Африканинг марказида жойлашган Чад давлати қадимий маданият ўчоғидир. Бу диёр ўзига хос чўллари, воҳалари ва кенг яйловлари билан кишилар эътиборини тортади. Иқлими иссиқ ва ёғингарчилик деярли кузатилмайди.
Бу ўлка этник гуруҳлар, тиллар ва анъаналар маркази бўлиб, бой маданий хилма-хилликка эга. Аҳолисининг олтмиш фоизи мусулмон. Чад халқи самимий ва меҳмондўстдир.
Ислом динининг бу диёрга кириб келиши саҳоба Уқба ибн Нофий розияллоҳу анҳу номи билан боғлиқ. У халифа Умар розияллоҳу анҳу ҳукмронлиги даврида Ливия, Тунис, Жазоир ва Марокаш каби мамлакатларни фатҳ қилган. Унинг авлодлари ҳозир ҳам Чадда истиқомат қилади.
Бу диёрда Исломнинг кенг тарқалишига IX асрда Шимолий Африкадан келган араб ва бербер (Африка қабиласи) савдогарлари сабабчи бўлган. Кейинчалик Канем-Борну империяси минтақага Исломнинг ёйилишида муҳим роль ўйнади.
Чадликлар тижорат мақсадида турли мусулмон мамлакатларида бўлиб, у ернинг яшаш тарзи, маданияти, зироатчилиги, савдо-сотиқ, дин ишларини ва бошқа илмларни эгаллашга киришдилар.
Чадликлар одатда ота-она, фарзандлар ва бир нечта яқин қариндошлари билан биргаликда яшайдилар. Уларнинг урфига кўра, оилада барча масъулият ўғил фарзанд бўйнида. У оиланинг шаъни ва хавфсизлигига жавобгар саналади.
Чорвачилик чадликларнинг асосий даромад манбаидир. Уларнинг уй-жойлари асосан чодирлар ва қамишлардан ясалади. Бу бир ҳудуддан бошқа ҳудудга кўчишда қулайдир. Мамлакатнинг жанубий қисмида аҳоли деҳқончилик билан машғул. Унумдор ерлар асосан воҳаларда жойлашгани боис бу ер аҳолиси ўтроқлашган.
Шунингдек, чадликлар тажрибали савдогардир. Улар Марказий Африка мамлакатлари билан чорва моллари, мева, сабзавотлар ва қимматбаҳо тошлар савдосини кенг йўлга қўйган.
Жанубдаги оилалар одатда яқин қариндошлари – опа-сингиллари ва ака-укалари билан битта том остида яшайдилар. Уйлар шунга яраша катта қилиб бунёд этилади. Ҳар бир оила аъзосининг шахсий хонаси бўлади. Қизиғи, катталар бир дастурхон атрофига йиғилмайдилар. Эркаклар ва аёллар алоҳида овқатланишади.
Чадликлар миллий анъаналарни ва удумларни эъзозловчи халқ. Шимолий минтақаларда диний маросимлар тўлиқ адо этилади. Жанубдаги баъзи қабилалар суҳбатдошнинг кўзига қарашни одобсизлик деб билишади. Овқатни доим ўнг қўл билан ейдилар. Чап қўлда овқатланиш уят ҳисобланади. Меҳмонларга совға улашиш улар учун одатга айланган.
Мамлакат бўйлаб бой маданий мерос ва диний услубларни уйғунлаштирган кўплаб иншооту масжидларда бежирим ишланган наққошлик асарларини кўриш мумкин. Чад пойтахти Нжамена шаҳридаги “Буюк масжид” шаҳарнинг бош жомесидир.
Чадда диний ва дунёвий таълим берувчи мактаблар ҳамда араб тилини ўрганиш марказлари бор. Бу таълим муассасалари керакли билимларни ва миллий-маданий қадриятларни асраб-авайлашда, уларни келажак авлодга етказишда муҳим аҳамият касб этади.
Шоҳрух УБАЙДУЛЛАЕВ
Жорий йил 25-26-июл кунлари Россия Федерацияси мусулмонлари диний бошқармаси томонидан Қозон шаҳрида ташкил этилаётган “Маънавий ипак йўли: Катта Евроосиё маконида анъанавий қадриятларнинг маъноси” мавзусидаги В халқаро илмий-теологик конференцияси бўлиб ўтмоқда.
Ушбу конференцияда Ўзбекистон Республикаси Президентининг Дин ва миллатлараро муносабатлар масалалари бўйича маслаҳатчиси ўринбосари О.Салиев, Дин ишлари бўйича қўмита раисининг биринчи ўринбосари Д.Махсудов, Ўзбекистон мусулмонлари идораси раиси ўринбосари М.Муҳаммадсиддиқов ҳамда Ўзбекистон халқаро ислом академияси ректори У.Ғафуров иштирок этмоқда.
Конференцияда “Маънавий ипак йўли: Катта Евроосиё ҳудудида анъанавий қадриятларнинг аҳамияти”, “Катта Евроосиё халқлари: кундалик диний ҳаётнинг замонавий этнографик тадқиқотлари”, “Қуръоннинг замонавий ислом маданияти ва таълимда акс этиш шакллари” каби мавзулар муҳокама қилиниши режалаштирилган.
Маълумот учун, Ушбу конференцияда Россия, Хитой, Қирғизистон, Қозоғистон, Ўзбекистон, Тожикистон, БАА, Баҳрайн, Қатар, Ҳиндистон, ЖАР, Эфиопея, Бразилия, Хитой, Эрон, Миср, Белорус, Монголия давлатларининг мусулмон диний идоралари, тегишли ташкилотлари ҳамда экспертлари иштирок этмоқда.
Ушбу конференция дастлаб 2016-йил Хитойнинг Урумчи шаҳрида бўлиб ўтган, кейинчалик, 2017-йил Қозон, 2018-йил Бишкек, 2019-йил Остона шаҳрида ташкил этилган.
Ўзбекистон мусулмонлари идораси Матбуот хизмати