Фарғонада имом-хатиблар учун маҳорат дарслари ташкил этилди
Фарғона вилояти вакиллиги томонидан Фарғона ва Қувасой шаҳарларида фаолият юритаётган имом-хатиблар, имом-ноиблар ва мутаваллилар иштирокида маҳорат дарслари ташкил этилди.
Мазкур тадбир соҳа ходимларининг билим ва кўникмаларини ошириш, уларнинг фаолиятини замонавий талаблар асосида тизимлаштиришга қаратилгани билан аҳамиятли бўлди.
Тренинг давомида масжидларда иш юритиш жараёнини самарали ташкил этиш, хусусан, шаръий никоҳ ўқиш тартиби ва Ўзбекистон мусулмонлари идораси томонидан бериладиган никоҳномаларни намунавий асосда тўғри расмийлаштириш жараёнлари амалий тарзда кўрсатиб берилди.
Шунингдек, тадбирда соҳага рақамли технологияларни жорий этиш масалаларига ҳам алоҳида тўхталиб ўтилди.
Иштирокчиларга KPI платформасининг имкониятлари ва ундан фойдаланиш тартиби ҳақида батафсил маълумот берилиб, бу каби воситалар иш жараёнини соддалаштириш ва ҳисоботларни тизимлаштиришда муҳим экани қайд этилди.
Тадбир якунида вилоят бош имом-хатиби Убайдуллоҳ домла Абдуллаев сўзга чиқиб, ушбу тренинг барча ҳудудлар учун намуна бўлиши лозимлигини таъкидлади ва ходимларни янги билимларни амалиётда қўллашга, ўз фаолиятига масъулият билан ёндашишга чақирди.
Бинобарин, никоҳ маросимларини тартибли ташкил этиш ёшлар орасида оилавий масъулиятни оширишда муҳим ўрин тутиши алоҳида эътироф этилди.
Фарғона вилояти вакиллиги
Матбуот хизмати
Туркий давлатлар муфтийлари Боку шаҳрида жамланади
Жорий йилнинг 13–16 сентябрь кунлари Озарбойжон пойтахти Боку шаҳрида Туркий давлатлар муфтийлари кенгашининг навбатдаги VII йиғилиши ҳамда унинг доирасидаги бир қатор тадбирлар бўлиб ўтади.
Йиғинларда туркий дунёнинг етакчи дин пешволари – Ўзбекистон мусулмонлари идораси раиси, муфтий Шайх Нуриддин Холиқназар, Кавказ мусулмонлари идораси раиси, Шайхулислом Аллоҳшукур Пошшозода, Туркия Диёнат ишлари бошқармаси раиси Сафи Арпагуш, Қозоғистон мусулмонлари диний бошқармаси раиси, бош муфтий Наврўзбай ҳожи Тағанули, Қирғизистон мусулмонлари диний назорати раиси, муфтий Абдулазиз қори Закиров, Туркманистон муфтийcи Раҳмон Қурбонмуродов кабилар бошчилигидаги туркий давлатлар уламоларидан иборат делегациялар иштирок этади.
Мамлакатимиз делегацияси сафидан Ўзбекистон мусулмонлари идораси Уламолар Кенгаши, Фатво маркази, ҳудудий вакилликлар ҳамда олий диний таълим муассасаларидан вакиллар жой олган.
Тадбирлар доирасида уламолар мусулмон уммати учун муҳим бўлган шаръий масалалар, замонавий фатволар ва муштарак ташаббусларни муҳокама қилиб, якуний ҳужжатларни имзолайдилар. Шунингдек, илмий-амалий анжуман, икки томонлама музокаралар ҳамда табаррук қадамжолар зиёрати ҳам режалаштирилган.
Ўзбекистон мусулмонлари идораси Матбуот хизмати
- «
- »