Адлия вазирлиги ташаббуси билан Янги Ўзбекистонда илк бор "Нодавлат нотижорат ташкилотлари боғлари"ни яратишга старт берилди.
2025 йил "Атроф-муҳитни асраш ва "яшил" иқтисодиёт йили" давлат дастури ҳамда "Яшил макон" умуммиллий ҳаракати доирасида жорий йилнинг 15 март куни Адлия вазирлиги томонидан Ўрмон хўжалиги агентлиги ва нодавлат нотижорат ташкилотлари иштирокида ижтимоий шериклик асосида "Нодавлат нотижорат ташкилотлари боғи" ижтимоий лойиҳаси амалга оширилди.
Лойиҳанинг дастлабки босқичида 50 дан ортиқ нодавлат нотижорат ташкилотлари Тошкент вилояти Оҳангарон туманида "Нодавлат нотижорат ташкилотлари боғи"ни ташкил этишда фаол иштирок этишди. Мазкур боғ қарийиб 2 гектар майдонни ўз ичига олган бўлиб, ушбу боққа 2 мингдан ортиқ иқлимга мос манзарали ва мевали дарахт кўчатлари экиш ишлари амалга оширилди.
"Нодавлат нотижорат боғлари"да ҳар бир ташкилот учун алоҳида ҳудуд белгилаб берилади ва кўчатлар парвариши доимий назоратда олинди.
Мамлакатимизда яшил майдонларни кенгайтириш мақсадида бошланган мазкур эзгу лойиҳа доирасида республикамизнинг қолган барча ҳудудларида ҳам "ННТлар боғи"ни яратиш мақсад қилинган.
“Ал-Азҳар” шайхи доктор Аҳмад Тоййиб Бирлашган Миллатлар Ташкилоти Бош Ассамблеясининг Исломофобияга қарши курашиш халқаро куни муносабати билан ўтказилган йиғилишида жаҳон ҳамжамиятини исломофобияга қарши курашишга чақирди. У ушбу тадбирда сўзлаган нутқида шайх ат-Тоййиб исломофобияни ақлга зид ва мантиқсиз мафкура сифатида таърифлаб, уни жаҳон тинчлигига ҳақиқий таҳдид келтиради, дея баҳолади.
“Ал-Азҳар” шайхи доктор Аҳмад Тоййиб маърузаси давомида БМТ Бош котиби Антониа Гутерришнинг Ислом ҳақидаги холис ва жасоратли сўзларини юқори баҳолаб, бундай баёнотлар исломофобияга қарши курашда муҳим аҳамиятга эга эканини таъкидлади. У, шунингдек, айрим ўнг қанот экстремистик гуруҳларнинг Исломга нисбатан нотўғри тасаввурларни популистик мақсадларда суистеъмол қилишга уринишларини қоралади.
Шайх ат-Тоййибнинг ушбу чақириқлари исломофобияга қарши халқаро миқёсдаги саъй-ҳаракатларни кучайтириш ва динлараро ҳурмат ҳамда ҳамжиҳатликни мустаҳкамлашга қаратилган.
Ўз навбатида Миср муфтийси ва Жаҳон фатво муассасалари Бош котиби, доктор Назир Айёднинг таъкидлашича, исломофобияга қарши кураш жамият тинчлигини сақлаш ва халқлар ўртасида ҳамжиҳатлик ҳамда бағрикенглик қадриятларини мустаҳкамлаш учун долзарб масаладир. Мазкур оқимга қарши курашиш мусулмонлар зиддига нафрат қўзғатувчи ҳар қандай сўзлар ва фикрларга қарши халқаро ҳамкорликдаги саъй-ҳаракатлар олиб боришни талаб қилади.
Ҳар йили 15 март куни нишонланадиган “Исломофобияга қарши кураш халқаро куни” муносабати билан сўзлаган нутқида, доктор Назир Айёд исломдан қўрқиш ҳодисасининг тарқалиши ва мусулмонларга қарши бўлган ёлғон маълумотлар ҳамда нафрат қўзғатувчи кампанияларнинг кучайиши катта муаммо эканини таъкидлади. Бу эса нотўғри тушунчаларни тўғрилаш, динлар ва маданиятлар ўртасида мулоқотни кучайтириш, раҳм-шафқат, тинчлик ва осойишталикда яшашга чақирувчи исломий қадриятларни тарқатиш устида ишлашни талаб этади.
Доктор Назир Айёднинг таъкидлашича, Миср Фатво ҳайъати ва Жаҳон фатво муассасалари бош котибияти бу борада фаол иш олиб бормоқда. Улар ичида экстремизм ва исломофобияга қарши курашиш бўйича “Салам” тадқиқотлар маркази орқали махсус тадқиқотлар ва изланишлар олиб бориш, халқаро конференциялар ва семинарлар ўтказиш, халқлар ўртасида тушуниш ва ҳамкорлик кўприкларини қуришга қаратилган ташаббусларни амалга ошириш каби ишлар мавжуд.
Манбалар асосида
Илёсхон Аҳмедов тайёрлади.