Мисрда чоп этиладиган нуфузли “Ал-Аҳрам” газетаси саҳифасида “Самарқанд – мозийга саёҳат” сарлавҳали мақола босилиб чиқди, деб хабар бермоқда “Дунё” АА мухбири.

Кўҳна ва ҳамиша навқирон Самарқанд шаҳрининг сайёҳлик салоҳиятига бағишланган ушбу мақола мазкур газетанинг мухбири, Ўзбекистонда яқинда бўлиб ўтган муддатидан олдин Президент сайлови жараёнларини ёритиш учун аккредитация олган Ғада Ал-Шаркавий қаламига мансуб.

Муаллиф Ўзбекистон тарихи, маданияти ва анъаналари, мамлакатимизнинг бой сайёҳлик имкониятлари, шунингдек, турфа ўзбек таомлари ҳақидаги таассуротларини атрофлича қаламга олган.

Унинг ёзишича, Ўзбекистонга, айниқса, кўҳна Самарқанд шаҳрига бориб, афсонавий Регистон майдонини ўз кўзи билан кўришни у болалигидан орзу қилган. Узоқ йиллик орзу ниҳоят 2023 йили ушалган - у Ўзбекистонда муддатидан олдин бўлиб ўтган Президент сайловларини ёритиш учун мамлакатимизга келишга мушарраф бўлган.

«9 июль куни бўлиб ўтган сайловлардан сўнг мен таржимон йўлбошчим билан Тошкентдан Самарқанд шаҳрига поездда йўл олдим. Поезд ҳам бу мамлакатдаги ҳамма нарсалар сингари, тоза, озода эди. Икки соатдан сал кўпроқ йўл юрдик.

Менинг ихтиёримда атиги олти соат бўлгани учун вақтдан унумли фойдаланган ҳолда ўзим орзу қилган шаҳарда кўнглимга ёққан ҳамма нарсани кўришни хоҳладим. Машҳур тадқиқотчи ва саёҳатчи Ибн Баттута бу шаҳарни энг гўзал ва мафтункор шаҳарлардан бири, улуғворлик тимсоли, дея моҳирона таърифлаган. ЮНЕСКО Самарқандни жаҳон маданиятининг ўчоғи ўлароқ эътироф этган.

Эрта тонгданоқ шаҳар бўйлаб саёҳатим араб тилини яхши биладиган тажрибали мутахассис ҳамроҳлигида бошланди”, деб ёзади муаллиф.

Мақола давомида газетхонлар эътиборига Гўри Амир мажмуаси, Регистон майдони, Шоҳи-Зинда, Бибихоним меъморий мажмуаси ва бошқа диққатга сазовор масканлар ҳақидаги маълумотлар ҳавола этилади.

“Баъзи ривоятларда номи “Замин сайқали” дея зикр этилган Самарқандни кўпинча мовий гумбазлар шаҳри, деб ҳам аташади. Унинг тарихи милоддан аввалги 1,5 минг йилдан кўпроқ даврга бориб тақалади. Шаҳар Ўзбекистоннинг шимоли-шарқидаги Зарафшон дарёси воҳасида жойлашган. Бугунги кунда Самарқанд республика пойтахти Тошкентдан кейин иккинчи ўринда турадиган муҳим шаҳар ҳисобланади”, деб ёзади муаллиф.

«Дунёнинг кўплаб мамлакатларига саёҳат қилганимга қарамай, Ўзбекистон менга жуда таниш бўлиб туюлди. Бу ўлканинг кўчалари, одамлари, ошхонаси, урф-одатлари ва бой тарихи менда катта таассурот қолдирди. Самарқандга саёҳат орқали узоқ йиллик орзуим ушалди. Бу ерда ўзимни гўё вақт машинасига ўтирган ҳолда узоқ ўтмишга саёҳат қилгандек ҳис қилдим.

Маълумот ўрнида қайд этиш жоизки, “Ал-Аҳрам” газетаси 1875 йил август ойида Мисрнинг расмий газетаси сифатида дунё юзини кўрган. У Миср ва араб дунёсидаги энг йирик нашр бўлиб, кунлик адади 1 миллион нусхани ташкил этади.

Ўзбекистон мусулмонлари идораси

Матбуот хизмати