Ислом ҳамкорлик ташкилоти II ёшлар конгресини ўтказади
Шу йил 26-29 ноябрь кунлари Қозон шаҳрида Ислом ҳамкорлик ташкилоти (ИҲТ) давлатларининг II Ёшлар илмий конгресси бўлиб ўтади. Татаристон Республикаси Ёшлар масалалари вазири Ринат Содиқов, Ёшлар дипломатияси академияси раиси Дилбар Содиқова, Қозон федерал университети (КФУ) ташқи алоқалар бўйича проректори Тимирхон Aлишевлар матбуот анжуманида шу ҳақда сўз юритди. Бу ҳақда “Islam-today” сайти хабар берди.
ИҲТга аъзо 20 дан ортиқ давлатдан 100 нафар ёш олим ва тадқиқотчи ИҲТ давлатларининг II Ёшлар илмий конгрессида қатнашади.
Дилбар Содиқованинг сўзларига кўра, иштирокчиларнинг аксарияти учун бўлажак Конгресс илк бор хорижга саёҳат қилиш ва ўз илмий ишланмаларини жаҳон ҳамжамиятига тақдим этиш имкониятини беради.
Конгресс йўналишлари орасида биомедицина ва биотехнология, нефт, газ ва таълим технологиялари, халқаро муносабат ва ҳуқуқ, архитектура, дизайн ва санъат йўналишлари бор.
ИҲТ мамлакатлари II Ёшлар илмий конгреси якунида иштирокчиларнинг илмий ишлари тўплами нашр этилади.
Ўзбекистон мусулмонлари идораси
Матбуот хизмати
24–29 август кунлари Тошкентда “Ислом цивилизацияси: янги нигоҳ, янги кашфиётлар” мавзусида халқаро медиафорум бўлиб ўтади
24–29 август кунлари Ўзбекистон пойтахтида “Ислом цивилизацияси: янги нигоҳ, янги кашфиётлар” мавзусида халқаро медиафорум ўтказилади, деб хабар бермоқда “Дунё” АА.
Тадбирнинг асосий қисми Ўзбекистондаги Ислом цивилизацияси марказида ўтказилади. Унда хорижий оммавий ахборот воситалари вакиллари, халқаро экспертлар ва медиа соҳаси мутахассислари жам бўлади.
Форум дастуридан тантанали очилиш маросими, ялпи мажлислар, мавзуга оид медиа-кўргазмалар, матбуот анжуманлари ва икки томонлама учрашувлар ўрин олган. Шўба йиғилишлари доирасида ҳужжатли кино ва тарихий хотира, нашриёт лойиҳалари, замонавий технологиялар, шунингдек, медиа соҳасидаги халқаро лойиҳаларни ривожлантириш масалалари муҳокама қилинади.
Бундан ташқари, Ўзбекистон талабалари учун жаҳон медиа саноатининг етакчи мутахассислари иштирокида маҳорат дарслари ташкил этилади. Иштирокчилар замонавий журналистика, медиа маҳсулотлар яратиш ва халқаро ахборот маконида самарали фаолият юритиш борасида тажриба алмашади.
27 август куни форум қатнашчилари учун Самарқанд шаҳрига саёҳат уюштирилади. Дастур доирасида меҳмонлар Имом Бухорий мажмуасини зиёрат қилади ва шаҳарнинг тарихий-маданий мероси билан танишади. Шунингдек, Тошкент шаҳрида хорижий ОАВ вакиллари учун махсус медиа-тур ўтказилиши режалаштирилган.
Форум 28 август куни якуний ялпи мажлис ва тантанали ёпилиш маросими билан ўз ишини якунлайди. Хорижлик меҳмонлар, Ўзбекистон давлат мустақиллигининг 35 йиллигига бағишланган тадбирларда ҳам иштирок этади.
Ўзбекистон мусулмонлари идораси Матбуот хизмати
