Масжидлар сони 2081 тага етди
Қорақалпоғистон Республикаси Адлия вазирлиги томонидан “Мулла Исҳақ” масжиди рўйхатдан ўтказилиб, бу тўғридаги гувоҳнома жоме ходимларига топширилди.
Янги масжид мамлакатимизнинг шимолий ҳудуди, Қорақалпоғистон Республикаси, Қўнғирот тумани "Алтинкўл" овул фуқаролар йиғини ҳудудида жойлашган.
Маълумот учун, ушбу масжид очилиши билан мамлакатимиздаги масжидлар сони 2081 та, Қорақалпоғистон Республикасида эса 53 тага етди.
Аллоҳ таоло ушбу масжидни “Алтин кўл” овул фуқаролар йиғини аҳли ва халқимизга муборак қилсин. Унинг фаолиятини йўлга қўйишга ҳисса қўшганлардан Ўзи рози бўлсин!
Ўзбекистон мусулмонлари идораси Матбуот хизмати
Аҳоли билан очиқ мулоқот: мурожаатлар ечим топмоқда
Ўзбекистон мусулмонлари идораси томонидан аҳоли билан йўлга қўйилган очиқ ва самимий мулоқот тизими фуқароларнинг мурожаатларини атрофлича ўрганиш ҳамда уларга тезкор ечим топишда муҳим омил бўлмоқда.
12 август куни Диний идора раиси ўринбосари Зайниддин домла Эшонқулов навбатдаги фуқаролар қабулини ўтказиб, юртдошларимизнинг арз, таклиф ва мурожаатларини тингладилар. Юзма-юз суҳбат жараёнида масжидлар ҳолати ва фаолияти, имом-хатиблар иши, Ҳаж ва Умра зиёратларини ташкил этиш, оилавий муносабатларни тартибга солиш ҳамда моддий ёрдам кўрсатишга оид кўплаб масалалар чуқур таҳлил қилиниб, уларнинг аксарияти жойида ижобий ҳал этилди.
Эслатиб ўтамиз, бу каби қабуллар ва фуқаролар билан мулоқот тадбирлари Диний идоранинг ҳудудий вакилликлари ҳамда юртимиздаги барча жоме масжидларда ҳар ҳафтанинг чоршанба куни имом-хатиблар томонидан ўтказиб келинмоқда.
Ўзбекистон мусулмонлари идораси
Матбуот хизмати
