«Иймон» китоби қорақалпоқ тилига таржима қилинди
Маълумки, Шайх Муҳаммад Содиқ Муҳаммад Юсуф раҳимаҳуллоҳнинг китоблари ҳаётлик чоғларидаёқ бошқа тилларга таржима қилина бошланган эди. Бу хайрли иш ҳамон давом этмоқда. Шундай таржималардан бири «Иймон» китобининг қорақалпоқ тилига таржимаси бўлди.
Ушбу китоб Шайх ҳазратларининг дастлабки китобларидан бири бўлиб, 1991 йилда илк бор нашр этилган эди. Кейинчалик китоб қайта-қайта нашр этилди. Айни кунларда унинг қорақалпоқ тилига таржимаси чоп этилмоқда. Шуни ҳам эслатиб ўтиш жоизки, ушбу китоб муаллифнинг ҳаётлик чоғида рус тилига таржима қилиниб, чоп этилган.
Китобнинг қорақалпоқ тилидаги таржимаси эса, тез орада сотувга чиқарилиши кутилмоқда.
Китоб сотувга қўйилгач Ўзбекистон бўйлаб барча филиалларидан ва интернет орқали kitoblardunyosi.uz сайтидан онлайн тарзда харид қилишингиз мумкин.
Ўзбекистон мусулмонлари идораси Матбуот хизмати
Олдинги сафдаги намозхоннинг белига сажда қилиш мумкинми?
Савол: Биз томонларда қаттиқ ёмғир ёғиб, Жума ва икки ҳайит намозларида одамлар ташқарида намоз ўқий олмай, масжид ичига тиқилиб кетади. Суннатни алмашиб ўқиб олишади, аммо фарз намозда бунинг имкони йўқ-ку. Бу ҳолатда қандай йўл тутилади?
Жавоб: Бисмиллаҳир Роҳманир Роҳийм. Бу каби узрли ҳолларда яъни саволда зикр қилинганидек, Жума ва икки ҳайит намозларида орқадагилар олдинги сафдаги намозхонларнинг белларига сажда қилиб, намозни адо этсалар бўлади.
Бунинг кайфияти шундай: Аввалги сафдагилар одатдагидек руку ва сажда қиладилар. Уларнинг орқасидагилар эса, рукуда имкон қадар эгиладилар, сўнг саждада олдинги сафдаги одамларнинг орқа белларига бошларини қўйиб, сажда қиладилар. Фарзни шундай ўқисалар, суннатларни саволда айтилгандек алмашиб ўқиб олаверадилар. Чунки белга сажда қилиш зарурат туфайли жоиз бўлади. Суннат намозни ўқишда эса, бундай зарурат бўлмайди.
Бундан ташқари, бу каби узрли ҳолатларда олдиндаги одамнинг оёқлари устига ёки ўзининг сонига ҳам сажда қилиш мумкин. Валлоҳу аълам.
Ўзбекистон мусулмонлари идораси
Фатво маркази.