Надомат
Дунёнинг бир чеккасида номи оламга маълум ва машҳур бўлган бир шаҳар бор эди. Шаҳар ниҳоятда обод; кўркам бинолари, озиқ-овқатга тўлиб тошган расталари ҳар қандай кишининг ҳавасини уйғотар, одамлари ўзига тўқ, деярли муҳтожликда яшайдиган одамнинг ўзи йўқ эди.
Бу ерда ҳар куни зиёфатлар, кўнгилочар томошалар, ва бир-биридан қизиқарли тўй-у тантаналар бўларди. Дастурхонларда бўш ернинг ўзи қолмас, ортиб қолган нарсаларни эса биров бир тийинга олмас эди...
Жазирама кунларнинг бирида ўша бадавлат шаҳарнинг ичида бир нотаниш кимса пайдо бўлди. У оппоқ ёпинчиқ ўраб юзини беркитиб олган, кўчада кимни кўрса унга салом бериб кўнглини олган, одамларга илиқ сўзлар айтиб эзгуликка даъват қилар эди.
Бу ҳол шаҳар маъмурининг қулоғига етиб боргач, ўша ҳар йили бир пайдо бўладиган нотанишнинг мақсадини билмоқчи бўлиб, уни ҳузурига чақиришларини буюрди. Бироз ўтиб, нотанишнинг ўзи шаҳар маъмурининг ёнида пайдо бўлди. Ва унга қараб:
− Салом сенга эй Аллоҳнинг бандаси, – гап бошлади у, − қутлуғ кунларинг муборак бўлсин!
− Нималар деяпсан ўзинг?! Ўзи шундоқ ҳам ҳар кунимиз қутлуғ бўлса, яна қанақа кун ҳақида айтяпсан? – ҳайрон бўлиб сўради маъмур.
− Қандай бўларди, Яратганга кечалари дуо қиладиган, ундан гуноҳларни кечиришликни сўраб илтижо қилинадиган, кечалари ибодатга қоим бўлиб, унга истиғфорлар айтиладиган, одамларга ҳайр-у саҳоват қилиб, уларнинг кўнгилларини оладиган, кўзни, қўлни, тил ва дилни гуноҳлардан муҳофаза қилиб, фақат яхшиликлар қилинадиган кунларни айтяпман-да! – жавоб берди нотаниш.
Маъмур унинг сўзларини тинглаб, истеҳзоли кулиб қўйди. Ва деди:
− Менга қара ҳой нотаниш йўловчи! Бизнинг ҳеч нарсадан кам жойимиз йўқ! Ҳар нарсамиз етарли, одамларнинг қорни тўқ, устлари бут! Ҳар кунимиз байрам, зиёфат! Энди менга айтчи, сен айтган ишларни қилишликдан бизга нима наф?! Сен яхшиси, йўлингдан қолма...
Нотаниш кимса бошқа сўз айтмади. Ва бир зум ўтмай кўздан ғойиб бўлди.
Орадан бир неча кунлар ўтди. Шаҳар аҳли ҳар доимгидек «ширин» ҳаётида яшашда давом этди. Ҳар кунлари бир хилликда – базм-у жамшидларда ўтар, бу кунларнинг ўз поёнига етиши эса ҳеч кимсанинг ҳаёлига ҳам келмас эди.
Бир куни шундай бўлди: шаҳарда қурғоқчилик бошланиб, экинлар нобуд бўлди. Расталар тез орада бўшаб одамлар оч қола бошлади. Энди ўша тотли дамлар йўқ, ҳаммаёқни қаҳатчилик эгаллаб бўлган эди. Ушбу ҳолатни кўриб одамлар негадир ўша нотаниш кимсани йўқлаб қолишди. «Балки унинг айтганларини қилсак, Яратган бизларни кечириб, яна аввалги ҳолимизга қайтариб қўяр?!» деб ўйлашарди улар. Шаҳар маъмури зудлик билан ўша нотанишни олиб келишга буюрди. Бироқ...Энди кеч эди! Ўша нотанишни ҳеч қаердан топа олишмади...
Ўша нотанишнинг исми – Рамазони Шариф эди! Шаҳар аҳлининг ҳолига тушишликдан Аллоҳнинг ўзи сақласин...
Шерзод ҲАЙДАРБЕКОВ
Ўзбекистон – Озарбайжон: диний-маърифий соҳадаги ҳамкорликни янада ривожлантириш масалалари муҳокамаси
Жорий йилнинг 30 июнь куни Озарбайжон Республикасининг Шуша шаҳрида бўлиб ўтган Туркий давлатлар ташкилотига аъзо давлатларнинг дин масалалари бўйича масъул давлат органлари раҳбарларининг биринчи учрашуви доирасида Ўзбекистон Республикаси Дин ишлари бўйича қўмитаси раиси Содиқ Тошбоев Озарбайжон Республикаси Диний ташкилотлар билан ишлаш бўйича давлат қўмитаси раиси Рамин Маммадов билан учрашди.
Мулоқот чоғида Ўзбекистон ва Озарбайжон ўртасидаги стратегик шериклик муносабатлари изчил ривожланиб бораётгани, бу эса дин соҳасидаги ҳамкорликни янги босқичга олиб чиқиш учун мустаҳкам замин яратаётгани таъкидланди.
Томонлар ҳар икки мамлакатда миллий ва маънавий қадриятларни асраш, соғлом диний-маърифий муҳитни мустаҳкамлаш, аҳолининг диний-маърифий саводхонлигини юксалтириш ҳамда давлат ва дин муносабатларини янада такомиллаштириш устувор йўналишлардан бири эканини қайд этдилар.
Рамин Маммадов диний ташкилотлар фаолияти самарадорлигини ошириш, замонавий таҳдид ва чақириқларга мос институционал ҳамкорлик механизмларини ривожлантириш муҳимлигини таъкидлаб, Шушада ўтказилаётган учрашув Туркий давлатлар ташкилотига аъзо мамлакатларнинг ваколатли органлари ўртасидаги ҳамкорликни янада мустаҳкамлаш ва қўшма ташаббусларни амалга ошириш учун янги имкониятлар яратишини билдирди.
Содиқ Тошбоев томонлар ўртасида умумий маънавий қадриятларни асраш ва уларни келгуси авлодларга етказиш йўлида олиб борилаётган изчил сиёсат алоҳида аҳамият касб этаётганини қайд этди.
Шунингдек, томонлар ҳамкорликни янада кенгайтиришдан манфаатдор эканини таъкидлаб, ўзаро ташрифларни фаоллаштириш, мутахассислар ва экспертлар алмашинувини йўлга қўйиш ҳамда қўшма илмий-маърифий лойиҳаларни амалга ошириш икки томонлама алоқаларни янги босқичга олиб чиқишига ишонч билдирди.
Шунингдек, Дин масалалари бўйича масъул давлат органлари раҳбарларининг биринчи учрашуви якунлари бўйича қабул қилинган Қўшма баёнот ушбу йўналишдаги кўп томонлама ҳамкорликни янада ривожлантиришга хизмат қилиши қайд этилди.
Учрашув якунида томонлар қўшма маърифий лойиҳаларни амалга ошириш ҳамда ўзаро манфаатли бошқа масалалар юзасидан фикр алмашдилар.
Дин ишлари бўйича қўмита
Ахборот хизмати
