Меҳр-саховат тадбирлари изчил давом этмоқда
Хайрли ишлар Самарқанд вилоятида ҳам изчил давом эттирилмоқда. Айни мақсадни кўзлаган ҳолда, Самарқанд вилояти бош имом-хатиби ўринбосари Нурсултонхон домла Абдуманнонов Булунғур туманидаги “Оломон” жоме масжидида бўлиб, бу ерда ташкил этилган навбатдаги хайрия тадбирида иштирок этди.
Маърифий суҳбат ва эҳсон дастурхони шаклида ўтган ушбу маросимга 200 нафар нуроний отахон ва кўмакка муҳтож фуқаролар таклиф этилди.
Тадбир доирасида ижтимоий ҳимояга муҳтож 20 та оилага махсус ҳадя ва моддий ёрдамлар топширилиб, уларнинг кўнгли шод этилди.
Самимий руҳда кечган суҳбатлар давомида халқимизга хос меҳр-оқибат, саховат ва ўзаро кўмак каби юксак инсоний фазилатларнинг аҳамияти яна бир бор таъкидланиб, юрт тинчлиги ва эл фаровонлиги учун дуолар қилинди.
Sammuslim.uz
Мурувватли бўлиш — олий фазилат ва инсоний бурчдир
Бугун, 18 сентябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Қорақалпоғистон Республикасига хизмат сафари давомида Нукус шаҳридаги “Имом эшон Муҳаммад” жоме масжидида жума намозини адо этдилар.
Муфтий ҳазратлари намоздан олдин жамоатга “Мурувватли бўлиш — олий фазилат!” мавзусида манфаатли маъруза қилиб бердилар.
Маърузада таъкидланганидек, мурувват — меҳр-шафқат, саховат ва муҳтожларга ёрдам бериш каби энг гўзал инсоний фазилатлардан саналади. Ўзини саховатли деб билган инсон ўз манфаатини ўзгалардан устун қўймаслиги, кексалар ҳолидан хабар олиши, йиқилганни суяш орқали қалбан хотиржамлик топади.
Шунингдек, бугунги тезкор замонда бир-биримизга бағрикенг бўлиш жамиятда тинчлик, барака ҳамда ҳамжиҳатликни барқарор қилиши, ушбу олий фазилатни ўзимизда шакллантириб, фарзандларимизга мерос қолдириш ҳар биримизнинг бурчимиз эканлиги алоҳида уқтирилди.
Файзли суҳбат якунида юртимизга тинчлик-омонлик ва хонадонларимизга барака тилаб хайрли дуолар қилинди.
Ўзбекистон мусулмонлари идораси Матбуот хизмати
- «
- »