Ҳадис илми мактабига нодир китоблар совға қилинди
Ўтган куни, китоб мутолааси орқали ёшлар таълим-тарбиясини яхшилаш ва илм-маърифатини оширишга оид ташаббусга мос равишда Ўзбекистон мусулмонлари идораси бўлим мудирлари Муҳаммад Аюбхон Ҳомидов ва Камолиддин Маҳкамов Самарқанд вилоятидаги олий диний таълим муассасаси ҳисобланган – Ҳадис илми мактабига ўзларининг шахсий кутубхоналаридан энг нодир ва ноёб асарларни совға қилдилар.
Тақдим этилган китоблар орасидаги Абу Лайс Самарқандийнинг “Тафсиру Самарқандий”, Имом Моликнинг “Муватто”, Бадруддин Айнийнинг “Ал-Баная Шарҳул Ҳидоя”, Мулла Али Қорийнинг “Фатҳу бабил Иноя” ва Ибн Манзур Мисрийнинг “Лисанул Араб” номли асарлар талабалар учун муҳим қўлланма бўлади, иншо Аллоҳ.
Муҳаммад Аюбхон Ҳомидов илму маърифатли инсон бўлиш учун, аввало, пухта билим олиш зарурлиги, кўп китоб мутолаа қилиш муҳимлигини айтиб, китоб ва унинг мутолаасининг фойдалари ҳақида сўзлади.
Забардаст уламолар ва мутафаккирлар китобга шу қадар меҳр қўйган эдиларки, ҳатто тунлари шам ёруғида бўлса ҳам китоб мутолаа қилганлар. Буюк муҳаддис Имом ал-Бухорий ҳазратлари 12 ёшларида Қуръони каримни ёд олганлар, умрлари давомида олти мингдан зиёд ҳадисни ҳифз қилганлар. Мутафаккир Алишер Навоий ҳазратлари эса 7 ёшида Фаридиддин Атторнинг «Мантиқут-тайр» асарини ёд билган.
Сўзимизни Абдураҳмон Жомийнинг қуйидаги тўртлиги билан якунлаймиз.
Китобдан яхшироқ дўст йўқ жаҳонда
Ғамхўринг бўлгай у ғамгин замонда.
У билан қол танҳо ҳеч бермас озор,
Жонингга юз роҳат беради такрор.
ЎМИ Матбуот хизмати
Покистон ОАВ: Ўзбекистон Ислом цивилизацияси меросини тиклашда муҳим ташаббускор бўлмоқда
Покистоннинг “Diplomatic News Agency”, “Islamabad Post”, “News Network Pakistan”, “The World News”, “Infora News” нашрларида Ўзбекистонда бўлиб ўтган I Халқаро Ислом цивилизацияси форуми ҳақида туркум мақолалар эълон қилинди, деб хабар бермоқда “Дунё” АА.
Покистон матбуотининг ёзишича, мазкур форум тинчлик, бағрикенглик, маърифат, маданиятлараро ва динлараро мулоқот тамойиллари асосида ташкил этилган. Ушбу йирик тадбирда Ўзбекистоннинг бутун минтақа, ислом ва жаҳон цивилизациясининг шаклланиши ҳамда тараққиётига қўшган ҳиссаси эътироф этилган ҳолда махсус декларация қабул қилинган.
Мазкур декларацияда Ўзбекистон Президентига чуқур миннатдорлик изҳор этилгани, Ўзбекистон етакчиси томонидан 2017 йилда БМТ Бош Ассамблеясининг 72-сессиясида илгари сурилган ташаббуснинг бугунги жамият учун беқиёс аҳамияти эътироф этилган. Ушбу ташаббус ислом цивилизациясининг бой инсонпарварлик меросини қайта тиклаш, илмий жиҳатдан ўрганиш ва кенг тарғиб этишга қаратилган.
Шу билан бирга, мақолада форум иштирокчилари бир овоздан Ўзбекистонда Ислом цивилизацияси марказининг ташкил этилгани, унинг самарали фаолияти йўлга қўйилгани ва Биринчи Халқаро Ислом цивилизацияси форумининг ўтказилиши мазкур ташаббуснинг амалий ифодаси эканини тасдиқлагани қайд этилган. Бу саъй-ҳаракатлар мусулмон умматининг бебаҳо меросини ўрганиш, асраб-авайлаш ва кенг тарғиб қилиш борасида халқаро ҳамкорликнинг янги даврига асос солгани шубҳасиз.
Декларацияда ислом цивилизацияси меросини ўрганиш, сақлаш ва кенг тарғиб қилиш, халқаро ҳамкорликнинг янги тизимини шакллантириш мақсад қилиб белгиланган. Шу билан бирга, ислом оламидаги нуфузли ташкилотлар ва глобал ташаббусларнинг алоҳида ўрин тутиши қайд этилган.
Ўзбекистон мусулмонлар идораси Матбуот хизмати
