Bir daqiqa ichida «Subhonallohi valhamdu lillahi va la ilaha illallohu vallohu akbar» kalimasini 18 marta aytish mumkin. Abu Hurayra (roziyallohu  anhu)dan rivoyat qilinadi: «Rasululloh (sollallohu alayhi va sallam): “Subhonallohi valhamdu lillahi va la ilaha illallohu vallohu akbar”, deyishim men uchun quyosh chiqib, nur sochganidan yaxshiroqdir, dedilar» (Imom Muslim rivoyati). Bu oxiratda tarozini bosadigan Alloh suygan kalimalardandir.

Bir daqiqada «Subhonallohi va bihamdihi»ni 100 marta aytish mumkin.  Imom Buxoriy, Imom Muslim va Imom Termiziy rivoyat qilgan hadisi sharifda buni aytgan kishining gunohlari dengiz ko‘pigichalik bo‘lsa-da, kechirib yuborilishi aytiladi.

Bir daqiqada «La havla va la quvvata illa billah»ni 40 martadan ko‘proq aytish mumkin. Abu Muso Ash’ariy (roziyallohu anhu)dan rivoyat qilinadi: «Rasululloh  (sollallohu alayhi va sallam) menga:
Jannat xazinalaridan birini senga aytaymi? – dedilar. Men:
 Ha, ayting, Yo Rasululloh (sollallohu alayhi va sallam)! – dedim. Shunda u zot: (Sen) “La havla va la quvvata illa billah»ni ayt, u jannat xazinalaridandir, – dedilar (Imom Buxoriy va Imom Muslim rivoyatlari).

Jobir (roziyallohu anhu)dan rivoyat qilinadi: «Rasululloh  (sollallohu alayhi va sallam): “Zikrlarning afzali “La ilaha illalloh”dir, dedilar» (Imom Termiziy rivoyati). Bir daqiqada bu kalimani 50 martagacha aytish mumkin.

Bir daqiqada «Subhonallohi va bihamdihi ’adada xolqihi va rizo nafsihi va zinata arshihi va midada kalimatihi»ni 15 martadan ko‘proq aytish mumkin.

Juvayriya (roziyallohu anho)dan rivoyat qilinadi: «Rasululloh (sollallohu alayhi va sallam) ertalab subh namozi paytida uning huzuridan chiqib ketdilar. U namoz o‘qiydigan xonasida edi. So‘ngra zuho namozini o‘qib bo‘lib qaytib kelsalar, Juvayriya (roziyallohu anho) hali ham o‘tirgan edi. Shunda Rasululloh (sollallohu alayhi va sallam): “Chiqib ketganimdan beri shu holatda o‘tiribsanmi?” deb so‘radilar. Onamiz (roziyallohu anho): “Ha”, deya javob berdi. Rasululloh  (sollallohu alayhi va sallam): «Men sendan keyin to‘rtta kalimani uch martadan aytdim, agar ular tarozida o‘lchansa, sen bugun aytgan narsalardan og‘ir keladi. Ular: "Subhonallohi va bihamdihi ’adada xolqihi va rizo nafsihi va zinata ’arshihi va midada kalimatihi", dedilar» (Imom Muslim rivoyati).

Bir daqiqada 50 marotabaga yaqin salavot aytish mumkin. Har bir salavot keltirishda 500 savob mavjud. Ko‘p salavot aytish orqali Rasululloh (sollallohu alayhi va sallam)ning shafoatlariga noil bo‘lish mumkin. Imom Ahmad ibn Hanbal va Imom ibn Mojalar rivoyat qilgan hadisda Omir ibn Robi’aning otalari quyidagilarni aytadilar:

«Payg‘ambar (sollallohu alayhi va sallam)ning: Kim menga salavot aytsa, farishtalar unga ham menga ayt­gan salavotining barobarida salavot aytib turadilar. Banda salavotni xohlasa, oz ayt­sin, xohlasa ko‘p”, deganlarini eshitdim».

Boshqa bir hadisda Anas ibn Molik (roziyallohu anhu)dan rivoyat qilinadi: «Rasululloh (sollallohu alayhi va sallam): “Kim menga bir marta salavot aytsa, Alloh unga o‘n marta salavot aytadi va o‘nta xatosini o‘chiradi”, dedilar».

Bir daqiqa ichida «Astag‘firulloh»ni 100 martadan ortiq aytsa bo‘ladi.
Umrimizning har bir daqiqasi qadrli. Daqiqalarnigina emas, soniyalarni ham o‘z foydamizga hal etishning juda oson yo‘li chin ixlosdadir.  

Davron NURMUHAMMAD

tayyorladi