Ikki mingga yaqin o‘zbekistonliklar Makka va Madina shaharlarida bo‘lib turibdi
Bugungi kunda mamlakatimiz musulmonlariga Haj ziyoratini ado etish uchun bir qator qulayliklar yaratilmoqda. Ularni Saudiya Arabistoniga yetkazilishi, salomatliklarini doimiy nazorat qilish, issiq iqlim sharoitlaridan kelib chiqib taomlanishlari masalasida tayyorgarlik ishlari olib borilgan. Yetti ming nafardan ziyod o‘zbekistonliklar joriy yilda Haj ibodatini o‘taydilar. Ularning xavfsizligi, ibodatlarining to‘la-to‘kis bo‘lishida hukumatimiz tomonidan olib borilgan ishlar tahsinga sazovordir.
Ayni paytda mamlakatimiz ziyoratchilarining bir necha guruhi Saudiya Arabistonida bo‘lib turibdilar va ularning kayfiyatlari yuqori ekanini ko‘rish mumkin.
.jpg)
Kecha, 1 avgust kuni Namangan viloyati va Toshkent shahridan 468 nafar ziyoratchi Madina shahriga yetib borishgan bo‘lsa, ular Madina shahrida Masjidun Nabaviydan yuz metr uzoqlikdagi «Javharat al-Rashid» mehmonxonasiga joylashtirilgan.
Shu kunlarda ushbu muborak shaharda 934 nafar yurtdoshlarimiz o‘z ibodatlarini ado etmoqda.
Madina shahrida hojilarimiz muqaddas ziyoratgohlar: Masjidi Qubo, Masjidi qiblatayn va Uhud tog‘larini ziyorat qilgach, uch kechayu to‘rt kunduzdan keyin Makka shahriga yo‘l oladilar.
Bugun, 2 avgust kuni Toshkent shahri va Andijon viloyatidan 460 nafar ziyoratchilar Madina shahridan Makka shahriga jo‘nab ketdilar. Hozirda Makka shahrida 912 nafar ziyoratchi ibodatlarini ado etmoqdalar.
.jpg)
Hojilarimiz Makka shahrida Masjidul Haramdan 8000 metr uzoqlikda joylashgan to‘rt yulduzli “Abroj al-Hidoya” mehmonxonasiga joylashishdilar.
.jpg)
Madina va Makka shaharlarida mehmonxonalarda 24 soat davomida xizmat ko‘rsatish tashkil etilgan bo‘lib, ziyoratchilarimiz uchun barcha sharoitlar muhayyo qilingan.
O‘MI Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »