Малайзия Ислом университети Ўзбекистон ОТМлари билан ҳамкорлик қилади
Ташқи ишлар вазирлиги хабар беришича 2019 йилнинг 4 март куни Малайзия Ислом илмий университети (USIM) раҳбарияти ва профессор-ўқитувчилари билан Ўзбекистон делегацияси ўртасида учрашув бўлиб ўтган.
Ушбу таълим муассасасига 1998 йилда асос солинган бўлиб, Малайзия Ислом илмий университетида 32 йўналишда таълим берилади. Бугунги кунда бу даргоҳда 15 минг талаба таҳсил олади.
Учрашув чоғида USIM ва мамлакатимиз таълим муассасалари ўртасидаги муносабатларни ривожлантириш истиқболлари муҳокама қилинди ҳамда бу каби ҳамкорликнинг самарадорлиги алоҳида таъкидланди. Сўнгги ярим йил ичида USIM билан Урганч давлат университети ва Самарқанд давлат архитектура-қурилиш институти ўртасида тадқиқотларни биргаликда ўтказиш соҳасида, мутахассисларни тайёрлаш ва уларнинг малакасини ошириш, талабаларни алмашиш бўйича ҳамкорлик тўғрисидаги шерикчилик битимлари имзоланди. Шунингдек, Малайзия университети Ўзбекистон миллий университети ва Бухоро давлат университети билан ҳам ҳамкорлик алоқаларини ўрнатган.
Натижада жорий йилнинг январь ойидан Ўзбекистон Халқаро ислом академияси ва Урганч давлат университетида Ислом илмий университети етакчи профессорларининг Ислом ҳуқуқи ва банкинг, туризм, менежмент, АКТ ва бошқа йўналишлар бўйича лекциялари ташкил этилди.
Олий таълим муассасалари ўртасидаги ҳамкорликни чуқурлаштириш ва “visiting professors” шаклидаги амалиётни давом эттириш мақсадида университетнинг инженерия ва қурилиш факультети деканини Тошкент архитектура-қурилиш институтида мустаҳкам архитектура мавзусида лекциялар курсини ўтказиши учун 2019 йил 27 мартдан 11 апрелгача Ўзбекистонга юбориш тўғрисида келишувга эришилди.
Ўзбекистон мусулмонлар идораси Матбуот хизмати
Сирдарёда имом-хатиблар ўртасида стол тенниси турнири ўтказилди
#xabar #Sirdaryo #sport
Ўзбекистон Республикаси давлат мустақиллигининг 35 йиллиги муносабати билан Ўзбекистон мусулмонлари идораси Сирдарё вилояти вакиллиги ҳамда Сирдарё вилояти ҳокимлиги ҳамкорлигида имом-хатиб ва имом-ноиблар ўртасида стол тенниси бўйича мусобақа ташкил этилди.
Турнирда вилоятнинг барча туман ва шаҳарларида фаолият юритаётган имом-хатиб ва имом-ноиблар иштирок этиб, спорт маҳорати ва ўзаро ҳамжиҳатлик руҳини намоён этдилар.
Беллашувлар дўстона муҳит, соғлом рақобат ва юқори кайфиятда ўтди. Тадбир иштирокчиларнинг жисмоний фаоллигини ошириш, соғлом турмуш тарзини тарғиб қилиш ҳамда ҳамкасблар ўртасидаги ўзаро аҳилликни мустаҳкамлашга хизмат қилди.
Мусобақа якунида ғолиб ва совриндорлар Ўзбекистон мусулмонлари идораси Сирдарё вилояти бош имом-хатиби Хабибуллоҳ домла Зокиров томонидан фахрий ёрлиқ ва эсдалик совғалари билан тақдирланди.
Ўзбекистон мусулмонлари идораси
Сирдарё вилояти вакиллиги
Матбуот хизмати
