21 Июл, 2026, 7 Сафар, 1448
21 Июл, 2026, 7 Сафар, 1448
Бисмиллаҳир Роҳманир Роҳийм
Аллоҳ таолога беадад ҳамду санолар, Расулуллоҳ соллаллоҳу алайҳи васалламга дуруду салавотлар бўлсин.
Абу Бакр Сиддиқ розияллоҳу анҳу
Абу Бакр розияллоҳу анҳунинг аёли Асмо бинти Умайс розияллоҳу анҳо айтадилар: “Расулуллоҳ соллаллоҳу алайҳи васаллам вафот этганларига бир кун бўлган эди. Абу Бакр Сиддиқ розияллоҳу анҳу Расулуллоҳ соллаллоҳу алайҳи васалламни бир кун кўрмаганларига бошларини тиззаларига қўйиб кўп йиғлардилар”. Шунда тинчлантириш мақсадида: “Кўп ташвиш чекманг! Ҳамиша Расулуллоҳ соллаллоҳу алайҳи васаллам билан бирга бўлдингиз. Иншааллоҳ, яқинда У зот алайҳиссалом билан яна кўришасиз”, дедим.
Абу Бакр Сиддиқ розияллоҳу анҳу Расулуллоҳ соллаллоҳу алайҳи васаллам қаттиқ соғинар, у зот алайҳиссалом билан кўришишни интизорлик билан кутардилар.
Расулуллоҳ соллаллоҳу алайҳи васалламни кўришга бўлган соғинч икки йилу уч ой давом этди. Абу Бакр Сиддиқ розияллоҳу анҳу вафот этдилар. Соғиниб кутганлари – Расулуллоҳ соллаллоҳу алайҳи васаллам билан учрашишга муваффақ бўлдилар...
Фотимаи Заҳро розияллоҳу анҳо
Расулуллоҳ соллаллоҳу алайҳи васаллам оғир бетоб бўлиб ётардилар. Қизлари Фотимаи Заҳро розияллоҳу анҳо У зотнинг олдиларига кирдилар. Оталарини бу аҳволда кўриб йиғладилар. Шунда Расулуллоҳ соллаллоҳу алайҳи васаллам: “Эй Фотима яқинроқ кел”, дедилар. У зот соллаллоҳу алайҳи васаллам қизларининг қулоғига бир нарсаларни айтдилар. Фотимаи Заҳро розияллоҳу анҳонинг йиғилари янада кучайди. Сўнгра бошқа қулоғига яна бир нарсаларни айтдилар. Бу сафар Фотимаи Заҳро розияллоҳу анҳо табассум қилдилар.
Расулуллоҳ соллаллоҳу алайҳи васалламнинг вафотларидан кейин Фотима розияллоҳу анҳодан оталари нима деганлари ҳақида сўрашганда: “Биринчи гал шу куни вафот этишлари ҳақида гапирдилар. Иккинчисида эса, менга аҳлимдан биринчи бўлиб сен етишасан дедилар”, деб жавоб бердилар.
Ҳа, Фотима розияллоҳу анҳонинг кўнгилларига фақатгина У зотга биринчилардан бўлиб етишиш таскинлик берарди. Пайғамбаримиз соллаллоҳу алайҳи васалламни соғиниб ўтган олти ойдан сўнг Фотима розияллоҳу анҳо Расулуллоҳ соллаллоҳу васаллам билан яна учрашдилар.
Билол ибн Рабоҳ розияллоҳу анҳу
Билол розияллоҳу анҳу ўлим тўшагида ётардилар. Аёли: “Қандай қайғуга ботдик!” деб маҳзун бўларди. Буни эшитган Билол ўлим талвасасидан туриб: “Қайғу дема, хурсандчилик дегин. Чунки эртага дўстларим – Муҳаммад алайҳиссалом ва у зотнинг саҳобалари билан учрашаман”, деди.
Ўлим тўшагида ётган Билол розияллоҳу анҳу Расулуллоҳ соллаллоҳу васаллам билан учрашишга ошиқардилар.
Расулуллоҳ соллаллоҳу алайҳи васаллам эса умматларини кўришга муштоқлар
Кунларнинг бирида Расулуллоҳ соллаллоҳу алайҳи васаллам саҳобалар розияллоҳу анҳум билан бирга Бақиъ қабристонига кирдилар. Шунда у зот алайҳиссалом:
– Дўстларимни кўришни жуда хоҳлайман, – дедилар.
Саҳобалар розияллоҳу анҳум:
– Ё Расулуллоҳ, Биз сизнинг дўстларингиз эмасмиз-ми? – дейишди.
Расули акрам соллаллоҳу алайҳи васаллам:
– Сизлар менинг асҳобларим (биродарларим)сизлар. Дўстларим эса, мендан кейин келадиган, мени кўрмай туриб, менга имон келтирадиган қавмдир, – дедилар.
Унутманг! Расулуллоҳ соллаллоҳу алайҳи васаллам биз умматларини кўришга жуда мушоқдирлар. Аммо биз Расулуллоҳ соллаллоҳу алайҳи васалламга муносиб уммат бўляпмиз-ми?
Аллоҳ таоло қалбимизни Расулуллоҳ соллаллоҳу алайҳи васалламга бўлган муҳаббатга тўлдирсин, у зот алайҳиссаломга муносиб уммат бўлишимизга тавфиқ ато этсин!
Даврон НУРМУҲАММАД
Маълумот ўрнида, 30 июндан эътиборан республикамиздаги қуйидаги олий ва ўрта махсус диний таълим муассасаларига абитуриентлардан ҳужжатлар қабул қилинмоқда:
Имом Бухорий номидаги Тошкент ислом институти (Бакалавриат, Магистратура ва Модуль таълим тизими);
Мир Араб олий мадрасаси;
Ҳадис илми мактаби;
Имом Термизий номидаги ислом институти;
Барча ўрта махсус ислом таълим муассасалари.
Эслатма: Ҳужжат қабули бугун соат 18:00 гача давом этади. Муҳлат тугашига оз вақт қолганини инобатга олиб, абитуриентлардан ҳужжат топшириш жараёнини кечиктирмасликларини сўраб қоламиз!
Абитуриентлар ўзларига энг яқин жойлашган диний таълим муассасасининг Қабул ҳайъати орқали республикадаги исталган диний таълим муассасасига ҳужжат топширишлари мумкин.
1. Бакалавриат босқичи учун:
Муассаса ректори номига ариза;
Паспорт ёки ID карта нусхаси (асли кўрсатилади);
Ўрта махсус ислом таълим муассасасини тамомлаганлиги ҳақида диплом ва иловаси нусхаси (асли кўрсатилади);
3,5 х 4,5 ҳажмдаги 6 дона рангли фотосурат (оқ фонда, охирги 3 ойда олинган). (Хорижий диний таълим муассасасини тугатган ва нострификациядан ўтган дипломга эга ЎзР фуқаролари ҳам топширишлари мумкин).
2. Ўрта махсус ислом таълим муассасалари учун:
Муассаса раҳбари номига ариза;
Паспорт ёки ID карта нусхаси (асли кўрсатилади);
Аттестат ёки диплом нусхаси (асли кўрсатилади);
3,5 х 4,5 ҳажмдаги 6 дона фотосурат;
Чет тили бўйича камида B2 даражасидаги сертификат нусхаси (мавжуд бўлса — имтиҳонсиз максимал балл берилади).
3. Магистратура босқичи учун:
Ректор номига ариза, паспорт/ID нусхаси ва 6 дона фотосурат;
Олий диний таълим муассасаси дипломи ва иловаси нусхаси (асли кўрсатилади);
Араб тили бўйича камида C1 даражасидаги миллий ёки халқаро сертификат (максимал балл берилади).
4. Модуль таълим тизими учун:
Ариза, паспорт/ID нусхаси, 6 дона фотосурат;
Ўрта махсус ислом таълим муассасаси дипломи ва иловаси асл нусхаси;
Ўзбекистон мусулмонлари идорасининг ҳудудий вакилидан (қозиёт/вакиллик) тавсиянома;
Тасдиқланган меҳнат дафтарчаси нусхаси.
Тўлов ҳақида: Тест синовларида иштирок этиш учун БҲМнинг ярим баравари (1/2) миқдорида тўлов ундирилади.
Жорий йилда мактаб, лицей ёки коллежни тамомлаганлар, ногиронлиги бўлган шахслар ва тўлиқ давлат таъминотидаги абитуриентлардан тўлов ундирилмайди.
Фурсатни бой берманг, ҳужжатларингизни топширишга шошилинг!
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 