Масжидлар Аллоҳ таолонинг ердаги уйларидир. Уни обод этиш ҳар бир мусулмон учун улкан ажру савобдир. Масжид қурилган жойда қут-барака бўлади.
Жорий йилнинг 16 июль куни Тошкент вилояти Қибрай туманидаги "Чинобод" маҳалласида фаолият юритиб келаётган "Машариб ота" жомеъ масжидининг эски, яроқсиз ҳолга келиб қолган биноси ўрнида, замонавий, намозхонларга ҳар томонлама қулай ва барча шароитларга эга қилиб янгидан қурилиши учун биринчи ғишт қўйиш маросими бўлиб ўтди.
Маросимда Тошкент вилояти бош имом-хатиби Хайруллоҳ домла Турматов, туман имомлари, маҳалла оқсоқоллари ва фаоллари иштирок этди. Илк ғишни қўйиб берган Хайруллоҳ домла Турматов йиғилганларга юртимизда дин ривожи йўлида амалга оширилаётган ислоҳотлар ва мусулмонларга ибодат қилишлари учун ташкил этилаётган шароитлар ҳақида тўхталар эканлар, бу айниқса кўркам ва замонавий тарзда қайта қурилаётган масжидларда айниқса намоён бўлаётганини таъкидладилар. Бу, ўз навбатида, юртдошларимиз қалбига шодлик улашиб, неъматга шукроналик ҳиссини зиёда қилаётганини баён қилдилар.
Ўзбекистон мусулмонлари идораси Матбуот хизмати
IQNA сайти хабарига кўра, Мисрдаги машҳур “Қуръон карим” радиоэшиттириши раҳбари Исмоил Дувайдар узоқ танаффусдан сўнг машҳур “Мусҳаф муаллим” дастури яна эфирга қайтганини маълум қилди. Дастур ҳар куни маҳаллий вақт билан соат 09:45 да эфирга узатилади. Уни Саъд ал-Мутъаний олиб боради.
Ушбу дастур Қуръон каримни янги ўрганаётган ва ёд олишни истаган кишилар учун мўлжалланган бўлиб, унда тажвид қоидаларига мувофиқ тўғри талаффуз ўргатилади. Дастурда Шайх Маҳмуд Халил Ҳусарийнинг тиловатлари асос қилиб олинган.
Шунингдек, Қуръон карим радиоэшиттириши Миср Вақфлар вазирлиги билан ҳамкорликда ҳар куни диний танлов ҳам ўтказмоқда. Ғолиблардан икки нафарига 2 500 миср фунти миқдорида мукофот берилади. Тингловчиларнинг саволига жавобни (сура ва оят рақами) вазирликнинг “Facebook” саҳифасидаги махсус ҳавола орқали юборишлари лозим.
Исмоил Дувайдар таъкидлашича, радиоэшиттириш ҳозирда Мисрнинг етук қори ва машҳур уламолари марҳум шайх Абдуфаттоҳ Шаъшаъийнинг илгари эфирга узатилмаган ноёб тиловатларини ҳам тақдим этмоқда. Бу тиловатларни шайхнинг оиласи радиоэшиттиришга совға қилган.
Шунингдек, шайх Мустафо Исмоилнинг набираси томонидан берилган 18 та ноёб тиловат ҳам ушбу бой жамғармага қўшилди. Шу билан бирга, Шайх Муҳаммад Рифъат, Шайх Абдулбосит Абдуссомад ва Шайх Муҳаммад Табловий каби машҳур етук қориларнинг тиловатлари ҳам эфирда янграмоқда.
Илёсхон Аҳмедов,
тайёрлади.