Президент мактабига экскурсия уюштирилди
Жорий йил 2 феврал куни “Ҳидоя” ўрта махсус ислом билим юрти 2-курс, 42-гуруҳ талабалари гуруҳ раҳбари Абдуносир Бобамирзаев бошчилигида Наманган шаҳридаги Президент мактабига экскурсия уюштирилди.
Экскурсия давомида Президент мактаби директори Пирназаров Абдурасул ҳамда мактабнинг маънавий-маърифий ишлар бўйича директор ўринбосари Зокиров Ойбеклар мактабнинг ташкил этилиш тарихи, талабалар ҳаёти ҳамда ўқув жараёни ҳақида батафсил маълумотлар беришди. Талабалар матабнинг барча бинолари, ўқув хоналари, спорт зал, ўқувчиларга мўлжалланган сузиш ҳавзаси, ошхона, кутубхона ҳамда талабалар турар жойларида яратилган шароитларни кўздан кечиришди.
Танишиш жараёнида талабалар, Президент мактабига чет эл давлатларидан жалб этилган малакали ўқитувчилар билан инглиз тилида суҳбатлашиб, билим юртимиз ва унда яратилган шарт-шароитлар, ўқитиладиган фанлар ҳақида сўзлаб беришди.
Мактабнинг айрим ўқувчилари билан учрашиш чоғида билим юрти ўқиувчиси Абдулносир Бобамирзаев мактабда яратилган шароитлар шукрорнаси ўлароқ ўқувчилар билим олиш йўлида янада тиришқоқ бўлишлари, илм-фан ривожи ва халқимиз фаровонлиги учун хизмат қиладиган, юртимизни дунёга танитадиган юксак кадрлар бўлиб етишиб чиқишга ҳаракат қилишлари юзасидан кўрсатмалар бериб, ўқитилаётган фанларни янада яхшироқ ўрганиш, келажакда етук алломаларимиз каби олимлар бўлиб етишишга бор ғайратлари билан ҳаракат қилиш кераклиги ҳақида гапириб ўтди.
Экскурсия сўнгида ўқитувчи ва талабаларга яратиб берилган қулайликларни қадрига етиш, юртбошимиз бошчиликларида олиб борилаётган ислоҳотлардан тўғри, унумли фойдаланиб, яратилган шароитларнинг барчаси тинчлигимиз, мустақиллигимизнинг шарофатидан эканлигини таъкидлаб шукроналик руҳида яшашликка чақирдилар ва эсдалик учун суратга тушдилар.
Абдулносир БОБАМИРЗАЕВ,
“Ҳидоя” ўрта махсус ислом
билим юрти ўқитувчиси
Масъулият ва натижадорлик — диний соҳада асосий мезон!
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Фарғона вилояти туман-шаҳар бош имом-хатиблари ва отинойилари иштирокида таҳлилий йиғилиш ўтказдилар.
Йиғилишда вилоят бош имом-хатиби Убайдуллоҳ домла Абдуллаев, вилоят ҳокими ўринбосари Бурҳонжон Қўлдошев, соҳа масъуллари ва бош имом-хатиблар иштирок этиб, ҳудудда амалга оширилган хайрли ишлар ва олдинда турган долзарб вазифаларни муҳокама қилдилар.
Мажлисда Муфтий ҳазратлари сўнгги йилларда Давлатимиз Раҳбари ташаббуси билан диний-маърифий ислоҳотлар амалга оширилаётгани, янги масжидлар, Қуръон курслари ва мажмуалар барпо этилаётгани, хусусан, жорий йилда Қўқон шаҳрида “Масжидул Латиф”, Қўштепа туманида “Умар ибн Хаттоб” ҳамда Ёзёвон туманида “Ал Фарғоний” жоме масжидлари фойдаланишга топширилгани, Қўқонда янги тажвид курси иш бошлаганини алоҳида эътироф этдилар.
Йиғилишда ўтган давр мобайнида имом-хатиблар ва отинойилар томонидан 42 мингта маърифий тадбир ўтказилгани, 6 500 нафар фуқаронинг мурожаати ижобий ҳал этилгани, 6 000 нафар мигрант оилалари ҳолидан хабар олингани ҳамда 400 та ажрим ёқасидаги оила яраштирилгани ижобий баҳоланди.
Шунингдек, ҳомийлар ва имомлар ташаббуси билан эҳтиёжмандларга 3 млрд сўмлик ва мадрасаларга 136 млн сўмлик хайрия ёрдамлари кўрсатилиб, 3 та оилага янги уй қуриб берилгани мамнуният билан қайд этилди.
Шу билан бирга, Шайх Нуриддин Холиқназар ҳазратлари томонидан келгусидаги устувор вазифалар белгилаб берилди. Имом-хатибларга аҳоли орасида тарғибот-ташвиқотни кучайтириш, Мустақиллигимизнинг 35 йиллиги ва «Маҳаллада ободлик ва меҳр-саховат ойлиги» доирасида масжидларни обод қилиш топширилди.
Оилавий ажримларнинг олдини олиш ва ижтимоий тармоқларда нотиқ имом-хатиблар томонидан тайёрланган видеомаърузаларни кенг тарқатиб, ахборот маконида соғлом эътиқод муҳитини мустаҳкамлаш зарурлиги таъкидланди.
Йиғилиш якунида Муфтий ҳазратлари ҳар бир ходим ўзини шариат ходими сифатида англаб, тақво, ҳалоллик ва юксак масъулият билан халқимизга хизмат қилиши лозимлигини уқтирдилар.
Фарғона вилояти вакиллиги мутахассислари учун яратилган шароитлар ҳам кўздан кечирилди
Ўзбекистон мусулмонлари идораси Матбуот хизмати
