Ростгўйлик
Динимизда ростгўйлик юксак инсоний фазилатлардан ҳисобланади. Ростгўйлик, аҳдга вафо ва омонатдорлик жамият ҳаётида муҳим ўрин тутади. Ростгўйлик йўқ жойда ўзаро ишонч ва садоқат йўқолади. Агар бундай хислатлар ҳаётимиздан йўқолиб бораверса, ўзаро ишончсизлик кучайиб, инсонлар орасига адоват уруғини ташлайди. Натижада жамиятда турли ҳил муаммолар юзага келади. Жамият тараққиёт йўлидан илгарилаб бориши учун уни ташкил этувчи фуқаролар ўзаро ишонч билан, бир-бирини қўллаб-қувватлаб яшаши лозим. Бу хислатлар ҳаётнинг бир маромда давом этишини таъминлайди десак, асло муболаға бўлмайди.
Аллоҳ субҳанаҳу ва таоло инсониятга юборган пайғамбарларнинг хулқларида кўзга ташланиб турадиган улуғ ҳислатлардан бири ростгўйлик ва садоқат эди. Аксинча, ёлғончилик, ишончсизлик ва хиёнат каби иллатлар пайғамбарларга ёт бўлган.
Аллоҳ таоло: “Эй мўминлар, Аллоҳдан қўрқингиз ва иймонларида ростгўй бўлган зотлар билан бирга бўлингиз”, деб марҳамат қилади. Демак, мўмин-мусулмонлар, аввало Аллоҳ таолодан қўрқишга, сўнгра иймонида ростгўй инсонлар билан бирга бўлишга буюрилмоқда.
Ибн Масъуд розияллоҳу анҳудан ривоят қилинади: “Расулуллоҳ соллаллоҳу алайҳи васаллам: “Ростгўйлик яхшиликка олиб боради. Яхшилик эса жаннатга олиб боради. Киши рост сўзлаб юради. Ҳаттоки, Аллоҳ ҳузурида сиддиқ (ростгўй) деб ёзилади. Ёлғончилик ёмонликка олиб боради. Ёмонлик эса дўзахга олиб боради. Киши ёлғон сўзлаб юради. Ҳаттоки, Аллоҳ ҳузурида каззоб (ёлғончи) деб ёзилади”, дедилар (Муттафақун алайҳи).
Пайғамбаримиз соллаллоҳу алайҳи васаллам бу ҳадиси шарифларида ростгўйлик ва ёлғончиликнинг ўртасини ажратиб бериб, ҳар бирининг олиб борадиган манзилини ҳам таъкидлаб келтирмоқдалар. Ҳар бир мўмин-мусулмон Роббисининг ҳузурида сиддиқ (ростгўй) деб ёзилмоқлиги учун ёлғончиликдек динимизда катта гуноҳ бўлган ишлардан ўзини сақламоқлиги лозим экан.
Ростгўйлик ва садоқат жамият учун ҳам жуда зарур. Қайси жамиятда аҳдга вафо, садоқат ва ростгўйлик кенг ёйилса, ана шу жамият ислоҳ топиб, фуқаролар ўртасида ўзаро ишонч ортади, меҳр-оқибат кучаяди, олди-берди ва савдо-сотиқ ишларида хиёнат ва алдамчилик барҳам топади.
Аллоҳ субҳанаҳу ва таоло барчаларимизни гуноҳ ишлардан ўзи сақлаб, дунё ва охиратимизга манфаатли бўладиган амалларга йўлласин амин.
М.Муҳаммаджонов,
Учкўприк тумани “Кушки туркон” масжиди имом-ноиби
Манбалар асосида тайёрланди
ЮНЕСКОда Ўзбекистондаги Ислом цивилизацияси маркази тақдимотига тайёргарлик бошланди
Ўзбекистон делегацияси Парижда Ислом цивилизацияси маркази тақдимотига тайёргарлик кўриш жараёнида қатор учрашувларда иштирок этди, деб хабар бермоқда “Дунё” АА.
Ушбу учрашувлар Ўзбекистоннинг ЮНЕСКОдаги доимий ваколатхонаси кўмагида ташкил этилди. Тақдимотнинг ўтказилиши Ўзбекистон Президенти ташаббуси бўлиб, халқаро ҳамжамиятни мамлакатнинг илмий ва маданий мероси, шунингдек, юртимизда амалга оширилаётган диний-маърифий ислоҳотлар билан таништиришга қаратилган.
ЮНЕСКО, Ислом ҳамкорлик ташкилоти (ИҲТ) ва Ислом дунёси таълим, фан ва маданият ташкилоти (ICESCO) вакиллари билан бўлиб ўтган учрашувларда халқаро конференция ва кўргазмалар концепцияси тақдим этилди.
ЮНЕСКО Ижро этувчи аппарати раҳбари Мариаграция Сквиччарини Ўзбекистон етакчисининг ушбу ташаббусини эътироф этиб, унинг халқлар ўртасидаги мулоқотни мустаҳкамлашда муҳим аҳамият касб этиши айтди.
ЮНЕСКОнинг “Ипак йўллари” дастури раҳбари Меҳрдад Шабаханг Ўзбекистон ва Марказий Осиёнинг Шарқ ва Ғарб ўртасида маданий алоқаларни ривожлантиришдаги роли ҳақида тўхталиб, бу борада конференция ва кўргазмани тайёрлаш учун дастур материалларини тақдим этишини қайд этди.
ИҲТнинг ЮНЕСКОдаги вакили Салима Делибей диний-маърифий соҳадаги ислоҳотлар, Ислом цивилизацияси маркази ҳамда халқаро илмий-тадқиқот марказлари фаолиятини юқори баҳолаб, ўтказиладиган тадбирларни доим қўллаб-қувватлашини маълум қилди.
ICESCOнинг ЮНЕСКО ҳузуридаги доимий кузатувчиси Сомия Жакта Ўзбекистоннинг илмий ва маданий меросининг халқаро ҳамжамият учун аҳамиятини таъкидлаб, ташкилот конференция ва кўргазмани тайёрлашда иштирок этишини таъкидлади.
Учрашувлар якунида ЮНЕСКО, ИҲТ ва ICESCO вакиллари Ўзбекистон ташаббусини қўллаб-қувватлашини ҳамда юқори халқаро даражадаги тадбирларни ўтказишга кўмаклашишга тайёр эканини билдирди.
Ўзбекистон мусулмонлари идораси Матбуот хизмати
