Энг йирик ислом маркази
2025 йили Чеченистон пойтахти Грознийда Мусо пайғамбар номидаги илмий-маърифий ислом марказини очиш режалаштирилган. Бу ҳақда Чеченистон маданият вазири ўринбосари Мамед Мадаев “IslamNews”га маълум қилди.
“Грозний шаҳрида кўплаб исломий мажмуалар, масжидлар, ҳофизлик мактаблари қурилган ва ҳозирда ҳам қурилмоқда. 2025 йилда Россиядаги энг йирик илмий-маърифий ислом маркази очилади”, деди у Грознийнинг маданият пойтахти тақдимоти чоғида.
Мазкур ислом маркази ҳудудида Россиянинг энг йирик илмий-маърифий мажмуаси ва масжиди қурилади. Шунингдек, унинг таркибида кутубхона ва синфхоналар, қадимий қўлёзмаларини тиклаш учун тадқиқот бўлимлари ташкил этилади.
Ўзбекистон мусулмонлари идораси
Матбуот хизмати
“The Jordan Times”: Тошкентда ислом цивилизацияси ва янги кашфиётларга бағишланган халқаро медиа форуми ўтказилади
Иорданиянинг нуфузли “The Jordan Times” нашрида 24–29 август кунлари Тошкент шаҳрида бўлиб ўтадиган “Ислом цивилизацияси: янги нигоҳ, янги кашфиётлар” халқаро медиа форуми ҳақида мақола эълон қилинди, деб хабар бермоқда “Дунё” АА.
Мақолада ёзилишича, тадбирнинг асосий қисми Ўзбекистондаги Ислом цивилизацияси марказида бўлиб ўтади. Унда хорижий оммавий ахборот воситалари ходимлари, етакчи экспертлар ва медиа соҳаси мутахассислари иштирок этади.
Ўзбекистоннинг Иорданиядаги элчихонасининг маълум қилишича, ушбу форум дастуридан ялпи мажлислар, медиа кўргазмалар, матбуот брифинглари ва икки томонлама учрашувлар ўрин олган. Учрашувларда ҳужжатли кино ва тарихий хотира, нашриёт лойиҳалари ва замонавий технологиялар, халқаро медиа лойиҳаларни ривожлантириш масалалари кўриб чиқилади.
Бундан ташқари, ўзбекистонлик талабалар учун жаҳон медиа саноатининг етакчи вакиллари иштирокида маҳорат дарслари ташкил этилади. Иштирокчилар замонавий журналистика, медиа ишлаб чиқариш ва халқаро ахборот маконида самарали ҳамкорлик қилиш бўйича тажриба алмашади.
Нашрда қайд этилишича, форум иштирокчилари 27 август куни Самарқандга саёҳат қилишади. Сафар доирасида меҳмонлар Имом ал-Бухорий мажмуасига ташриф буюриб, шаҳарнинг бой тарихий-маданий мероси билан танишади. Шунингдек, Тошкентда халқаро оммавий ахборот воситалари вакиллари учун махсус медиатур ўтказилиши режалаштирилган.
Форум 28 август куни якуний ялпи мажлис ва расмий ёпилиш маросими билан якунланади. Меҳмонлар Ўзбекистон мустақиллигининг 35 йиллигига бағишланган тантанали тадбирларда ҳам иштирок этади.
Ўзбекистон мусулмонлари идораси Матбуот хизмати
