Ҳақ йўлинда ким сенга
Дунё мамлакатларида устозлар куни қандай нишонланади?
Ўқитувчилар куни- бу ҳар бир инсоннинг ҳаётида бемисл аҳамият касб этадиган кишилар- педагогларга ҳурматнинг рамзий кўринишидир. Уларнинг сабри, меҳнати ва иродаси сабаб, болаларда илмга интилиш, қизиқишлар рўёбга чиқади, янги талант ва иқтидорлар юзага келади.
-Францияда Ўқитувчилар куни 5 октябрда нишонланади. Бирон совға бериш урфда эмас. Мактаб маъмурияти ўз ихтиёрига кўра зиёфат столи уюштиради. Бу орқали ўқитувчи ва ўқувчилар эркин мулоқот қилишлари учун имконият бўлади. Ширинликлар ва стол безатиш ота-оналар томонидан ташкил этилади.
-Германияда Устозлар кунида ўқитувчиларга совға бериш одати йўқ. Агар ўқувчи устозини ҳурмат қилиб, ёқтирадиган бўлса, ўз қўли билан бирон нима ясаб совға қилиши ёки табрикнома ёзиб, ҳадя қилиши мумкин.
-АҚШда Миллий ўқитувчи куни май ойининг биринчи ҳафтасида нишонланади. Бу ҳафта ўқитувчиларга миннатдорлик ҳафтаси дея номланади. Хоҳишларига кўра ўқувчилар устозларига гуллар ва конфетлар совға қилишади.
-Польша ушбу санани 14 октябрда нишонлайди. Бу кунда ўқитувчиларга гуллар, ширинликлар совға қилиш бор, унда ҳам ҳар бир ўқувчи эмас, бутун синф номидан. Қимматбаҳо совғалар ҳадя қилиш мумкин эмас. Шу билан бирга ўқувчилар фақатгина синф раҳбарларини табриклашлари мумкин.
-Хитойда устозлар куни 14 октябрда байрам қилинади. Унинг байрам сифатида тайин қилиниши ўқитувчиларинг нуфузи ва аҳамиятини ошириш мақсадида бўлган. Бу кунда мактабларга кўплаб собиқ ўқувчилар ҳам ташриф буюриб, устозларини зиёрат қиладилар, илиқ тилаклар билдирадилар.
-Аргентинада ушбу сана 11 сентябр куни байрам қилинади. Расмий дам олиш куни эълон қилинади, устозлар табрикланади.
-Ҳиндистонда Устозлар куни 5 сентябрда ўтказилади. У куни анъанага кўра, устозлар билан ўқувчилар ўрин алишиб, дарсларни ўқувчилар олиб боришади.
-Англияда ушбу байрамда чой совға қилиш аъанаси бор. “Билимларни мактабда китоб ила, уйда бўлса чой билан жамлагин”, дейилади, инглиз мақолларидан бирида.
Дунёнинг қаерида ва қайси санада бўлмасин, Устозлар куни – ўқитувчи ва педагогларга ҳурмат ва эътибор кўрсатишнинг бир рамзи бўлиб, уларнинг фидокорона меҳнатларига миннатдорлик билдиришдир.
Бобур Аҳмад тайёрлади.
“El Mundo Financiero”: Хавфсизлик рейтингида Ўзбекистон дунёнинг энг бехатар давлатлари қаторидан ўрин олди
Испаниянинг “El Mundo Financiero” нашрида Ўзбекистоннинг халқаро туризм бозоридаги ўрнига бағишланган мақола эълон қилинди, деб хабар бермоқда “Дунё” АА.
Мақолада қайд этилишича, “Global Terrorism Index 2026” рейтингида Ўзбекистон яна дунёдаги энг хавфсиз давлатлар қаторига кирган. Иқтисодиёт ва тинчлик институти томонидан тайёрланган мазкур рейтинг 163 мамлакатни қамраб олган бўлиб, 2026 йил якунларига кўра, Ўзбекистон 0,014 балл билан энг хавфсиз давлатлар гуруҳидан жой олган.
Нашр бу натижани мамлакатда жамоат хавфсизлигини таъминлаш, ҳуқуқ-тартибот тизимини такомиллаштириш ҳамда ҳуқуқбузарликларнинг олдини олиш бўйича амалга оширилаётган изчил чора-тадбирлар самараси сифатида баҳолаган.
Материалда хорижлик сайёҳлар Ўзбекистон бўйлаб саёҳат давомида ўзини хавфсиз ҳис қилишига алоҳида эътибор қаратилган. Аэропортлар, темир йўл вокзаллари, метро, туристик объектлар, марказий кўчалар ва бошқа жамоат жойларида хавфсизликни таъминлаш бўйича яратилган тизим мамлакатнинг ижобий имижини мустаҳкамлашга хизмат қилаётгани таъкидланган.
Шунингдек, Самарқанд, Бухоро ва Хива каби Буюк Ипак йўли шаҳарлари, шунингдек, замонавий Тошкентнинг бой тарихий-маданий мероси ҳамда меҳмондўстлик анъаналари хорижлик сайёҳларни тобора кўпроқ ўзига жалб этаётгани алоҳида эътироф этилган.
“Global Terrorism Index 2026” натижалари Ўзбекистоннинг туризм, бизнес ва халқаро алмашинувлар учун ишончли, барқарор ҳамда хавфсиз мамлакат сифатидаги имижини янада мустаҳкамлашга хизмат қилади”, дея хулоса қилган “El Mundo Financiero”.
Ўзбекистон мусулмонлари идораси Матбуот хизмати
