#xabar #ramazon

Шу йил 17 февраль куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигида Рамазон ойини муносиб кутиб олиш ва юқори савияда ўтказиш масалаларига бағишланган йиғилиш бўлиб ўтди. Унда Диний идора раҳбарияти, Дин ишлари бўйича қўмита вакиллари, бош имом-хатиблар, масжидлар имом-хатиблари, отинойилар ҳамда таълим муассасалари педагоглари иштирок этди.

Йиғилишда Давлатимиз Раҳбарининг муборак ойни ўтказишга доир қарори ва ижтимоий ҳимояга муҳтож аҳолини қўллаб-қувватлаш бўйича белгиланган муҳим топшириқлар ижросига алоҳида тўхталиб ўтилди. 

Хусусан, мазкур ойни “Рамазон – меҳр-мурувват, аҳиллик ва шукроналик ойи” шиори остида эҳтиёжманд оилалар, ногиронлиги бўлган шахслар, ёлғиз кексалар ва боқувчисини йўқотган фуқароларга моддий ва маънавий кўмак бериш ҳамда беморларнинг жарроҳлик амалиётларига ёрдам бериш каби хайрли ишларни тизимли ташкил этиш вазифаси қўйилди.

Ўз навбатида, ифторлик маросимларида исрофгарчиликка йўл қўймасдан, хонадонларда яқинлар билан ихчам ва мазмунли ўтказишга эътибор бериш ҳамда кам таъминланган оилалар уйларида ифторликлар қилиб бериш орқали уларни кўнглини шод этишга алоҳида эътибор қаратилди. 

Улуғ ойда ибодатларни адо этиш учун мўмин-мусулмонларга муносиб шарт-шароитлар яратиш мақсадида масжидларда хатми Қуръон ва таровеҳ намозларини тартибли ўтказиш бўйича кўрсатмалар берилди. Шу билан бирга, масжид ва зиёратгоҳларни обод ҳолатда тутиш, ибодат вақтида хавфсизлик чораларини кўриш, жумладан, ёнғин, техника ва транспорт хавфсизлигини қатъий таъминлаш зарурлиги қайд этилди. 

Соҳа мутасаддиларига ОАВ орқали халқимиз орасида меҳр-оқибат, хайру саховат ва шукроналик туйғуларини кенг тарғиб қилиш, исрофгарчиликнинг салбий оқибатларини тушунтириш вазифаси юклатилди.

Ўзбекистон мусулмонлари идораси 
Матбуот хизмати