Ҳожилар ташаббусидан аҳоли мамнун
Ҳожиларимизнинг “Янги Ўзбекистоннинг фидойиси бўлиб, маънавият тарғиботчисига айланамиз” деган ташаббусларини амалиётга жорий этиш бўйича 18 июль кунидан Тошкент шаҳрида ва 22 июль кунидан республикамизнинг барча ҳудудларида тадбирлар бошланди.
Ҳудудий ҳокимликлар, Дин ишлари бўйича қўмита, Ўзбекистон мусулмонлар идораси, Ўзбекистон маҳаллалари уюшмаси томонидан ҳар бир ҳудуд бўйича ҳожиларни ўз маҳаллаларидаги ижтимоий ҳимояга муҳтож, профилактик ҳисобда турувчи, кам таъминланган, боқувчисини йўқотган, нотинч оила, ажрим ёқасида турган фуқароларга бириктириш ишлари ташкил этилди.
Хусусан Қорақалпоғистон Республикаси туманларида фаолият юритаётган имом хатиблар ва ноиблар, МФЙ раислари ва “Ҳаж-2024” сафарига бориб келган ҳожи ота ва ҳожи оналар, шунингдек, Фарғона вилояти бош имом-хатиби Убайдулло домла Абдуллаевнинг кўрсатмасига асосан Фарғона ва Қувасой шаҳарлари ҳамда Данғара ва Риштон туманларида фаолият юритаётган имом-хатиблари билан биргаликда ҳаж сафарига бориб келган ҳожи ота ва ҳожи оналар билан ҳамкорликда шаҳар ва туманлардаги маҳаллаларда истиқомат қилувчи ижтимоий ҳимояга мухтож, ногирон, профилактик ҳисобда турувчи оилалар ҳолидан хабар олиб, эҳтиёжманд оилаларга хайрия ва эҳсонлар улашдилар.
Бириктирувга асосан, 22 июль куни Андижон вилоятида 118 та, Бухоро вилоятида 28 та, Жиззах вилоятида 106 та, Навоий вилоятида 5 та, Наманган вилоятида 48 та, Самарқанд вилоятида 59 та, Сирдарё вилоятида 38 та, Сурхондарё вилоятида 34 та, Тошкент вилоятида 80 та, Фарғона вилоятида 25 та, Хоразм вилоятида 52 та, Қашқадарё вилоятида 29 та, Тошкент шаҳрида 59 та тадбирлар ўтказилди. Тошкент тажрибаси асосида бошқа ҳудудларда ҳам ишни ташкил этиш бугунги кундан амалиётга жорий этилди.
Республика ишчи гуруҳи томонидан маҳалла раислари, фаоллари, имом-хатиблар, ҳожиларга маҳаллаларда амалга ошириладиган тадбирлар бўйича тушунтириш ишлари олиб борилди.
Ҳудудларда ҳожилар иштирокида 711 та хонадонлар ҳолидан хабар олиниб, маҳалла раислари, имом-хатиблар билан биргаликда суҳбатлар ташкил этилди.
Маҳаллалардаги кам таъминланган, боқувчисини йўқотган, эҳтиёжманд оилаларга ҳожилар томонидан моддий ёрдам, озиқ-овқат маҳсулотлари тақдим этилди.
Ўзбекистон мусулмонлари идораси Матбуот хизмати
“Al Jazeera”: Ўзбекистон ислом цивилизацияси шаклланиши ва тараққиётида юксак ўрин эгаллайди
Қатарнинг “Al Jazeera” нашрида Тошкент ва Самарқанд шаҳарларида бўлиб ўтган “Ислом цивилизацияси: янги нигоҳ, янги кашфиётлар” мавзусидаги халқаро медиафорум ҳақида мақола эълон қилинди, деб хабар бермоқда “Дунё” АА.
Мақола муаллифи, халқаро медиафорумда иштирок этган Муҳаммад Аъморийнинг таъкидлашича, яқинда Тошкент шаҳрида бунёд этилган Ўзбекистон Ислом цивилизацияси маркази медиафорум иштирокчиларида катта таассурот қолдирган.
Марказда Ўзбекистон ҳудудида ислом цивилизациясининг шаклланиши ва тараққиёти, тарихий ёдгорликлар, қўлёзмалар, археологик топилмалар ҳамда буюк алломалар мероси ўрин олган. Музейда қарийб 8 мингта тарихий ашё ва экспонат сақланиши, улар орқали Мовароуннаҳр халқларининг қадимги даврлардан бошлаб илм-фан ва маданият тараққиётига қўшган ҳиссаси намойиш этилган.
Мақолада ёзилишича, музей экспозициялари асосан тўрт муҳим тарихий даврни қамраб олишига эътибор қаратилган. Булар – исломдан олдинги давр, Мовароуннаҳрдаги биринчи уйғониш даври, Темурийлар даври ва Ислом цивилизациясига оид қимматли Қуръон қўлёзмалари намойиш этилган залдир.
Ушбу мажмуада Усмон Мусҳафига алоҳида ўрин берилган. Шу билан бирга, музейда қадимги шаҳарлар, Буюк Ипак йўли, ҳаж анъаналари, Каъба ва унинг муқаддас ёдгорликлари билан боғлиқ экспонатлар ҳам тақдим қилинган.
Материалда Ўзбекистон ва Марказий Осиё тарихида чуқур из қолдирган буюк алломалар – Муҳаммад ал-Хоразмий, Аҳмад ал-Фарғоний, Имом Бухорий, Имом Термизий, Абу Али ибн Сино, Абу Райҳон Беруний, Абу Наср Форобий, Мирзо Улуғбек, Камолиддин Беҳзод, Амир Темур, Заҳириддин Муҳаммад Бобур каби тарихий шахсларнинг илм-фан, дин, маданият, санъат ва давлатчилик ривожига қўшган ҳиссаси кенг ёритилган.
Ўзбекистон мусулмонлари идораси Матбуот хизмати
