Qori ustozlar ijoza oldi (fotolavha)
#Xushxabar #ijoza #qiroat
Toshkent islom instituti “Qur’on ilmlari” kafedrasining quyidagi ustozlari ijoza oldilar:
– Jahongir qori Ne’matov ؘ– Varshning Nofe’dan qilgan rivoyati;
– Ahmadxon qori Rashidov – Hafsning Osimdan qilgan rivoyati Toyyiba yo‘li orqali;
– Abdurahmon qori Mahkamov – Varshning Nofe’dan qilgan rivoyati;
– Habibulloh qori Olimjonov – Qolunning Nofe’dan qilgan rivoyati.
“Qur’on ilmlari” kafedrasi ustozi, 10 ta qiroat bo‘yicha ijoza sohibi, Al-Azhar shayxi Ibrohim Muhammad huzurida hatm qilgan qorilarga institut rektori Uyg‘un domla G‘afurov bilan ijoza shahodatnomalarini topshirdi.
Shu bilan birga Jahongir qori Ne’matov Ko‘kaldosh o‘rta maxsus ta’lim muassasasi o‘qituvchisi Abdulbosit qori Abdullayevga Hafsning Osimdan qilgan rivoyati Toyyiba yo‘li orqali Payg‘ambarimiz sollallohu alayhi vasallamga bog‘langan sanad bilan ijoza berdi.
Ijoza – Qur’oni karimni rivoyat qilish uchun ustoz tomonidan berilgan og‘zaki yoki yozma izn, ruxsatdir. Qorilarning nazdida ijoza deb ijoza beruvchi muqriydan ijoza oluvchi qoriga Qur’on o‘qish va o‘qitish uchun beriladigan shahodatnomaga aytiladi.
Alloh taolo ustozlarning bu muborak yo‘ldagi sa’y-harakatlarini qabul aylab, Qur’on xizmatida bardavom va muvaffaqiyatli bo‘lishini nasib etsin!
Oliymahad.uz
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »