Tanlovga!

Qadr kechasining o‘ziga xos bir qancha fazilatlari mavjud bo‘lib ular Quq’oni karim oyatlari va hadisi shariflarda zikr qilingan. Quyida shu haqida so‘z yuritamiz.

• Qur’oni karim shu kechada nozil qilingan. Alloh taolo aytadi: «Albatta, Biz u (Qur’on)ni Laylatul Qadrda nozil qildik» (Qadr, 1).
• U ming oydan ko‘ra yaxshiroq kechadir. Alloh taolo shunday marhamat qiladi: «Laylatul Qadr ming oydan yaxshiroqdir» (Qadr, 3). Imom Tabariy ushbu oyat tafsiridagi eng to‘g‘ri gap Qadr kechasidagi amal ushbu kecha bo‘lmagan ming oyda qilingan amaldan yaxshiroq ekanini aytganlar.
• U muborak kechadir. Aloh taolo Duxon surasi 3-oyatida shunday marhamat qiladi: «Albatta, Biz u (Qur’on)ni muborak kechada nozil qildik». Demak, ushbu kecha kunlar orasidagi eng muborak kecha ekan.
• Ushbu kechada juda ko‘p farishtalar yerga tushadi. Alloh taolo bu haqida shunday marhamat qiladi: «Unda farishtalar va Ruh Robbilari izni bilan barcha ishlar uchun tushadi» (Qadr, 4). Mufassir ulamolarimiz oyati karimada zikr qilingan Ruh Jabroil alayhissalom ekanliklarini aytishgan. Abu Hurayra roziyallohu anhudan rivoyat qilingan hadisda shunday deyiladi: «Albatta, farishtalar o‘sha kechada yerda mayda toshlardan ham ko‘p bo‘ladi».
• Keyingi yilgacha bo‘ladigan ishlarning yozilishi. Alloh taolo shunday marhamat qiladi: «O‘sha (kecha)da har bir hikmatli ish ajratilib, hal qilinur». Ko‘plab mufassir ulamolar farishtalar Allohning amri bilan keyingi yilgacha bo‘ladigan barcha ishlarni yozib qo‘yishini aytishgan. Bu ma’noni Ibn Abbos roziyallohu anhu aytganliklari rivoyat qilinadi.
• Uni ibodat bilanbedor o‘tkazish o‘tgan gunohlar kechirilishiga sabab bo‘lishi. Imom Buxoriy Abu Hurayra roziyallohu anhudan rivoyat qilgan hadisda Rasululloh sollallohu alayhi vasallam aytadilar: «Kim Qadr kechasida (chin) iymon va (riyo qilmasdan) savob umidida qoyim bo‘lsa uning o‘tgan gunohlari kechiriladi».
• Duolar ijobat bo‘lishi. Imom Termiziy Oisha roziyallohu anhudan rivoyat qilingan hadisda U zot Rasululloh sollallohu alayhi vasallamdan: «Yo Rasululloh, qaysi kecha laylatul qadr ekanini bilsam unda nima deyman?», deb so‘radilar. Rasululloh sollallohu alayhi vasallam shunday dedilar: «Allohumma innaka a’vuffun, tuhibbul a’fva fa’fu a’nniy» (Ma’nosi: Allohim, Cen marhamatli Zotsan, afv etishni suyasan, meni kechirgin!) degin», dedilar. Oisha onamiz Qadr kechasida duolar ijobat bo‘lishini bilganlari uchun ham ushbu kechada qanday duo qilishni Rasululloh sollallohu alayhi vasallamdan so‘rab o‘rganib olmoqdalar.
• Ushbu kecha ibodatidan mahrum bo‘lish katta judolik ekani. Ibn Moja Anas ibn Molik roziyallohu anhudan rivoyat qilgan hadisi sharifda Rasululloh sollallohu alayhi vasallam aytadilar: «Albatta, sizlarga ushbu (Ramazon) oy hozir bo‘ldi. Unda ming oydan yaxshiroq kecha bor. Kim undan (yaxshiligi va ibodat qilish) mahrum bo‘lsa barcha yaxshilikdan mahrum bo‘libdi. Uning yaxshiligidan faqat mahrum (baxtsiz, ibodat lazzatidan bebahra) insongina mahrum bo‘ladi». Shuning uchun ham Rasululloh sollallohu alayhi vasallam Qadr kechasini topishga targ‘ib qilar va o‘zlari ham oxirgi o‘n kunlikni ibodat bilan o‘tkazar edilar.

Demak, Qadr kechasi juda ko‘plab fazilatlarga ega va eng muborak kecha ekan. Shuning uchun ham bu kechani bedor o‘tkazishga, undagi fazilatlarga ega bo‘lib qolishga intilish lozim. Alloh taolo barchamizga ushbu kechaning fazilatiga erishishni nasib qilsin! 

Manbalar asosida

Iysoxon Yahyo tayyorladi