Бугун, Туркиянинг Ўзбекистондаги элчиси Ахмед Башар Шен Диний идорага ташриф буюрди. Меҳмон муфтий Усмонхон Алимов ҳазратлари билан мулоқот ўтказди.

Муфтий ҳазратлари элчи жаноблари ва Туркия халқини муборак Рамазон ойи кириб келиши муносабати билан табриклаб жумладан шундай дедилар:

– Бу йилги Рамазони шариф ҳар қачонгидан ҳам сермазмун бўлади, иншоаллоҳ. Туркия Президенти Ражаб Тоййиб Эрдўғаннинг Ўзбекистонга ташрифи жуда ҳам самарали ўтди. Айниқса, Эрдўған жанобларининг Бухоро шаҳридаги Баҳоуддин Нақшбанд, Мир Араб мадрасасига ташрифлари ва ушбу мадрасага дафн этилган Амир Убайдуллохоннинг руҳига бағишлаб, Президент жаноблари томонларидан ўқилган Қуръони карим тиловати кўпчилигимизни таъсирлантирди, қироатлари тажвид қоидаларига тўла мос ва хушсавт экани барчамизни ҳайратлантирди.

Элчи жаноблари Рамазон ойи билан муфтий ҳазратлари ва бутун Ўзбекистон халқини табриклаб, Ислом оламига тинчлик-осойишталик ва нохуш ҳолатларнинг тезроқ барҳам топишини тилади. Ахмед Башар Туркия Президентининг Ўзбекистонга ташрифи бутун дунёда ижобий акс садо бергани, ҳақиқатан самарали бўлганини таъкидлади. Айниқса, Бухоро шаҳрига ташриф жуда ҳам кўтаринки руҳда ўтгани, у ердаги юқори савиядаги тайёргарлик ишлари учун миннатдорлик билдирди.

Ахмед Башар Туркия Диёнат ишлари бошқармаси раиси Али Эрбош жанобларининг салом ва Рамазон табрикларини етказиб, икки мамлакат мусулмонлари идоралари ҳамкорлигида Рамазон ойи давомида тадбирлар ўтказишдан бахтиёр эканини изҳор қилди. Муфтий ҳазратлари ҳам Туркия Диёнат ишлари бошқармаси билан ҳамкорлик қилиш жуда ҳам фойдали эканини билдириб, яхши натижалар беришини таъкидладилар. Ҳар икки томон ҳам ўзаро ҳамкорликни ривожлантиришга келишиб олишди.

Учрашув дўстона ва самимий руҳда ўтди.

Ўзбекистон мусулмонлари идораси

Матбуот хизмати