Рамазон ва сахийлик
Инсон табиатан унутишга ва ғафлатда қолишга мойилдир. Дунё эса ёлғон ва бекорчи ҳис-туйғулардан иборат. Aгар инсонда ғафлат, унутиш ва дунё матоҳларига бўлган муҳаббат жамланса, ўша қалб қотиб боради, нафс эса осийлик қила бошлайди. Шу сабабдан Aллоҳ таолога бўлган иймони заифлашиб, охират диёрига бўлган рағбати камайиб боради. Бутун ўй-хаёли дунё бўлиб қолади. Дунё учун елиб югуради, унга эришиш учунгина яшай бошлайди.
Энди шу ҳолат бутун инсоният орасида тарқалсачи?! Унда, буюк бир офатга йўлиққан бўлади. Чунки улар бир-бирини ейдиган, заифларига раҳм-шафқат қилмайдиган, узоқ-яқинларининг ҳақларига риоя қилмайдиган ваҳший ҳайвонга айланиб бораётган бўлади.
Шу сабабли Aллоҳ таоло бандаларига пайғамбарлар юборади, уларга Ўзининг тавҳидини билдириш, тўғри йўлга йўллаш учун шариатлар жорий қилади. Aллоҳ таолонинг раҳмати сабабли инсонлар бир-бирларига меҳр кўрсатади, ўзаро силайи раҳм қиладилар. Кучлилари заифларига шафқатли бўлади. Катталари кичикларини иззат қилади. Мана шу гўзал сифатлар билан иймон ва ислом аҳллари зийнатланиб борадилар. Қачонки мана шу мақталган сифатлар мусулмон кишида йўқола бошласа, улар ўрнини дунё зийнатларига бўлган муҳаббат эгаллайди.
Ҳар йили рамазон ойи кириши билан мусулмонлар қалбида унга бўлган соғинч ва иштиёқ кучаяди. Дангасаликлар кетиб, ибодатга бўлган ҳарислик ортади. Қаерга қараманг мусулмонларни инфоқ-эҳсон қилаётган, ифторликлар улашаётган ҳолда топасиз. Рамазон ойида дунё ҳаваслари билан эмас, охират захираси ила яшай бошлайдилар. Зеро, Aллоҳ таоло рамазон ойининг рўзасини ҳам айнан шунинг учун фарз қилган.
Салафи солиҳларимиздан бирларидан сўрашди: "Рамазон рўзаси нима учун жорий қилинган?". У киши жавоб берди: "Тўқлар очлик таъмини тотиб кўриб, қорни оч кишиларни унутуб қўймасликлари учун".
Рўза саховатга ва эҳсонга элтувчи йўлдир. Aллоҳ таоло буюрганидек рўза тутган киши рамазон ойи давомида фаҳш сўзлар-у ишлардан узоқ бўлади. Ҳаромга боқмайди. Ён-атрофидагиларнинг ҳолидан хабар олади. Aмалларини бажаришда Росулуллоҳ соллаллоҳу алайҳи васалламдан ўрнак олади. У зот соллаллоҳу алайҳи васаллам доим гўзал намуна бўлганлар. Aллоҳ таоло буюрган амалларни ўзлари амалда кўрсатиб берганлар. Саҳобалар ва улардан кейин яшаб ўтган тобеинлар ана шу манҳаж асосида ҳаёт кечиришган.
Ибн Умар розияллоҳу анҳу дастурхонида мискин бўлмаса таомланмас эдилар. Aҳллари билан овқатланиб ўтирсалар, бирор мискин овқат сўраб келса, идишдаги бор таомни унга бериб юборар, оилалари эса идишда қолиб кетган таом қолдиқлари билан кифояланишар эди.
Имом Шофеий роҳимаҳуллоҳ айтардилар: "Рамазон ойида Росулуллоҳ соллаллоҳу алайҳи васалламга иқтидоан кўпроқ оч юрган кишини, фақат ўзини тутиб оладиган даражада таомга эҳтиёжи бўлишини, бу ойда кўпроқ рўза ва намозлар билан машғул бўлишини яхши кўраман".
Рамазонни саховат ойи дедик, чунки тўқ киши бу ойда рўза тутаркан, очликни ҳис қилади. Шу сабабли оч қолганларга таом улашади. Aгар рўза тутмаса, очларнинг аҳволини қаердан ҳам биларди?!
Бой одам ҳам шундай, у ҳам рўза тутаркан, фақирларнинг ҳолатларини кўз олдидан ўтказади ва молидан закот беради, сақада қилади.
Мўмин банда учун рамазон айни фурсатдир. Бундай кунларда ғофил қолган банда, рамазондан кейин хайр-баракага эриша олмайди.
Зеро, Муҳаммад соллаллоҳу алайҳи васаллам: "Ўзи тўқ бўлиб, қўшниси оч қолган ҳақиқий мўмин эмас", деб айтганлар.
“Ҳадис ва ислом тарихи фанлари” кафедраси мудири Ф.Хомидов
Масъулият ва натижадорлик — диний соҳада асосий мезон!
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Фарғона вилояти туман-шаҳар бош имом-хатиблари ва отинойилари иштирокида таҳлилий йиғилиш ўтказдилар.
Йиғилишда вилоят бош имом-хатиби Убайдуллоҳ домла Абдуллаев, вилоят ҳокими ўринбосари Бурҳонжон Қўлдошев, соҳа масъуллари ва бош имом-хатиблар иштирок этиб, ҳудудда амалга оширилган хайрли ишлар ва олдинда турган долзарб вазифаларни муҳокама қилдилар.
Мажлисда Муфтий ҳазратлари сўнгги йилларда Давлатимиз Раҳбари ташаббуси билан диний-маърифий ислоҳотлар амалга оширилаётгани, янги масжидлар, Қуръон курслари ва мажмуалар барпо этилаётгани, хусусан, жорий йилда Қўқон шаҳрида “Масжидул Латиф”, Қўштепа туманида “Умар ибн Хаттоб” ҳамда Ёзёвон туманида “Ал Фарғоний” жоме масжидлари фойдаланишга топширилгани, Қўқонда янги тажвид курси иш бошлаганини алоҳида эътироф этдилар.
Йиғилишда ўтган давр мобайнида имом-хатиблар ва отинойилар томонидан 42 мингта маърифий тадбир ўтказилгани, 6 500 нафар фуқаронинг мурожаати ижобий ҳал этилгани, 6 000 нафар мигрант оилалари ҳолидан хабар олингани ҳамда 400 та ажрим ёқасидаги оила яраштирилгани ижобий баҳоланди.
Шунингдек, ҳомийлар ва имомлар ташаббуси билан эҳтиёжмандларга 3 млрд сўмлик ва мадрасаларга 136 млн сўмлик хайрия ёрдамлари кўрсатилиб, 3 та оилага янги уй қуриб берилгани мамнуният билан қайд этилди.
Шу билан бирга, Шайх Нуриддин Холиқназар ҳазратлари томонидан келгусидаги устувор вазифалар белгилаб берилди. Имом-хатибларга аҳоли орасида тарғибот-ташвиқотни кучайтириш, Мустақиллигимизнинг 35 йиллиги ва «Маҳаллада ободлик ва меҳр-саховат ойлиги» доирасида масжидларни обод қилиш топширилди.
Оилавий ажримларнинг олдини олиш ва ижтимоий тармоқларда нотиқ имом-хатиблар томонидан тайёрланган видеомаърузаларни кенг тарқатиб, ахборот маконида соғлом эътиқод муҳитини мустаҳкамлаш зарурлиги таъкидланди.
Йиғилиш якунида Муфтий ҳазратлари ҳар бир ходим ўзини шариат ходими сифатида англаб, тақво, ҳалоллик ва юксак масъулият билан халқимизга хизмат қилиши лозимлигини уқтирдилар.
Фарғона вилояти вакиллиги мутахассислари учун яратилган шароитлар ҳам кўздан кечирилди
Ўзбекистон мусулмонлари идораси Матбуот хизмати
