05 Май, 2025, 7 Зулқаъда, 1446
05 Май, 2025, 7 Зулқаъда, 1446
Мамлакат Туризм вазирлиги саккизта янги давлатга: Озарбайжон, Aлбания, Ўзбекистон, Жанубий Aфрика, Грузия, Тожикистон, Қирғизистон ва Малдив оролларига “электрон низом” асосида зиёрат визаси бериш бўйича янги қадам ташлади. Мазкур давлат фуқаролари қиролликдаги халқаро портлардан бирига етиб келган вақтда Қиролликка электрон шаклдаги зиёрат визаси учун талабнома билан мурожаат этишлари мумкин бўлади.
Ушбу қадам Қиролликнинг сайёҳлик стратегияси ва туризм секторининг 2030 йилга мўлжалланган мақсадларига мос келади. Бу соҳанинг ялпи ички маҳсулотдаги ҳиссасини 3 фоиздан 10 фоизга ошириш, мамлакат фуқароларини бир миллион қўшимча иш ўринлари билан таъминлаш ва 2030 йилгача 100 миллион сайёҳни жалб қилишни ўз ичига олади.
Ташриф визаси шахсларга Подшоҳликнинг турли ҳудудларига ташриф буюриш ва умра маросимларини бажариш имконини беради.
Саудия Арабистони Туризм вазири Aҳмад бин Aқил ал-Хатиб томонидан чиқарилган низомда сайёҳлар ушбу тартиб ва қоидаларга риоя қилишлари шарт экани, улар Қиролликда бўлганларида, ўз шахсини тасдиқловчи ҳужжатларни доимо ўзи билан бирга олиб юришлари маълум қилинган.
Вазирлик зиёрат визаси ҳаж зиёратига рухсат бермаслигини, шунингдек, Ҳаж мавсумида Умра зиёратини амалга оширишга имкон бермаслигини таъкидлади. Бу эса Подшоҳликнинг дунё билан халқаро муносабати ва мулоқотини ривожлантириш ҳамда иқтисодиётни такомиллаштиришга қаратилган саъй-ҳаракатлар асосий мақсадлар замирида эканига далолат қилади.
Туризм вазирлиги Қиролликда туризм соҳаси инфратузилмасини изчил ривожлантириш ва кенгайтириш билан бир вақтда қўшимча мамлакатлар ва ҳудудларни қамраб олиш учун электрон зиёрат визаси тизимини янада кенгайтириш ниятида эканини маълум қилди.
Ўзбекистон мусулмонлари идораси ходими
И.Аҳмедов тайёрлади
Ҳар бир тарихий обида – халқимиз тарихи ва маданиятининг гувоҳи. Мирзачўл ҳудудида жойлашган “Ёғочли сардоба” ҳам ана шундай ноёб ёдгорликлардан бўлиб, унинг меъморий тузилиши ва муҳандислик ечими ўз даврининг илғор билимларига таянилганини кўрсатади.
– Сардобанинг гумбазсимон тузилиши, 15 метрлик ички диаметри ва 12 метр баландлиги уни нафақат амалиётда самарали, балки архитектура жиҳатдан ҳам ўзига хос намуна сифатида намоён этади. Ердан икки метр баландликдаги туйнуклар, салқинликни сақловчи вентиляция тизими, симметрияли қурилиши ва девор қалинлигининг юқорига кўтарилган сари юпқалашиб бориши – буларнинг барчаси сардобанинг бетакрорлигигидан далолат беради,– дейди тарихчи-археолог Солижон Қудратов.
Сардобага арксимон кириш қисми орқали ғиштли зинапоялардан фойдаланиб тушилади. Кириш қисмидаги йўлакча устидан эса хизматчилар учун махсус хоналарга чиқиш мумкин бўлган айланма зинапоя қурилган.
Сўнгги йилларда мамлакатимизда туризмни ривожлантиришга алоҳида эътибор қаратилаётган бир пайтда “Ёғочли сардоба” ҳам қайта тиклаш ишлари доирасида ўрганилмоқда. Баъзи реконструкция ишлари бошланган бўлса-да, маълум техник ва молиявий сабабларга кўра, қурилиш вақтинча тўхтаб қолган.
– Энди бу масканни тўлиқ таъмирлаб, туристик маршрутларга қўшиш, атрофида дам олиш масканлари, сув йўллари, маҳаллий ҳунармандчилик объектларини ривожлантириш режалаштирилган. Бунда давлат-хусусий шериклик асосида ёш тадбиркорларни ҳам жалб этиш кўзда тутилмоқда, – дейди Сирдарё вилоят ҳокимининг ўринбосари Шоҳруҳ Исоқулов.
“Тошкент – Самарқанд – Бухоро” магистраль йўли бўйлаб жойлашган “Ёғочли сардоба” ҳозирнинг ўзидаёқ саёҳатчилар диққатини ўзига тортмоқда. Шу боис, яқин истиқболда бу иншоот нафақат тарихий ёдгорлик, балки маданий-маърифий тадбирлар ўтказиладиган, маҳаллий ва халқаро туризмни қўллаб-қувватлайдиган муҳим марказга айланиши, шубҳасиз.
Ғулом Примов, ЎзА мухбири
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 