“Сирдарёликларга кўмак” акциясида самарқандликлар фаол
“Сирдарёликларга кўмак” акциясида Ўзбекистон мусулмонлари идораси тасарруфидаги масжидлар имом-хатиблари жуда фаол иштирок этмоқда. Куни кеча Самарқанд вилоятидаги айрим жоме масжидлар имом-хатиблари томонидан меҳр-саховат юклари юртдошларимизга етказилди.
Самарқанд шаҳридаги “Мурод Авлиё” ва “Панжоб” жоме масжидлари томонидан ҳомийларни жалб этган ҳолда ташвишли юртдошларимизни қўллаб-қувватлаш мақсадида, инсонпарварлик юклари ортилган 2 та катта юк ва 8 та ISUZU юк мошиналари, шунингдек, Ургут тумани “Чубин” жоме масжиди томонидан 4 та ISUZU юк мошинаси ўз манзилларига етказилди.
Юборилган мазкур ёрдамларнинг умумий миқдори 230 миллион сўмдан зиёд бўлиб, унинг таркибида озиқ-овқат маҳсулотлари – ун, шакар, ўсимлик ёғи, чой, макарон, гуруч ва қишлоқ хўжалик маҳсулотлари, шунингдек, кийим-кечак ва уй-рўзғор буюмлари, дори-дармон ва бошқа кундалик эҳтиёжлар учун зарур бўлган маҳсулотлар ўрин олган.
Рамазон ойида машаққатда қолган юртдошларимизга ўз ёрдам қўлларини чўзаётган азизларимизга самимий миннатдорлигимизни билдирамиз.
Қуръони каримда мўмин-мусулмонларнинг ўзаро ёрдамлашишига катта аҳамият берилган: “Яхшилик ва тақво йўлида ҳамкорлик қилинг» (Моида, 2). Ҳадиси шарифда эса: “Мўмин киши мўмин биродарини ёрдамсиз қолдирмайди”, дейилган (Имом Бухорий ривояти)
Аллоҳ таоло қилаётган эҳсонларни ўз даргоҳида қабул қилсин, ажру савобларини зиёдаси билан ато этсин.
Эслатиб ўтамиз, моддий ёрдамлар Сирдарё вилояти Гулистон шаҳридаги “Исо ўғли Мусо” жоме масжиди имом-хатиби Жалолов Авазхонга қарашли қуйидаги пластик карта рақамига ўтказилмоқда.
8600 3329 4470 9496, JALOLOV AVAZKHON номида, мурожаат учун телефон: +998949190220. Хориждаги ватандошларимизда ҳам меҳр-саховат қилиш истаги бўлса ушбу телефон орқали боғланиб, маълумот олишлари мумкин.
Олий ҳимматлигингиз учун ташаккур.
