Сайт тест ҳолатида ишламоқда!
16 Июл, 2025   |   21 Муҳаррам, 1447

Тошкент шаҳри
Бомдод
03:24
Қуёш
05:04
Пешин
12:34
Аср
17:40
Шом
19:58
Хуфтон
21:31
Bismillah
16 Июл, 2025, 21 Муҳаррам, 1447

Ҳеч ким меҳр ва эътибордан четда қолмайди

11.12.2019   1970   2 min.
Ҳеч ким меҳр ва эътибордан четда қолмайди

Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов Самарқанд вилоятига сафарлари мобайнида ҳудуддаги ёрдамга, меҳр ва мурувватга муҳтож, жисмоний имконияти чекланган кишилар билан ҳам учрашиб, улар билан дилдан суҳбат қурдилар.
Уларнинг дард ва муаммоларига қулоқ тутиб, эҳтиёжларини қондириш учун чоралар қўлламоқда. Ана шундай хайрия тадбири доирасида Самарқанд вилоятидаги 50 нафар кам таъминланган, 30 нафар эшитиш ва гапиришида нуқсони бор шахслар, 20 нафар чин етим болалар, 10 нафар ногиронлиги бўлган шахслар, “Меҳр” инсонпарварлик операцияси билан она-Ватанига қайтарилган 2 нафар бола ҳамда авф этилган 10 нафар фуқароларга инсонпарварлик ёрдамлари кўрсатилиб, уларга “Вақф” хайрия жамоат фонди томонидан озиқ-овқат маҳсулотлари, ногиронлик аравачалари, кийим-кечак, диний-маърифий мазмундаги адабиёт ва бошқа совғалар улашилди.
Тадбир давомида кўнгли ўксик инсонларга кўрсатилган меҳр ва эътибор, уларнинг қалбига шодлик олиб кирди. Буни уларнинг кулиб турган юзлари ва завққа тўлган кўзларидан сезиб олиш қийин эмас эди.
Зеро, меҳр-мурувват, ҳамжиҳатлик, сахийлик динимиз улуғлаган, халқимиз ардоқлаган, асрлар оша амал қилиб келаётган гўзал фазилатдир. Хайр-саховат, сахийлик инсонлар ўртасида меҳр-оқибат ришталарининг мустаҳкамланишига, ўзаро ҳурмат ва тотувликнинг ортишига хизмат қилади.

 

 

Ўзбекистон мусулмонлари идораси Самарқанд вилояти вакиллиги матбуот хизмати

Ўзбекистон янгиликлари
Бошқа мақолалар

Нима учун Аллоҳга ҳамд айтишим керак?

16.07.2025   1656   2 min.
Нима учун Аллоҳга ҳамд айтишим керак?

Осмонлару ерни яратган  Зотнинг қаршисига маъсиятлар ила чиқа кўрманг, ғазабига тоқатингиз, иқобига сабрингиз ва азобига қудратингиз етмайди.

Доктор Абдул Муҳсин Аҳмад ўзининг бир қариндоши билан бўлган воқеани айтиб берди. Воқеага кўра бир йигит укасига доим “Аллоҳга ҳамд айтгин” деса, укаси: “Нима учун Аллоҳга ҳамд айтишим керак?” – дер, Яратганга бўйин эггиси келмасди.

Ахир унинг бу гапини оламлар Рабби бўлган Зот эшитиб турибди! Аллоҳ уни икки оёғи билан юрғизиб қўйибди, қанча одамлар юра олишмайди. Неча-неча инсонлар кўриш неъматидан мосуво бўлганида, унинг кўзлари кўриб турибди.

Вақт ўтиб йигит автоҳалокатга учрайди. Унинг аъзолари қаттиқ шикастланади. Операциядан сўнг доктор Абдул Муҳсин Аҳмад уни бир умр ногирон бўлиб қолганлигини, танасининг ярми ишламаслигини, аниқроғи, бир ўлимдан қолганлигини айтади.

Аллоҳ буюк! Унинг неъматлари чексиз. Биз бандалар доим шукрда бўлмоғимиз лозим. Зеро, Аллоҳ таоло айтади: «...Албатта, Унинг ушлаши аламли ва шиддатлидир»[1].

Тасаввур қилинг, борди-ю, сиз дўзахийлардан бўлсангиз, у ердаги азобга чидай оласизми?!  Албатта, йўқ.

Шундай экан Аллоҳга тавба қилинг! У Зотга хуш келмайдиган ишлардан қайтинг. Солиҳ амаллар ила Раббингизга яқинлашинг.

Аллоҳ берган неъматларга шукр қилинг. Гуноҳ ва маъсиятнинг кичиклигига қараманг. Аллоҳнинг буюклигини назарингиздан қочирманг. 

Аллоҳ буюк! У Зот сизни кутилмаганда ушламасидан аввал қалбингизни қўрқув ила тўлдиринг. Қазоингиз яқинлашмасидан аввал покланинг.  Ўлим келгандаги пушаймондан наф йўқ ва бунинг учун имкон берилмас...


Ҳассон Шамсий Пошонинг
“Жаннат бўстонидаги оилавий оқшомлар” номли китобидан
Ғиёсиддин Ҳабибуллоҳ, Илҳом Оҳунд, Абдулбосит Абдулвоҳид таржимаси.

 


[1]  Ҳуд сураси, 102-оят.