаровон ҳаётига ҳисса қўшган бўламиз. Охиратдаги эса Аллоҳ таолонинг ажр-у мукофотига сазовор бўламиз. Илм аҳли доим жаҳолатга қарши илм билан курашиб келмоғи лозим бўлади. Илм Аллоҳ таолодан берилган улуғ неъмат бўлиб, у хақда қиёматда сўралинади. Илмни Аллоҳ ҳамма инсонларга хам ато этавермайди. Бу хусусда Набий саллоллоҳу алайҳи васаллам ўз хадисларида шундай марҳамат қиладилар:

«Аллоҳ бандасига яхшиликни ихтиёр этса, уни ўзидан қўрқадиган олим қилади. Уни тўғри йўлга бошловчи ақл идрок беради». (Бухорий ва Муслим).

Шунинг учун биз илм аҳлларининг бўйнида улкан масъулият борлигини ҳис қилиб доим жаҳолатга маърифат билан курашиб яшамоғимиз лозим ва лобуддир. Аллоҳ таоло илм аҳлларига бу ишларида куч-қувват ато этсин!

Мўминжон УСМОНОВ
Гулистон шаҳар “Тавҳид” жоме масжиди имом-хатиби

Бўлим МАҚОЛА