Канадалик мусулмон ёшларнинг бир гуруҳи одамларга ислом ҳақида ҳар қандай савол бериш имкониятини бериш учун мамлакат бўйлаб сафарни бошлади. Islam.ru хабарига кўра, "Ислом ҳаракатда, мен мусулмонман, мендан истаган нарсангизниа сўранглар" деган ном остидаги ташаббус канадаликлар орасида катта қизиқиш уйғотди.
Ташкилотчилар мамлакат бўйлаб мобиль кўргазма билан саёҳат қилиб, маҳаллий аҳолига ислом исломофобияга қарши кураш ҳақида сўзлаб беришмоқда. Ташкилотчилардан бири Шоҳруҳ Обиднинг айтишича,"кўплаб нотўғри тушунчалар аслида кичик бир гуруҳ одамларнинг исломга амал қилмасликлари, балки исломдан сиёсий восита сифатида фойдаланишларининг натижасидир.
"Ушбу трейлер бир қирғоқдан иккинчисига ўтади. Мамлакат бўйлаб ишбилармонлик туманлари ва шаҳар марказларига ташриф буюрган ҳолда 16 000 километрлик саёҳат қилдик", - дейди Обид.
"Биз учун бу шунчаки исломофобияга қарши курашишнинг бир усули ва одамлар биз хавфли эмаслигимизни билишсин. Биласизми, ислом бу тинчлик ва биз бу ерда канадаликлар сифатида, бу мамлакатнинг содиқ фуқаролари сифатида турибмиз", - қўшимча қилди у.
Ўзбекистон мусулмонлари идораси матбуот хизмати
Бир неча кундан буён Қўқон ва Марғилон шаҳарларида Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчиликларидаги бир гуруҳ уламолар томонидан кенг халқ оммаси билан учрашув, аҳоли вакиллари билан мулоқот, жоме масжидларда мавъизалар ва савол-жавоблар амалга оширилмоқда.
Суҳбатларда динимиз бир жамиятда яшаётган инсонларни ўзаро тинч-тотув, ҳамжиҳатликда яшашга буюриши, улар ўртасида меҳр-оқибат, бир-бирига нисбатан ҳурмат бўлишни талаб этиши, охирги вақтларда ана шу меҳр-оқибат ва ўзаро ҳурмат ришталарини пайдо қиладиган, уларни янада мустаҳкам бўлишига сабаб бўладиган фазилатларни кенг ёйиш жуда ҳам зарур бўлаётгани ҳаётий мисоллар асосида тушунтирилмоқда.
Муфтий ҳазратлари кишилар мусулмон уммати сифатларига муносиб бўлиши, ҳадиси шарифларда баён этилган комил мўмин фазилатлари билан зийнатланиши, ҳар ишда мўътадиллик, одамлар орасида саломни кенг ёйиш кабиларни сўзлаш баробарида буларнинг зидди бўлмиш риёкорлик, такаббурлик, кўр-кўрона тақлид, ғулуга кетиш, ота-онага оқ бўлиш, зулм ва зўравонлик каби гуноҳ ишлардан сақланишга чақирдилар.
Уламолар билан юзма-юз мулоқот ва тўғридан-тўғри савол-жавоблардан аҳоли ўз миннатдорликларини изҳор этмоқдалар.
Ўзбекистон мусулмонлари идораси Матбуот хизмати