frontend\widgets\header\Header: Attempt to read property "fajr" on null

Президентимиз Ислом цивилизацияси марказига ташриф буюрди

21.12.2018   2769   3 min.
Президентимиз Ислом цивилизацияси марказига ташриф буюрди
Мамлакатимизда диний бағрикенгликни таъминлаш, маърифатли ислом қадриятларини асраш ва тарғиб этиш борасида улкан ишлар амалга оширилмоқда. Ўзбекистондаги ислом цивилизацияси маркази, Имом Бухорий, Абу Исо Муҳаммад Термизий каби буюк алломаларимиз номидаги халқаро илмий-тадқиқот марказлари барпо этилаётгани, диний таълим олиш имкониятлари кенгаяётгани, эътиқод қилувчиларнинг ҳуқуқлари ҳимоя қилиниб, уларга шароитлар яратилаётгани жаҳонда эътироф этилмоқда. 
 
Жорий йил 12 декабрда БМТ Бош Ассамблеясининг ялпи сессиясида “Маърифат ва диний бағрикенглик” номли махсус резолюцияси қабул қилингани Ўзбекистоннинг диний бағрикенглик борасидаги ташаббусининг ёрқин ифодаси бўлди. Президентимиз Шавкат Мирзиёевнинг 2017 йилда БМТ Бош Ассамблеясининг 72-сессиясида илгари сурган ташаббуси асосида қабул қилинган ушбу ҳужжат жаҳон халқлари ўртасида мавжуд динларга мансуб маърифий бағрикенглик маданиятини кучайтиришга хизмат қилади.
 
Бу тарихий воқеа Ўзбекистонда дин соҳасида амалга оширилаётган ислоҳотлар жаҳонда тан олинаётганидан, юртимизнинг айнан ушбу масалаларда бой тарих ва тажрибага эга эканидан далолат беради. 
Пойтахтимизда барпо этилаётган Ислом цивилизацияси маркази давлатимиз раҳбарининг айни соҳасидаги эзгу ташаббусларидан биридир. 
 
Шавкат Мирзиёев жорий йил 15 июнь куни ушбу марказ қурилишига ташриф буюриб, иншоот пойдеворига рамзий тамал тоши қўйган эди. 
 
Айни пайтда марказ қурилиши жадал олиб борилмоқда. Бош пудратчиси “12-трест” акциядорлик жамияти бўлган иншоот пойдевори қуйилиб, девор кўтарилмоқда. Қурилиш ишлари 3 сменада ташкил этилган, ишчи-муҳандисларга зарур шароитлар яратилган.
 
Марказ лойиҳаси шарқона услубда бўлиб, биринчи қаватдан маросимлар зали, қадимий қўлёзма ва осори-атиқаларни таъмирлаш, мавсумий кўргазма бўлимлари, дўконлар, музей омборлари, 200 ўринли автотураргоҳ ўрин олади. 
 
Иккинчи қаватда кутубхона, анжуманлар зали, аждодларимизнинг ислом дини, илм-фан ривожига қўшган ҳиссаси, санъат, таълим, шаҳарсозлик ва меъморлик анъаналарига бағишланган кўргазма заллари, ўртада Усмон Қуръони жойлашади. Учинчи қават ахборот-ресурс маркази, илмий кафедралар, халқаро анжуманлар зали ва бошқа хоналарни ўз ичига олади.
 
Президентимиз қурилиш жараёни билан танишди. Кўргазмалар залида Ўзбекистон тарихи даврлар бўйича, ҳар бир аср, ҳар бир алломага оид манбалар ва ашёлар асосида намойиш этилиши зарурлигини таъкидлади.
 
– Ҳамма ўз тарихини улуғлайди. Лекин бизнинг мамлакатимиздагидек бой тарих, боболаримиздек буюк алломалар ҳеч қаерда йўқ. Бу меросни чуқур ўрганишимиз, халқимизга, дунёга етказа билишимиз керак. Бу марказга келган одам тарихимиз ҳақида тўла тасаввурга эга бўлиши, катта маънавият олиб кетиши зарур, – деди Шавкат Мирзиёев.
 
Давлатимиз раҳбари марказни пардозлаш ва жиҳозлашни такомиллаштириш бўйича кўрсатмалар берди.
 
Умар Асроров, ЎзА
 
Манба: http://www.uza.uz
 
 
Ўзбекистон янгиликлари
Бошқа мақолалар
Мақолалар

“Гуруҳбозлик қилманг!”

26.06.2025   3923   1 min.
“Гуруҳбозлик қилманг!”

Сабрсизлик мусулмонлар орасида турли ихтилофлар, уруш-жанжаллар келиб чиқишига сабаб бўлади. Аллоҳ Таоло сабр қилувчилар билан бўлади. Уларни турли ёмонликлардан асрайди. Сабр қилмай, чидамсиз бўлганлар эса, ихтилоф гирдобига дучор бўладилар.

Ояти кариманинг охирида Аллоҳ таоло: “Ва сабр қилинг. Албатта, Аллоҳ сабр қилувчилар биландир”, деб марҳамат қилган.

Шунингдек, Аллоҳ таоло “Рум” сураси 31-32 оятларда мўмин-мусулмонларга қуйидаги хитобни қилади: “...Ва мушриклардан бўлманг. Динларида тафриқага тушган, гуруҳ-гуруҳ бўлиб олиб, ҳар бир жамоа ўз олдидаги нарсадан шод бўлганлардан бўлманг”.

Демак, динда тафриқага тушиш мушрикларнинг иши бўлиб танилган экан. Гуруҳ-гуруҳ бўлиб олиб, ихтилоф чиқариш, талашиб-тортишиш ҳам мушрикларнинг иши экан. Ҳар бир жамоа ўз олдидаги нарсадан шод бўлиб, бошқаларни паст санаши ҳам мушрикларнинг иши экан.

Аллоҳ таоло “Анъом” сураси 109-оятда Пайғамбаримиз соллаллоҳу алайҳи васалламга хитоб қилиб: “Динларини тафриқа қилиб, ўзлари гуруҳбозлик қилганлар билан ҳеч бир алоқанг йўқ. Албатта, уларнинг иши Аллоҳнинг Ўзига ҳавола. Сўнгра қилган ишларининг хабарини берур”, деган.

Ушбу ояти каримада Аллоҳ таоло тафриқа ва гуруҳбозликка олиб борадиган низо ҳамда ихтилофларни Пайғамбаримиз соллаллоҳу алайҳи васалламнинг йўлларидан бошқа, ул ҳидоят йўлига тескари йўл ҳисобламоқда. Аллоҳ таоло бу оятда тафриқа ва гуруҳбозлик Пайғамбаримизнинг умматларига муносиб эмаслигини қаттиқ таъкидламоқда.

Аллоҳ таоло “Оли Имрон” сурасида сиз билан биз мусулмонларга хитоб қилиб: “Ўзларига очиқ баёнотлар келганидан кейин бўлиниб, тафриқага тушганларга ўхшаш бўлманглар! Ана ўшаларга улуғ азоб бордир”, деган.

Тафриқага тушиб бир-биримиз ила тортишиш низолар урчиб, файзу барака кўтарилишига сабаб бўлади.

Янгиқўрғон тумани "Сайид бобо Термизий" жоме масжиди

имом-хатиби Абдували Маҳмудхонов

@SOFTALIMOTLAR

МАҚОЛА
#logo