Фарғона ҳожиларининг илк гуруҳи Ватанга қайтди
Муборак Ҳаж амалларини соғ-саломат адо этган фарғоналик зиёратчиларнинг дастлабки гуруҳи Ватанга қайтиб келди. Ҳожиларни Фарғона халқаро аэропортида вилоят мутасаддилари, диний соҳа вакиллари ҳамда зиёратчиларнинг яқинлари тантанали равишда кутиб олди.
Мазкур маросимда давлатимиз раҳбари томонидан юртдошларимизнинг муқаддас амалларни хотиржам ва муносиб адо этишлари учун яратилаётган юксак шарт-шароитлар алоҳида эътироф этилди.
Зиёратчилар Маккаи мукаррама ва Мадинаи мунаввара шаҳарларида бўлиб, Ҳаж ибодатларини тўлиқ адо этганликларини, муборак қадамжоларда туриб юртимиз тинчлиги, халқимиз фаровонлиги ҳамда эл-юрт равнақини сўраб хайрли дуолар қилганликларини мамнуният билан таъкидлади.
Маълумот ўрнида, Фарғона вилоятидан муқаддас сафарга йўл олган зиёратчиларнинг кейинги гуруҳларини кутиб олиш ишлари режа асосида жорий йилнинг 13 июнига қадар давом этади.
Ўзбекистон мусулмонлари идораси
Матбуот хизмати
Малайзия телеканалида Ўзбекистоннинг зиёрат туризми имкониятлари кенг ёритилди
Малайзиянинг “Berita RTM” телеканалида Ўзбекистонда зиёрат туризми соҳасида амалга оширилаётган ислоҳотларга бағишланган махсус дастур намойиш этилди, деб хабар бермоқда “Дунё” АА.
Мамлакатимиз мустақиллигининг 35 йиллиги арафасида эфирга узатилган ушбу кўрсатувда малайзиялик профессорлар – Бадрул Иса ва Норфадилаҳ Камаруддин томонидан ишлаб чиқилган “Ўзбекистон–Малайзия: креатив туризм” номли лойиҳа тақдим этилди.
Олимлар ташаббуси билан яратилган мазкур лойиҳа мамлакатимизнинг Малайзиядаги элчихонаси, Туризм қўмитаси ва Ислом цивилизацияси маркази ҳамкорлигида амалга оширилди.
Ташаббус Ўзбекистоннинг туризм имкониятлари ҳақида “Visual storytelling” форматида профессионал рақамли контент яратишни назарда тутади.
Лойиҳага кўра, 17–31 август кунлари Малайзия UiTM технология университетининг профессионал фотографлари ва дизайнерларидан иборат ижодий жамоа Тошкент, Самарқанд, Бухоро ва Хоразмда суратга олиш ишларини олиб боради.
Малайзиялик ижодкорлар юртимиз ҳақида тайёрлаган фото ва видеоматериаллар “Instagram”, “Facebook”, “TikTok”, “YouTube” каби интернет платформаларда жойлаштирилиши режалаштирилган. Лойиҳада юртимиз олий ўқув юртларининг дизайн, санъат, туризм ва меҳмонхона бизнеси йўналишидаги талабалари ҳам иштирок этади. Бу академик, туризм ва ижодий соҳаларда тажриба алмашишни ташкил этиш имконини беради.
Дастурда фикр билдирган Бадрул Иса лойиҳа АСЕАН мамлакатлари ва мусулмон оламида Ўзбекистонни янада кенгроқ танитишга хизмат қилишини таъкидлади. Унинг фикрича, рақамли платформалар орқали мамлакатимиз тарихий мероси, зиёрат туризми ва амалга оширилаётган сўнгги ўзгаришлари кенг ёритилади.
“Биз бой тарихий мерос, юксак маданият ва меҳмондўст халққа эга бўлган Ўзбекистонни АСЕАН минтақаси аҳолиси томонидан қайта кашф этилишини истаймиз”, – деди профессор.
Шунингдек, у Ўзбекистон халқини мустақилликнинг 35 йиллиги билан табриклаб, лойиҳа натижалари ушбу санага муносиб совға бўлишини қайд этди.
Ушбу ташаббус Ўзбекистоннинг зиёрат туризмини оммалаштириш ва АСЕАН мамлакатларидан кўпроқ сайёҳларни жалб қилишга хизмат қилиши кутилмоқда.
Ўзбекистон мусулмонлари идораси Матбуот хизмати
- «
- »