Мамлакатимиз мустақиллигининг 29 йиллиги арафасида мамлакатларимиз миллий нашрлари “Янги Ўзбекистон” ва “Правда Востока” газеталарида чоп этилган Ўзбекистон ташқи ишлар вазири Абдулазиз Комилов билан интервью етакчи араб оммавий ахборот воситаларида катта қизиқиш уйғотди, деб хабар бермоқда “Дунё” АА мухбири.
Хусусан, Мисрнинг “Ал-Ҳасод ал-арабий” ва “Ал-Дипломаси” газеталари ўз саҳифаларида ташқи сиёсат идораси раҳбари интервьюсининг араб мамлакатлари билан Ўзбекистон ўртасидаги кўп қиррали ҳамкорликка бағишланган жиҳатларига алоҳида эътибор қаратди.
“Ал-Ҳасод ал-арабий” газетаси ўз мақоласида араб давлатлари билан Ўзбекистоннинг кўп қиррали ҳамкорлигига тўхталар экан, мамлакатларимизни ўзаро ишонч ва дўстликка асосланган тарихий ва маданий алоқалар боғлаб туришини қайд этди.
Ўзбекистон Президенти Шавкат Мирзиёевнинг 2017 йил май ойида Саудия Арабистонига, 2019 йил март ойида БААга ташрифларини, 2018 йил сентябрь ойида эса Миср Президенти Абдулфаттоҳ ас-Сисининг Ўзбекистонга ташрифи алоҳида таъкидланади.
Президент Абдулфаттоҳ ас-Сисининг мамлакатимизга ташрифи давомида ҳукуматларимиз ўртасида 4 та битим, вазирлик ва идоралар ўртасида ҳамкорлик бўйича қатор битим ва ўзаро англашув меморандумлари имзолангани юқори баҳоланган.
Мисрнинг “Ал-Дипломаси” газетаси 2017-2020 йилларда Ўзбекистон Ташқи ишлар вазирлиги билан Миср, Саудия Арабистони, Кувайт, БАА, Марокаш, Иордания каби араб давлатлари Ташқи ишлар вазирликлари ўртасида сиёсий маслаҳатлашувлар ўтказилганига эътибор қаратиб, ушбу тадбирлар мамлакатларимиз муносабатларини ривожлантириш ва турли соҳаларда ўзаро манфаатли ҳамкорликни кенгайтиришда қулай имконият яратганини қайд этади.
Мақолаларда таъкидланишича, бугунги кунда Ўзбекистон билан араб давлатлари ўртасидаги инвестиция соҳасидаги ҳамкорлик доирасида 1,6 миллиард доллар қийматдаги 60 дан зиёд лойиҳа амалга оширилаётгани янги марралар мавжудлигининг тасдиғидир.
Мисрлик нашрлар Ўзбекистон ташқи ишлар идораси раҳбарининг Миср Араб Республикаси билан икки томонлама ҳамкорликни янада ривожлантириш ҳақидаги фикрларини юқори баҳоламоқда.
Жумладан, «Ал-журнал ал-арабий» умумараб журналида эълон қилинган «Ўзбекистон ташқи ишлар вазири: Миср билан алоқалар турли соҳалардаги ўзаро манфаатли муносабатларга асосланган» сарлавҳали мақолада Миср билан Ўзбекистон ўртасидаги кўп қиррали ҳамкорлик истиқболларига катта эътибор қаратилди.
«Ал-ахбар ал-масаи» газетаси эса «Яшасин Ўзбекистон – Миср дўстлиги: Ўзбекистон ташқи ишлар вазири турли соҳалардаги ўзаро манфаатли муносабатларга асосланган Миср билан алоқаларни таъкидлади» сарлавҳали мақолани ўз ўқувчилари эътиборига ҳавола қилди.
Мазкур мақолада ҳам Ўзбекистоннинг Миср ва бошқа араб давлатлари билан ҳамкорликни ривожлантириш борасида олиб бораётган ташқи сиёсати масалалари қайд этилади. Хусусан, Миср Президенти Абдулфаттоҳ ас-Сисининг 2018 йил сентябрь ойида Ўзбекистонга ташрифи якунлари ва унда эришилган икки ва кўп томонлама ҳамкорлик бўйича келишувлар ижроси юзасидан сўз юритилади.
Шунингдек, 2019 йил Ўзбекистон ва Миср вазирликлари ва идоралари делегациялари томонидан амалга оширилган 40 дан зиёд ўзаро ташрифлар алоқалар мустаҳкамланаётганига яққол далил экани қайд этилган.
Ўзбекистон мусулмонлари идораси матбуот хизмати