O‘zbekiston musulmonlari idorasi yurtimizning diniy, ijtimoiy-madaniy hayotida munosib o‘rin egallagan rasmiy diniy va mustaqil tashkilot sifatida ma’lum. Ushbu kitobda mazkur idora tashkil topganidan buyon o‘tgan 70 yildan ortiq vaqt mobaynida Vatan, din, xalq xizmatiga bel bog‘lagan, umrini islom ma’rifatini yoyish yo‘lida baxshida etgan din arboblari, mudarrislar, imom- xatiblar hayoti va faoliyati xaqidagi ma’lumotlar jamlangan.

Kitobga O‘zbekiston musulmonlari idorasi raisi muftiy Usmonxon Alimov hazratlari va Baxtiyor Bobojonov mas’ul muharrirlik qilgan.

Asar ikki qismdan tashkil topgan. Birinchi qismda: O‘rta Osiyo Rossiya imperiyasi mustamlakasi bo‘lgan davrda musulmon diniy tashkilotlari, Qatag‘on yillari: zulm va istibdod, Mustaqillik yillari: milliy va diniy qadriyatlarning tiklanishi kabi mavzularda ilmiy ma’lumotlar keltirilgan.

Ikkinchi qismda esa, vatan, din va xalq xizmatida faoliyat yuritgan diniy idora rahbarlari, muftiylar, ularning o‘rinbosarlari, diniy ta’lim muassasalari rahbarlari, Toshkent islom instituti rektorlari, Mir Arab madrasasi mudirlari hamda respublikamizning viloyat, shahar va tumanlarida mehnat qilgan imom-xatiblarning tarjimayi hollari, ilm yo‘lidagi ibratli namunalari bayon etilgan.

Asar so‘ngida O‘zbekiston musulmonlari idorasida ko‘p yil mehnat qilgan xodimlar va yurtimizda tahsil olgan xorijlik din arboblari haqida ham ma’lumotlar keltirilgan.

Kitob “Movarounnahr” nashriyotida chop etilgan.

Muallif: Haydarxon Yo‘ldoshxo‘jayev.

Nashriyotda sotiladigan narxi: 55000.