Туркиянинг етакчи оммавий ахборот воситалари вакиллари ва қатор таниқли инфлюенсерлари Ўзбекистон бўйлаб саёҳатга келишди. Меҳмонлар 5 кун давомида мамлакатимизнинг зиёрат туризми салоҳияти билан яқиндан танишади. Мазкур турдан Ўзбекистон имижини тарғиб қилиш ва зиёрат туризмини ривожлантириш кўзланган. Ушбу ташриф “Asialuxe Travel” миллий туроператори Туризмни ривожлантириш давлат қўмитаси ҳамкорлигида ташкил этилган.

Меҳмонлар орасида Йилмаз Али Абдусселам (7,21 миллион обуначи), Гўк Керем (528 минг обуначи), Бекар Ҳалил Иброҳим (88,1 минг обуначи), Катана Йилмаз Ҳусейн (297 минг обуначи) ва Генч Меҳмет (492 минг обуначи), Ёсир Йилмаз (853 минг обуначи) каби фаол You-Tube блогерлар бор.

Медиа-гуруҳ 12 февралдан 17 февралга қадар Ўзбекистонда бўлиб, Бухоро, Самарқанд ва Тошкент шаҳарлари бўйлаб саёҳат қилишни режалаштирилган. Саёҳат давомида инфлюенсерлар гуруҳи юртимизнинг муқаддас қадамжоларида зиёрат қилишади. Шунингдек, мамлакатимиз маданияти, қадриятлари ва туризм тармоқлари хусусиятлари билан яқиндан танишади. Ташриф доирасида Туризмни ривожлантириш давлат қўмитасида медиа-гуруҳ ва масъуллар иштирокида учрашув ўтказилади.

Маълумот ўрнида: «Asialuxe Travel» туроператори 2018 йилда ташкил этилган. Унда инновацион ёндашув, барча фойдаланиши учун максимал ва содда қулай шароитларни яратишни мақсад қилган. Компаниянинг Ўзбекистон ва Туркияда ваколатхонаси бор.

Ўзбекистон мусулмонлари идораси матбуот хизмати