Масжиднинг янги биносига илк ғишт қўйилди
Самарқанд шаҳридаги “Хўжа абду Дарун” жоме масжиди янги биносига биринчи ғишт қўйиш маросими бўлиб ўтди. Унда устоз Маҳмуджон домла Ибодуллаев нуроний отахонлар билан бирга масжид пойдеворига илк ғиштни қўйиб бердилар.
Шундан сўнг йиғилганлар Аллоҳ таолодан масжид қурилиш ишлари тезда якунланишини, узоқ йиллар мўмин-мусулмонларга хизмат қилишини, масжид қурулишига ҳисса қўшаётган саҳоватпеша инсонлар, уста ва мутахассислар, ҳашарчилар олаётган ажру савобларни янада кўпайтириб беришини сўраб дуо қилишди.
Маълумот учун, ушбу масжиднинг эски биноси янгитдан ҳашар, хайрия йўли билан бино бўлмоқда. Масжид замонавий ва миллий меъморчилигимиз анъаналари уйғунлашган ҳолда қад ростлайди. Ҳозир масжиднинг асос қисмида ишлар олиб борилмоқда. Ҳозирда юз кишига хизмат кўрсатишга мўлжалланган таҳоратхона, хизмат хоналари ва кутубхона биносининг қурилиши якунланиб, уларда пардозлаш, жиҳозлар ўрантиш ишлари олиб борилмоқда. Яқинда таҳоратхона фойдаланишга топширилади. Унда аёллар учун алоҳида таҳоратхона ўрин олган.
Дарҳақиқат, масжид қуриш ёки унга ҳисса қўшиш савоби улуғ амаллардан. Аллоҳ таоло марҳамат қилади: “Албатта, Аллоҳнинг масжидларини фақат Аллоҳга ва охират кунига иймон келтирганлар, намозни тўкис адо этганлар, закотни берганлар ва Аллоҳдан бошқадан қўрқмаганларгина обод қилурлар. Ажаб эмаски, ана ўшалар ҳидоят топгувчилардан бўлсалар” (Тавба сураси, 18-оят).
Расулуллоҳ соллаллоҳу алайҳи васаллам бундай дейдилар: “Ким Аллоҳ йўлида масжид учун битта ғишт қўйса, Аллоҳ у учун жаннатда битта қаср барпо қилади”, деганлар.
Бу дунёда қилган ҳар бир савоб амалимиз охиратимиз учун заминдир. Аллоҳга суюкли маконларни обод қилишганларга эса жаннатда қаср бино этилади, иншоаллоҳ.
Ўзбекистон мусулмонлари идораси Матбуот хизмати
Диний таълим соҳасида илк бор Республика анжумани бўлиб ўтади
Жорий йилнинг 19-20 август кунлари Ўзбекистон мусулмонлари идораси тасарруфидаги олий ва ўрта махсус диний таълим муассасалари профессор-ўқитувчиларининг «Замонавий диний таълим: педагогика, илм-маърифат ва инновация» номли I илмий-амалий анжумани Ислом цивилизацияси марказида бўлиб ўтади.
Давлатимиз Раҳбари томонидан ҳар жабҳада олиб борилаётган янгиланиш ва ислоҳотларга ҳамоҳанг тарзда Диний идора тарихида илк бор ўтказилаётган ушбу тадбирда жами 700 нафар педагог ва соҳа мутахассиси, жумладан, 300 нафар иштирокчи бевосита анжуман залида, 400 нафар иштирокчи эса ҳудудлардан видеоселектор орқали қатнашади.
Анжумандан кўзланган мақсад соҳадаги истиқболли режаларни муҳокама қилиш, диний таълимда педагогик ва касбий маҳоратни ошириш, таълим жараёнига замонавий технологияларни янада кенг татбиқ этиш ҳамда диний таълимни янги босқичга олиб чиқишдир.
Дастур доирасида соҳа раҳбарлари иштирокида таҳлилий маърузалар, таниқли профессорлар томонидан маҳорат дарслари, илмий-методик машғулотлар бўлиб ўтади. Шунингдек, иштирокчилар Ўзбекистон мусулмонлари идораси, Ислом цивилизацияси маркази билан яқиндан танишиб, Ҳазрати Имом мажмуасидаги тарихий қадамжо ва обидаларни зиёрат қилишади.
Ўзбекистон мусулмонлари идораси Матбуот хизмати
