Хушхабар: “Масжид одоблари” китоби нашр этилди
Айни кунларда халқимиз эътиборига Аллоҳ таолонинг Ер юзидаги уйлари бўлган масжидларда мўмин-мусулмон киши ўзини қандай тутишига оид кўплаб фойдали маълумотларни ўз ичига олган “Масжид одоблари” номли китоб тақдим этилди.
Мазкур мўъжазгина китобда Ер юзидаги илк масжид, зиёрат учун бориладиган уч масжид, Масжидул Ҳаром ва Масжидун Набавий фазилатларига доир қизиқарли маълумотларнинг ҳам берилиши унинг ўқишлилигини янада оширади.
Шу билан бирга, унда масжидга оид бугунги кунда муҳим бўлган саволларга соҳа мутахассисларини мухтасар ва аниқ жавоблари билан ҳам танишишингиз мумкин.
Ушбу китобда мавзуга доирасидаги ҳикматлар ҳам берилган. Унда Ҳазрати Алий розияллоҳу анҳудан келтирилган ҳикматда бундай дейилади: “Агарда менга масжид ва жаннат икковидан бирини танлаш ихтиёри берилса, масжидни танлаган бўлардим. Чунки масжид Аллоҳнинг ҳаққидир, жаннат эса нафснинг насибасидир”.
Музаффар домла Камолов қаламига мансуб рисолага Ўзбекистон мусулмонлари идораси раиси, муфтий Шайх Нуриддин Холиқназар ҳазратлари сўз боши ёзиб хайрли дуо берганлар.
Аллоҳ таоло ушбу китобни халқимизга муборак ва манфаатли қилсин, холис Ўзининг розилиги учун қилинган амаллар қаторида қабул этсин.
Ўзбекистон мусулмонлари идораси
Матбуот хизмати
Саййид Яҳё Бокувий меросига бағишланган халқаро конференция бўлиб ўтмоқда
Боку шаҳрида Туркий давлатлар муфтийлари йиғилиши доирасида улуғ мутафаккир, тасаввуф олими Саййид Яҳё Бокувий меросига бағишланган халқаро конференция ўз ишини бошлади.
Ушбу нуфузли тадбирда Туркий давлатлар ташкилоти, Бутунжаҳон мусулмон донишмандлар кенгаши, IRCICA, ICESCO, Ал-Азҳар уламолар кенгаши вакиллари ҳамда етук шарқшунос ва исломшунос олимлар иштирок этмоқда.
Анжуманда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари маъруза қилдилар.
Муфтий ҳазратлари Саййид Яҳё Бокувийнинг тасаввуф тарихидаги мақоми ва унинг таълимоти ҳақида тўхталдилар. Шунингдек, нутқда аллома нафақат тасаввуф, балки диний илмлар, табиий ва аниқ фанларни эгаллаган қомусий олим бўлгани, ўттизга яқин асарлари инсон нафсини тарбиялашда муҳим қўлланма экани таъкидланди.
Шайх Нуриддин Холиқназар ҳазратлари Қуръони карим ва ҳадиси шарифларга таянган ҳолда қалб саломатлиги ва поклиги инсон ҳаётининг бош мезони эканини баён этиб, туркий халқларни боғлаб турган умуммаънавий илдизларга алоҳида урғу бердилар:
«Ҳазрат Аҳмад Яссавий, Баҳоуддин Нақшбанд ва Саййид Яҳё Бокувий каби буюк зотлар илгари сурган нафс тарбияси, инсонпарварлик ва юксак ахлоқ ғоялари бугун ҳам қардош халқларимизни бирлаштириб турувчи мустаҳкам маънавий кўприкдир. Бундай улуғ сиймолар меросини ҳамкорликда ўрганиш халқларимизнинг маънавий бирлигини мустаҳкамлаш ва ёшларимизни соғлом эътиқод руҳида тарбиялашга хизмат қилади».
Уч кунлик анжуман давомида Ўзбекистон илмий жамоатчилиги ҳам маърузалар билан иштирок этади.
Ўзбекистон мусулмонлари идораси Матбуот хизмати
