Халқаро симпозиум ўтказилди
Ўзбекистон халқаро ислом академиясида “Миллат ривожида ислом цивилизациясидан олинадиган ҳикматлар” мавзусида халқаро симпозиум ўтказилди.
Мазкур анжуманда Ўзбекистон халқаро ислом академияси, Ўзбекистондаги Ислом цивилизацияси маркази ҳамда Малайзия исломни англаш институти ҳамкорлигида ташкил этилди. Бу ҳақда Академияси Матбуот хизмати хабар берди.
Симпозиумда Академия ректори Уйғун Ғафуров, Ўзбекистондаги Ислом цивилизацияси маркази директори Шоазим Миноваров, Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Малайзия исломни англаш институти раиси Муҳаммад Нур Манути, институт вакиллари, Ислом цивилизацияси маркази ходимлари, Академия профессор-ўқитувчилари ҳамда талаба-магистрлар иштирок этди.
Тадбирда “Ислом цивилизациясидан олинган ҳикмат сабоқлари кимга керак?”, “Малайсиа МАДАНИ” цивилизацион лойиҳа сифатида”, “Абу Ҳафс Насафийнинг ислом илмлари ривожидаги ўрни”, “Ислом ва фан тараққиёти: Малайзия тарихидан сабоқлар”, “Ибн Синонинг ахлоқ-одобга оид асарлари ва уларнинг хусусиятлари”, “Ислом цивилизациясининг давлатчилик ҳикмати” ҳамда “Ислом цивилизациясида аниқ фанлар ривожида Мусо ал-Хоразмийнинг ҳиссаси” каби мавзуларда маърузалар тингланди.
Қизғин мунозара, савол-жавоблар остида ўтган симпозиум йиғилганларда катта таассурот қолдирди. Ҳамкор ташкилотлар билан илмий-амалий алоқаларни янада давом эттириш борасида фикрлар алмашилди.
Ўзбекистон мусулмонлари идораси
Матбуот хизмати
Мадина шаҳри нима учун “Тоййиба” деб аталади?
Мадина шаҳри Ислом тарихида бир нечта номлар билан аталган. Улардан энг машҳурларидан бири “Тоййиба”дир.
Исломдан олдин шаҳар Ясриб деб аталган. Бу ном “айблаш” ва “ёмонлаш” каби маъноларни англатади.
Муҳаммад соллаллоҳу алайҳи васаллам шаҳарга ҳижрат қилганларида, унга янги ном бердилар. У зот алайҳиссалом шаҳарни “гўзал” ва “покланган” маъносини англатувчи “Тоййиба” деб атадилар.
Шунингдек, Тоййибага яқин бўлган ва ўхшаш маънони англатувчи “Тоба” номи ҳам ушбу шаҳар учун ишлатилган.
Мадинада топилган VIII асрга оид қоятош ёзувида шаҳар Тоййиба номи билан аталган. Бу эса ушбу ном Исломнинг илк асрлариданоқ қўлланиб келинганини кўрсатади.
Тоййиба билан бир қаторда, шаҳар муайян тарихий жиҳатларини акс эттирувчи яна бир неча номлар билан ҳам танилган:
| Номи | Маъноси |
| Мадина | Шаҳар |
| Мадинату Набий | Пайғамбар шаҳри |
| Мадинаи Мунаввара | Мунаввар шаҳар |
| Дорул Ҳижра | Ҳижрат диёри |
Пўлатхон Каттаев,
Тошкент ислом институти катта ўқитувчиси
