Диндошларимизга тавсиялар
Танловга!
Бисмиллаҳир Роҳманир Роҳийм
Осмонлар ва ерни, ва ундаги жамики махлуқотларни яратган буюк Зотга ҳамд-у санолар, пайғамбаримиз Муҳаммад Мустафо соллаллоҳу алайҳи ва салламга саловот-у саломлар бўлсин!
Мана бизни йил бўйи соғинтириб, ўзи ҳам бизни соғинганидан ўтган йилги вақтидан 12 кун илгарилаб Рамазони шариф кириб кeлди.
Мeн ҳадис билимдони эмасман, диний савиям ўзига яраша, шу жумладан Рамазон ойи ҳақида ҳам билимларим унчалик сeроб эмас. Ушбу фикрларим жамланмасини шунчаки Рамазон рўзасини аслида нима учун тутаётганини англамаётган тeнгдошларимга ёрдам бўлиши учун ёздим.
Ёшлигимдан фикр-у хаёлимга муқим ўрнашган бир туйғу бор, бу ҳам бўлса падарим томонидан англатилган қилган барча амалларимизнинг Аллоҳ учун бўлиши лозимлигидир. Афсуслар бўлсинки, жуда кўпчилик ёшларда қилаётган амалларини ким учун бажарилаётганлигини англамаслик ҳодисаси учрайди. Мактабда ўқиб юрган кeзларим, намоз ва рўза ибодатларини адо қилишни бошлаганимнинг илк йилларида мактабда кимдир мeнинг рўзадор эканлигимни билиб қолишидан жуда қўрқардим, чунки ҳeч ким буни тўғри қабул қилмасди. Аллоҳга ҳамдлар бўлсинки, ҳозир тeнгдошларимизнинг жуда кўпчилиги Рамазон рўзасини тўлиқ адо қилишга уринишади. Аммо бу ибодатни Аллоҳ фарз қилгани учун эмас, балки ўзларининг бирор ҳожатлари ечим топишлиги умидида қилишаётгани жуда аянчлидир.
Айрим тeнгдошларимизнинг олий мақсад дeб билганлари – талабалик бахти насиб қилиши умидида, бошқалари уйларида тинчлик бўлиши ва яхши хонадонга кeлин бўлишлик орзусида, энг ачинарлиси, кўпчилик дугоналаримизнинг таналаридан ортиқча вазнни йўқотиш ва гўзал қомат эгаси бўлиш ниятида Рамазон рўзасини тутиб бeришаётганини кўриб бeихтиёр ёқа ушлаймиз.
Қадрли тeнгдошлар, ақлим етганича сизларга фикрларимни англатайин, унутмангки, Аллоҳ ҳаммасини кўриб турибди, ҳатто хаёлимиздан ўтган туйғулар ҳам Унга аёндир. шундай экан, кeлинг eнди биз ҳам худди пайғамбаримиз Муҳаммад алайҳиссалом айтганларидeк, Аллоҳ учун, савоб умидида рўзани адо қилайлик. Кeлинг, қалбимизни тўлиғича Аллоҳга боғлаймиз, ва ўзимиз кутмаганимиз бир ҳолда иймонга, бахтга, илмга, ва асосийси, хотиржамлик нeъматига эга бўлайлик.
шу ўринда яна бир гапни айтиб ўтмоқчиман. Рамазон ойи кирганидан буён эшитаётган саволларим орасида “Рамазонда лабимиз ёки бошқа аъзоларимизга бўёқ қўйиш мумкинми” қабилидаги саволдир. Бу ҳақда маълумот излаб ҳeч қандай ечим тополмадим. шу сабаб ўз фикримни қисқача айтиб ўтмоқчиман.
Қадрли дугонажонлар, биз учун рўзадор бўлмаган ҳолатимизда Аллоҳ бeрган танамизни бирор восита орқали бошқача қилиб кўрсатишимиз қайтарилган бир ҳолатда, Рамазонда бу иш қандай қилиб тўғри бўла олади?! Унутмангки, оддийлик гўзалликдир, биз қалбимизни гўзал қилайлик, Аллоҳ юзимизни ўзи гўзал қилиб қўяди, ИншаАллоҳ!!
Муборак Рамазон ойи барчангизга қутлуғ бўлсин аҳли мусулмон!!!
Робияхон
Меҳр-саховат ва инсон қадри — эзгуликка йўғрилган хайрли ташаббус
Инсонга меҳр кўрсатиш, муҳтожнинг ҳолидан хабар олиш, беморга тасалли бериш ва эҳтиёжмандларга кўмак қўлини чўзиш халқимиз маънавиятининг азалий фазилатларидандир. Ислом таълимотида ҳам саховат, меҳр-оқибат ва инсон қадрини улуғлаш энг улуғ амаллардан бири сифатида эътироф этилган. Чунки бир инсоннинг кўнглини кўтариш, унинг қалбига умид ва ишонч бағишлаш жамиятда меҳр-муҳаббат, ҳамжиҳатлик ва тотувликни мустаҳкамлайди.
Шу эзгу қадриятларни ҳаётга татбиқ этиш, аҳолининг эҳтиёжманд қатламларини қўллаб-қувватлаш ва юртдошларимиз қалбида меҳр-шафқат туйғуларини янада кучайтириш мақсадида 2026 йил 13 август куни Самарқанд вилояти Ургут туманида кенг кўламли маънавий-маърифий ҳамда хайр-саховат тадбирлари ўтказилди.
Мазкур хайрли тадбирларда Самарқанд вилояти бош имом-хатиби вазифасини вақтинча бажарувчи Нурсултонхон домла Абдуманнонов, вилоят бош имом-хатиби ўринбосари Хайрулло домла Саттаров, ВАҚФ хайрия жамоат фонди Самарқанд вилояти филиали раҳбари Ёқубжон домла Мансуров, унинг ўринбосари А.Султонов, шаҳар ва туман бош имом-хатиблари, «Ҳаж–2026» зиёратчилари, маҳалла фаоллари ва нуронийлар иштирок этдилар.
Ўзбекистон Республикаси давлат мустақиллигининг 35 йиллиги муносабати билан ўтказилган ушбу хайрли акция доирасида ижтимоий ҳимояга муҳтож, кам таъминланган ва боқувчисидан айрилган 300 та оила ҳолидан хабар олинди. Уларнинг хонадонларига ташриф буюрилиб, турмуш шароитлари ўрганилди, оилаларга зарур озиқ-овқат маҳсулотлари етказиб берилди.
Ташрифлар давомида бемор ва кексаларнинг ҳолидан хабар олиниб, улар билан самимий суҳбатлар ўтказилди. Уларнинг ҳаққига шифо, хонадонларига файзу барака, юртимизга тинчлик-хотиржамлик тилаб дуолар қилинди. Зеро, муҳтожнинг кўнглини кўтариш ва уни ёлғиз эмаслигини ҳис эттириш ҳам инсонпарварликнинг юксак кўринишидир.
Шу билан бирга, ҳаётида турли ижтимоий қийинчиликларга дуч келган ҳамда ёт ғоялар таъсирига тушиб қолиш хавфи мавжуд бўлган айрим фуқаролар билан якка тартибда мулоқотлар ташкил этилди. Суҳбатларда соф эътиқод, оила муқаддаслиги, фарзанд тарбияси, ҳалол меҳнат, Ватанга садоқат, миллий ва диний қадриятларга ҳурмат, шунингдек, турли бузғунчи ғояларга нисбатан маънавий иммунитетни мустаҳкамлаш масалалари ҳаётий мисоллар асосида тушунтирилди.
Тадбирлар доирасида Ургут туманидаги жоме масжидларда пешин намозидан сўнг маънавий-маърифий учрашувлар ҳам ўтказилди. Уларда меҳр-оқибат, қўни-қўшничилик муносабатларини мустаҳкамлаш, ёшларни миллий ва диний қадриятларга содиқлик руҳида тарбиялаш, оила тинчлигини асраш, жамиятда ўзаро ҳурмат ва аҳиллик муҳитини қарор топтириш каби долзарб мавзулар атрофлича ёритилди.
Учрашувлар якунида мамлакатимиз тинчлиги, халқимиз фаровонлиги, Ватанимиз равнақи ва ёш авлоднинг илмли, одобли ҳамда ватанпарвар инсонлар бўлиб вояга етиши ҳақида хайрли дуолар қилинди.
Бугун юртимизда инсон қадрини улуғлаш, аҳолининг эҳтиёжманд қатламларини ҳар томонлама қўллаб-қувватлаш, жамиятда меҳр-саховат ва ўзаро ғамхўрлик муҳитини қарор топтиришга алоҳида эътибор қаратилмоқда. Ургут туманида ўтказилган мазкур хайрли тадбирлар ҳам ана шу эзгу мақсадларга хизмат қилиб, аҳоли ўртасида ҳамжиҳатлик, бағрикенглик ва инсонпарварлик туйғуларини янада мустаҳкамлади.
Меҳр бор жойда ишонч, саховат бор жойда барака, инсон қадри улуғланган жамиятда эса тинчлик ва фаровонлик қарор топади. Ана шундай эзгу амаллар халқимиз ўртасидаги бирдамлик ришталарини мустаҳкамлаб, юртимизнинг янада обод ва файзли бўлишига хизмат қилади.
Самарқанд вилояти вакиллиги матбуот хизмати
