21 Апрел, 2025, 23 Шаввол, 1446
21 Апрел, 2025, 23 Шаввол, 1446
Самарқанд бош имом хатиби З.Эшонқулов бошчилигида Самарқанд шаҳри ҳамда Самарқанд тумани имом-хатиблар вилоятимизнинг қатор диққатга сазовор жойларини зиёрат қилдилар.
Дастлаб, “Имом Бухорий” мажмуаси зиёрат этилди. Кейин эса мажмуа ёнида қад кўтарган Вазирлар Маҳкамаси ҳузуридаги Имом Бухорий халқаро илмий-тадқиқот маркази ва Ҳадис илми мактаби фаолияти билан танишилди. Таъкидлаш лозимки, Ўзбекистон Республикаси Президенти Шавкат Мирзиёев шу йилнинг 11 январь куни Самарқанд вилоятига ташрифи чоғида мазкур иншооатлар билан танишиб, ушбу маскан бизга буюк аждодларимизнинг кимлигини англатиши, маънавият, маърифатни тарғиб этишини таъкидлаган ва бу ерни ҳар бир юртдошимиз зиёрат қилиши мақсадга мувофиқлигини қайд этган эди.
Имом Бухорий халқаро илмий-тадқиқот маркази директори ўринбосари Шукрулло Умаров давлатимиз раҳбари ташаббуси билан ташкил этилган марказ ва ҳадис илми мактабининг яратилиш тарихи, бу ерда икки йил давомида амалга оширилган қурилиш-бунёдкорлик ишлари, илмий ходимлар ва тингловчиларнинг буюк аждодимиз меросини ўрганиши учун яратилган шароитлар ҳақида гапириб берди. Марказдаги музей ва тарихий қўлёзмалар фонди ушбу масканнинг том маънода халқаро аҳамият касб этиши, унинг дунё миқёсидаги нуфузи ва салоҳияти юксаклигини кўрсатиб туриши қайд этилди.
Имом-хатибларга марказ қўлёзмалар фондида сақланаётган асарларни ўрганиш ва тадқиқ этиш борасида амалга оширилаётган ишлар ҳақида ҳам батафсил маълумот берилди.
Марказ ёнида бунёд этилган Ҳадис илми мактабида тингловчилар учун яратилган шароит, бу ердаги ўқув жараёнларнинг замонавий ахборот технологияларига асосланганлиги имомларда катта таассурот қолдирди.
Шу куни “Махдуми Аъзам” ҳамда “Хўжа Донёр” зиёратгоҳларига ҳам ташриф буюрилди.
Самарқанд вилояти вакиллиги Матбуот хизмати
#Ҳаж_2025
Юртимизда давлатимиз ва ҳукуматимиз томонидан диний-маърифий соҳага қаратилаётган алоҳида эътибор туфайли сўнгги йилларда мўмин-мусулмонлар Исломнинг барча рукнлари, хусусан, ҳаж амалларини тўла-тўкис адо этмоқдалар.
2016 йилда 5200 нафар ватандошимиз ҳаж амалларини адо этган бўлса, 2017 йилдан бундай шарафга эришганлар сони яна икки минг кишига кўпайиб, 7200 нафарга етди. 2022 йилда 12 мингдан зиёд, 2023–2024 йилларда эса 15 мингдан ортиқ мўмин-мусулмон ҳажни адо этди.
Бу йил ҳам 15 мингдан зиёд юртдошларимиз Исломнинг бешинчи рукнини адо этадилар, иншоаллоҳ.
Бугун Тошкент шаҳридаги «Шайх Зайниддин» жоме масжиди мажлислар залида шу йил ҳажга борувчи гуруҳ раҳбарлари иштирокида илк йиғилиш бўлиб ўтди.
Дин ишлари бўйича қўмита Зиёрат туризмини ривожлантириш бўлими бошлиғи Бобомурод Рустамов, Ўзбекистон мусулмонлари идораси Ҳаж ва умра маркази бўлими бошлиғи Мақсуд Каримов қатнашган йиғилишни Тошкент шаҳар бош имом-хатиби Абдуқаҳҳор домда Юнусов кириш сўзи билан очиб бердилар.
Тадбирда Тошкент шаҳри, Тошкент ва Сирдарё вилоятларидан бу йил элликбоши бўлиб ҳажга борувчи диний соҳа ходимлари иштирок этган бўлсалар, Қорақалпоғистон Республикаси, Хоразм ва Сурхондарё вилоятларидан борувчи гуруҳ раҳбарлари ZOOM платформаси орқали онлайн қатнашдилар.
Йиғилишда гуруҳ раҳбариларига ҳаж мавсумидаги муҳим вазифалар эслатилиб, уларга гуруҳлар аниқ бўлгач, зиёратчилар билан учрашиб, Исломнинг бешинчи рукни бўлган ҳажга пухта тайёргарлик кўришлари, эҳром боғлаш, ҳажнинг арконлари, шартлари, фарзлари, вожиб ва суннатларини атрофлича тушунтиришлари зарурлиги қайд этилди.
Аллоҳ таоло бу йилги ҳаж мавсумини юқори савияда ўтказишни насиб этсин. Ҳар бир зиёратчининг ҳажи мабрур бўлсин!
Ўзбекистон мусулмонлари идораси
Тошкент шаҳар вакиллиги
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 