Perlis muftiysi bilan uchrashuv o‘tkazildi
Shu yil 5 oktyabr kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov Malayziyaning Perlis viloyati muftiysi Muhammad Asriy bin Zaynul Obidinni qabul qildi.
Uchrashuv avvalida Homidjon domla mehmonni tashrif bilan qutlab, yurtimizdagi diniy-ma’rifiy sohada bo‘layotgan yangilik va o‘zgarishlar xususida so‘z yuritib, O‘zbekiston musulmonlari idorasi faoliyati, xususan, Xalqaro aloqalar, Masjidlar bilan ishlash, Matbuot va axborot-tahlil, Xotin-qizlar masalalari bo‘yicha bo‘limlari va Fatvo markazi, “Shamsuddinxon Boboxonov” nashriyoti hamda idoraning hududiy bo‘limlari haqida ham atroflicha ma’lumot berdi.
Shuningdek, diyorimiz ulamolar zamini ekani, ularning nomidagi Imom Buxoriy, Imom Moturudiy, Imom Termiziy kabi ilmiy-tadqiqot markazlari ish olib borayotgani haqida so‘z yuritdi.
O‘z navbatida, Muhammad Asriy bin Zaynul Obidin ham samimiy qabul va ma’lumotlar uchun tashakkur bildirib, haqiqatan bu diyor Islom olamiga Imom Buxoriy, Imom Termiziy, Imom Moturudiy singari buyuk ulamolarni yetishtirib bergani, bu buyuk xizmatdan butun Islom olami minnatdor ekani, ajam diyoridan ana shunday olimlarning chiqishi Haq taoloning marhamati va ushbu diyor mo‘min-musulmonlarining mashaqqatli va xolis mehnati evaziga bo‘lganini ta’kidladi.
Shu bilan birga, bugungi kunda O‘zbekiston musulmonlari idorasining barcha bo‘limlari qatorida Fatvo markazi va Xotin-qizlar bo‘limi qizg‘in faoliyat yuritishi alohida ahamiyatga egaligini bildirdi.
Muloqot so‘ngida o‘zaro hamkorlikni yanada rivojlantirish bo‘yicha fikr-mulohazalar bildirilib, o‘zaro hadyalar ulashildi.
O‘zbekiston musulmonlari idorasi
Matbuot xizmati
Erhan Afyonju: O‘zbekiston – turkiy sivilizatsiyaning eng go‘zal shaharlari joylashgan zamin
Turkiyaning “CNN-Türk” telekanalida efirga uzatilgan “Tafakkur doirasi” dasturida so‘zga chiqqan taniqli olim, Milliy mudofaa universiteti rektori, professor Erhan Afyonju O‘zbekistonning boy tarixiy merosi va sayyohlik salohiyati haqida fikr yuritdi, deb xabar bermoqda “Dunyo” AA.
Ko‘rsatuvda qatnashgan turk tarixchisi Erhan Afyonju O‘zbekistonni turkiy sivilizatsiyaning eng go‘zal shaharlari joylashgan alohida geografik hudud sifatida ta’riflagan.
Olimning fikricha, juda ko‘pchilik sayyohlar O‘zbekistonni o‘z ko‘zi bilan ko‘rishni istaydi. Chunki dunyoga mashhur Samarqand, Buxoro, Xiva, Toshkent kabi shaharlar ana shu zaminda joylashgan.
Turk tarixchisi yoshlarga murojaat qilib, xorijga sayohat qilishni, avvalo, Turkiy dunyo mamlakatlarini kashf etish, ajdodlar yurti bilan yaqindan tanishishdan boshlash lozim ekanini ta’kidladi.
“Yoshlarga tavsiyam shuki, hozir xorijga sayohat qilmoqchi bo‘lsangiz, avvalo Turkiy zaminni aylaning. Masalan, O‘zbekistonga borib, tarixiy shaharlarni ko‘rib keling, ajdodlaringiz yurti bilan tanishing. So‘ng Saljuqiylar davlati barpo etilgan zaminlarni ko‘ring”, – dedi professor.
Erhan Afyonjuning ta’kidlashicha, bunday sayohatlar yoshlar uchun har tomonlama foydali va qiziqarli bo‘lib, ularning tarixiy xotirasi va dunyoqarashini boyitadi.
“Masalan, Samarqandning go‘zalligini dunyoning ko‘p joylarida topa olmaysiz. Ayniqsa, turk yoshlari o‘z ajdodlari yashagan zaminni borib ko‘rishlari lozim”, – dedi olim.
Professor O‘zbekistonni turkiy sivilizatsiyaning asosiy beshiklaridan biri, ilm-fan markazi sifatida ham alohida e’tirof etgan.
Shuningdek, turk tarixchisi O‘zbekistonning nafaqat tarixiy va madaniy, balki geografik jihatdan ham yashash uchun qulay hudud ekanini ta’kidlagan.
Dastur davomida professor bildirgan fikr-mulohazalar Turkiya jamoatchiligi orasida O‘zbekistonning tarixiy shaharlari, boy madaniy merosi va turizm salohiyatiga bo‘lgan qiziqishni yanada oshirishga xizmat qiladi.
O‘zbekiston musulmonlari idorasi Matbuot xizmati
- «
- »