10 Январ, 2025, 10 Ражаб, 1446
10 Январ, 2025, 10 Ражаб, 1446
Машҳурлар эътирофи
Қуйида Америка, Европа ва Осиё мутафаккирларининг Ислом дини, Қуръони Карим ҳамда Пайғамбаримиз соллаллоҳу алайҳи васаллам ҳақларидаги эътирофлари билан танишасиз.
Ҳар сафар Қуръонни ўқиганимда, танам ичидаги руҳим титрайди.
Гёте,
немис ёзувчиси ва файласуфи
*****
Қуръон шариати ақл ва ҳикматга мувофиқлиги, уйғунлиги учун яқинда бутун оламда ҳукмронлик қилади.
Лев Толстой,
рус ёзувчиси
*****
Рисолатлар тарихида Муҳаммад (соллаллоҳу алайҳи васаллам) олиб келган Қуръондан бошқа ҳарфларигача тўлиқ сақланган китоб мавжуд эмас.
Майкл Ҳарт,
америкалик астрофизик
*****
Қуръон китобларнинг китобидир. Мен ҳам бу китоб ҳақида, худди ҳар бир мусулмон эътиқод қилганидек, эътиқод қиламан.
Гёте,
немис ёзувчиси ва файласуфи
*****
Астроном олим Жеймс Жинс мусулмон аллома Иноятуллоҳ Машриқийнинг إِنَّمَا يَخْشَى اللَّهَ مِنْ عِبَادِهِ الْعُلَمَاء (“Аллоҳдан бандалари ичидан фақат олимларигина қўрқарлар”) оятини тиловат қилганини эшитди-да, додлаб юборди ва: “Даҳшат! Ажойиб! Ахир бу (яъни, Аллоҳдан фақат олимлар қўрқиши) эллик йиллик изланишларим натижасида аниқлаган нарсам-ку! Муҳаммадга бу ҳақиқатнинг хабарини ким берган? Ушбу оят ростдан ҳам Қуръонда борми? Агар шундай бўладиган бўлса, унда мен гувоҳлик бераманки, албатта, Қуръон Аллоҳнинг ҳузуридан унга (Муҳаммадга) ваҳий қилинган китобдир!” деди.
*****
Аллоҳ Муҳаммад (соллаллоҳу алайҳи васаллам)ни сақлашни ваъда қилиб, وَاللّهُ يَعْصِمُكَ مِنَ النَّاسِ (“Аллоҳ сени одамлардан сақлайдир”) деганда, Пайғамбар (соллаллоҳу алайҳи васаллам) қўриқчиларини кетказиб юборган. Киши ҳеч қачон ўзининг зарарига ёлғон гапирмайди. Агар ушбу Қуръон самодан тушмаганда эди, Муҳаммад қўриқчиларини ўзи билан қолдирган бўларди.
Бартелеми-Сент-Илер,
франциялик сиёсат арбоби
*****
Қуръон Аллоҳдан эканида шубҳа йўқ! Муҳаммад (соллаллоҳу алайҳи васаллам)нинг пайғамбарлиги собитлигида ҳам шубҳа йўқ!
Доктор Эренберг,
Осло университети устози
*****
Қуръон Аллоҳнинг Каломи деган гапни қабул қилишда ҳеч қандай қийинчиликни сезмадим. Чунки, Қуръонда ҳомила сифатларининг баён этилиши еттинчи аср илм-маърифатига асосланиши мумкин эмас. Битта оқилона хулоса шуки, бу тавсифлар Аллоҳ томонидан Муҳаммадга (соллаллоҳу алайҳи васаллам) ваҳий этилгандир.
Ёшиеда Кузан,
Токио расадхонаси мудири
*****
Ҳаётимдаги энг катта воқеа шуки, мен Аллоҳнинг элчиси Муҳаммад (соллаллоҳу алайҳи васаллам)нинг ҳаётини синчковлик билан ўрганганиб чиқдим ва улуғворлик ҳамда абадийликни англадим.
Ламартин,
француз шоири
*****
Ким инсоний буюкликни Муҳаммад (соллаллоҳу алайҳи васаллам) англагандек англади?! Қайси инсон у зот етган комиллик мартабасига ета олди?! Пайғамбар (соллаллоҳу алайҳи васаллам) Холиқ билан махлуқ ўртасида воситачи қилиб олинган ботил эътиқодларни йўқ қилди.
Ламартин,
француз шоири
*****
Мен тарихдан инсоният учун идеал шахсни изладим ва уни араб миллатига мансуб Пайғамбар Муҳаммад соллаллоҳу алайҳи васаллам шахсиятида топдим.
Гёте,
немис ёзувчиси ва файласуфи
*****
Гёте етмиш ёшга чиққанда Пайғамбар Муҳаммад соллаллоҳу алайҳи васалламга Қуръони Карим нозил қилинган ўша муқаддас кеча (Қадр кечаси)ни хушуъ билан нишонлашга азму қарор қилганини атрофидагиларга эълон қилди.
*****
Албатта, Муҳаммад (соллаллоҳу алайҳи васаллам) дунё буюкларининг буюгидир. У олиб келган Дин энг комил диндир!
Форис Хурий,
суриялик сиёсатчи
*****
Албатта, Муҳаммад (соллаллоҳу алайҳи васаллам) бутун оламни ёритган юлдуздир.
Томас Карлейл,
британиялик ёзувчи
*****
Ислом Пайғамбарининг (соллаллоҳу алайҳи васаллам) ҳаётини диққат билан такрор-такрор ўқидим. Унда фақат (ҳар бир инсонга зарур бўлган) хулқни кўрдим. Ислом бутун оламнинг йўли бўлишини қанчалар орзу қилдим!
Томас Карлейл,
британиялик ёзувчи
*****
Тўплаб, таржима қилувчи Нозимжон Ҳошимжон
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Оиша онамиз розияллоҳу анҳонинг барча сифатлари ҳам камолот сифатларига дахлдор эканига шубҳа бўлиши мумкин эмас. У кишининг буюк ҳаётларини диққат билан ўрганган уламолар Оиша онамиз розияллоҳу анҳода бошқаларда бўлмаган қирқта комилалик сифатлари бор эканини таъкидлайдилар. Ана шунинг учун ҳам бу ҳақда бир-икки оғиз сўз айтмоқни раво кўрдик.
Оиша онамиз розияллоҳу анҳонинг камолот сифатлари ҳақида сўз юритар эканмиз, бу сифатлар рўйхатининг бошида Расулуллоҳ соллаллоҳу алайҳи васалламдан ворид бўлган ҳадиси шарифлар туришини айтиб ўтмоғимиз лозим. У зот Оиша онамиз розияллоҳу анҳо ҳақларида ажойиб мадҳларни айтганлар.
Оиша розияллоҳу анҳодан ривоят қилинади. Расулуллоҳ соллаллоҳу алайҳи васаллам: «Эй Оиша! Мана бу Жаброил, у сенга салом айтмоқда», дедилар.
«Ва алайҳиссалому ва роҳматуллоҳи ва барокатуҳу! Эй Аллоҳнинг Расули, сиз мен кўрмаган нарсани кўрасиз», дедим».
Жаброил алайҳиссалом бу дунёда пайғамбарлардан бошқа кимга салом айтганлар?
Жаброил алайҳиссалом бу дунёда пайғамбарлардан бошқа биргина инсонга – Оиша онамиз розияллоҳу анҳога салом айтганлар.
Мана шу улуғ мақомнинг ўзи бир оламга татийди.
Абу Мусо розияллоҳу анҳудан ривоят қилинади:
Набий соллаллоҳу алайҳи васаллам:
«Эркаклардан кўпчилик баркамол бўлдилар. Аёллардан Марям Имрон қизи ва Фиръавннинг аёли Осиёдан бошқаси баркамол бўлмади.
Оишанинг бошқа аёллардан устунлиги сарийднинг бошқа таомлардан устунлигига ўхшайдир», дедилар».
Иккисини Бухорий, Муслим ва Термизий ривоят қилганлар.
Ушбу ҳадиси шарифда аслида аёлларнинг, хусусан, Марям онамиз, Осиё онамиз ва Оиша онамизнинг бошқа аёллардан устун бўлган фазллари ҳақида сўз боради.
«Эркаклардан кўпчилик баркамол бўлдилар».
Эркаклардан баркамол бўлганлар рўйхатининг аввалида Пайғамбар алайҳиссаломлар турадилар. Улардан бошқа баркамол эркаклар ҳам бор. Бу ҳақиқат ҳаммага маълум.
«Аёллардан Марям Имрон қизи ва Фиръавннинг аёли Осиёдан бошқаси баркамол бўлмади».
Бу икки улуғ зотнинг баркамол бўлганликлари Қуръони каримда уларнинг биргаликда, хос зикр қилинишларидан ҳам билиб олинади.
Аллоҳ таоло «Таҳрим» сурасида:
«Аллоҳ иймон келтирганларга Фиръавннинг хотинини мисол қилиб келтирди. Ўшанда у: «Роббим! Менга Ўз ҳузурингда, жаннатда бир уй бино қилгин. Менга Фиръавндан ва унинг ишидан нажот бергин ва менга золим қавмдан нажот бергин», деб айтди», деган (11-оят).
Фиръавннинг хотини ўша пайтдаги энг катта подшоҳнинг аёли эди. Емак-киймакда тўкин эди. Нимани хоҳласа, шуни қилиши мумкин эди. Қасрларда, турли неъматлар ичида фароғатда яшашига қарамасдан, у кофир ва золим эрига ҳамда қавмига қарши чиқди. Аллоҳга иймон келтирди. Аллоҳдан жаннатда уй қуриб беришини сўради. Бу ҳол эса дунё ҳою ҳавасидан устун келишнинг олий мисолидир.
Мўминларнинг иккинчи мисоли Марям бинти Имрондир.
«Ва фаржини пок сақлаган Имрон қизи Марямни (мисол келтирди). Бас, унга Ўз руҳимиздан пуфладик ва У Роббининг сўзларини ҳамда китобларини тасдиқ қилди ва итоаткорлардан бўлди» (12-оят).
Имроннинг қизи Марям Аллоҳга соф эътиқодда бўлганлар ва ўзларини ҳам соф тутганлар. Яҳудийлар туҳмат қилганларидек, нопок бўлмаганлар. Аллоҳ таоло Жаброил фаришта орқали ана шу пок жасадга ўз руҳидан «пуф» дейиши билан Ийсо алайҳиссаломни ато қилган.
«Оишанинг бошқа аёллардан устунлиги сарийднинг бошқа таомлардан устунлигига ўхшайдир».
Энди Пайғамбар соллаллоҳу алайҳи васалламнинг завжаи мутоҳҳаралари – Оиша онамизнинг фазллари ҳақида сўз кетмоқда. Пайғамбар соллаллоҳу алайҳи васаллам у кишининг бошқа аёллардан фазлларини сарийд деб номланадиган таомнинг ўша вақтдаги бошқа таомлардан устунлигига ўхшатмоқдалар.
Ўша пайтда Пайғамбар соллаллоҳу алайҳи васаллам ва саҳобаи киромлар яшаб турган жамиятнинг шароити ва таомилига кўра, сарийд бошқа таомлардан афзал таом ҳисобланар эди.
Худди шунга ўхшаб, Оиша онамиз ҳам бошқа аёллардан афзал эдилар.
Бу дунёда ким ушбу мақомга сазовор бўлибди?!
Ушбу мақомга бу дунёда фақат Оиша онамиз розияллоҳу анҳо сазовор бўлдилар.
Термизий ва Бухорий Амр ибн Ос розияллоҳу анҳудан ривоят қиладилар:
«Набий соллаллоҳу алайҳи васаллам мени Зотус-Салосил аскарига бошлиқ қилдилар. Қайтиб келганда:
«Эй Аллоҳнинг Расули, одамларнинг қайсиниси сиз учун энг маҳбубдир?» дедим.
«Оиша», дедилар.
«Эркаклардан-чи?» дедим.
«Унинг отаси», дедилар.
«Сўнгра ким?» дедим.
«Сўнгра Умар», дедилар ва бир неча одамларни санадилар. Бас, мени охирларида қилиб қўймасинлар, деб, сукут сақладим».
Аллоҳнинг Расули учун одамларнинг қайсиниси энг маҳбуб экан?
Аллоҳнинг Расули учун одамлар ичида Оиша онамиз розияллоҳу анҳо энг маҳбуб эканлар.
Бу дунёда ким ушбу мақомга сазовор бўлибди?
Ушбу мақомга бу дунёда Оиша онамиз розияллоҳу анҳо сазовор бўлибдилар.
Имом Абу Яъло «Муснад»ларида Оиша онамиз розияллоҳу анҳодан ривоят қиладилар:
«Менга ҳеч бир аёлга берилмаган тўққиз нарса берилган:
– Расулуллоҳ соллаллоҳу алайҳи васаллам менга уйланишга амр қилинганларида Жаброил алайҳиссалом суратимни олиб тушиб, у зотга кўрсатган.
– У зот менга бокира ҳолимда уйланганлар. Мендан бошқага бокира ҳолида уйланмаганлар.
– Расулуллоҳ соллаллоҳу алайҳи васаллам бошлари менинг қучоғимда турган ҳолда вафот этдилар.
– Расулуллоҳ соллаллоҳу алайҳи васаллам менинг уйимда дафн қилиндилар.
– Фаришталар менинг уйимни ўраб олган эдилар. У зотга мен у кишининг кўрпаларида турганимда ваҳий нозил бўлар эди. У зот мени ўзларидан узоқлаштирмас эдилар.
– Мен у зотнинг халифалари ва сиддиқларининг қизиман.
– Менинг оқловим осмондан нозил бўлган.
– Мен покнинг ҳузурида пок яратилганман.
– Менга мағфират ва карамли ризқ ваъда қилинган».
Имом Қуртубий ўз тафсирларида Оиша онамиз розияллоҳу анҳонинг камолот сифатлари ҳақида сўз юритар эканлар, жумладан, қуйидагиларни айтганлар:
«Баъзи аҳли таҳқиқлар айтурлар:
«Юсуф алайҳиссалом фаҳш ишда туҳмат қилинганида Аллоҳ у кишини бешикдаги гўдакнинг тили билан оқлади.
Марям фоҳишаликда туҳмат қилинганида Аллоҳ у кишини ўғиллари Ийсо алайҳиссаломнинг тили билан оқлади.
Оиша фаҳш ишда туҳмат қилинганида Аллоҳ у кишини Қуръон билан оқлади. Аллоҳ у киши учун гўдакнинг оқлашини ёки набийнинг оқлашини раво кўрмади. Аллоҳ у кишини туҳматдан Ўз каломи ила оқлади».
Аллоҳ таоло бу дунёда кимни туҳматдан Ўз каломи ила оқлабди?
Аллоҳ таоло бу дунёда фақат Оиша онамиз розияллоҳу анҳони туҳматдан Ўз каломи ила оқлаган.
"Нубувват хонадони хонимлари" китобидан.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 