Сайт тест ҳолатида ишламоқда!
24 Июн, 2025   |   28 Зулҳижжа, 1446
search icon
Aввалги сайт
O`Z РУ EN AR

Тошкент шаҳри
Бомдод
03:05
Қуёш
04:51
Пешин
12:31
Аср
17:41
Шом
20:03
Хуфтон
21:42
Bismillah
24 Июн, 2025, 28 Зулҳижжа, 1446
Aввалги сайт
#search
 YouTube

Трансмиллий таҳдидлар ва огоҳликка даъват

28.07.2018   6920   2 min.
Трансмиллий таҳдидлар ва огоҳликка даъват
Халқаро Пресс-клубнинг 30 июль – Бутунжаҳон одам савдосига қарши кураш кунига бағишланган махсус сессияси мана шундай номланди.
 
Сессияда Бош прокуратура, Ички ишлар вазирлиги ва бошқа қатор вазирлик ва идора вакиллари, шунингдек, Бирлашган Миллатлар Ташкилотининг Наркотиклар ва жиноятчилик бўйича бошқармасининг Марказий Осиёдаги минтақавий ваколатхонаси раҳбари Ашита Миттал ҳам иштирок этди.
 
Ўзбекистон Республикасининг 2017-2021 йилларга мўлжалланган ҳаракатлар стратегиясининг устувор йўналишларидан бирига кўра диний экстремизм, терроризм ва уюшган жиноятчиликнинг бошқа шакллари билан курашиш бўйича ташкилий ва амалий чораларни кучайтириш орқали жиноятчиликка қарши кураш ва жиноятчиликнинг олдини олиш тизимини такомиллаштириш режалаштирилган.
 
Жорий йилнинг июнь ойида Бирлашган Миллатлар Ташкилотининг Наркотик ва жиноятчилик бўйича бошқармаси ва Ўзбекистон Республикаси Бош прокуратураси ўртасида трансмиллий уюшган жиноятчиликка қарши кураш соҳасида ҳамкорликни янада кучайтириш мақсадида ўзаро англашув меморандуми имзоланди.
 
Ўзбекистон Республикаси БМТнинг Трансмиллий уюшган жиноятчиликка қарши курашиш конвенцияси ва Одам савдосини олдини олиш тўғрисидаги Протоколга (айниқса, аёллар ва болалар савдосини олдини олиш) имзо қўйган.
 
– Одам савдоси – трансмиллий уюшган жиноятчилик ҳисобланади. Биз фақатгина глобал, минтақавий ва миллий даражада ҳамкорлик орқали у билан курашишимиз мумкин. Ушбу сессия Ўзбекистон ҳукумати, фуқаролик жамияти ва халқаро ҳамжамиятнинг мамлакатда ва бутун Марказий Осиёда одам савдосига қарши курашиш борасида ҳамкорлик қилиш саъй-ҳаракатларини муҳокама қилиш имкониятини берди, – деди Ашита Миттал. 
 
Бироқ, афсуски, бутун дунёда одам савдоси қурбонига айланаётган инсонлар сони кундан кун ортиб бормоқда.
 
– Юртимизда одам савдоси қурбонига айланиб қолаётганларнинг кўпчилик қисмини аёллар ва болалар ташкил қилади. Юртимизда 6 ой ичида жами 60 дан ортиқ одам савдоси билан боғлиқ жиноят ҳолатлари аниқланган бўлиб, шундан 161 та киши жабрланган, – деди Ички ишлар вазирлиги Терроризм ва экстремизмга қарши курашиш бош бошқармаси Одам савдоси ва ноқонуний миграцияга қарши курашиш бошқармаси бўлим бошлиғи Мурат Райимов. 
 
– Бугун республикамиз фуқароси бўлган 263 мингга яқин аёллар чет элга узоқ муддатга чиқиб кетган. Ўтган 6 ой ичида уларнинг 139 мингга яқини ўз уйига қайтарилди. Биргина Самарқанд вилоятида хорижга узоқ муддатга чиқиб кетган аёллар сони 117 мингдан ортиқни ташкил этади, – дейди Ўзбекистон Хотин-қизлар қўмитаси бўлим бошлиғи Дилором Қўзиева.
 

 

И.Аҳатова, ЎзА
ХОРИЖДАГИ ЮРТДОШИМ
Бошқа мақолалар

Ўкинманг! Аллоҳ доимо эсингизда, тилингизда бўлсин!

23.06.2025   2255   2 min.
Ўкинманг! Аллоҳ доимо эсингизда, тилингизда бўлсин!

"...Огоҳ бўлинг, Аллоҳни эслаш билан қалблар ором олади" (Раъд сураси, 28-оят).

"Бас, Мени ёд этингиз, (Мен ҳам) сизларни ёд этаман..." (Бақара сураси, 152-оят).

"...Аллоҳни кўп эсловчи эркаклар ва (Аллоҳни кўп) эсловчи аёллар - улар учун Аллоҳ мағфират ва улуғ мукофотни (яъни жаннатни) тайёрлаб қўйгандир" (Аҳзоб сураси, 35-оят).

"...Эй имон келтирганлар! Аллоҳ доим ёдингизда бўлсин" (Аҳзоб сураси, 41-оят).

"Эй имон келтирганлар! На мол-дунёларингиз ва на фарзандларингиз сизларни Аллоҳнинг зикридан (Унга ибодат қилишдан) чалғитиб қўймасин!.." (Мунофиқун сураси, 9-оят).

"Бирон нарса ҳақида: "Мен, албатта, эртага шуни қилувчиман", дея кўрманг! Илло, "Иншааллоҳ (Аллоҳ хоҳласа)" (денг. Бу сўзни) унутган вақтингизда (ёдингизга келиши билан) Роббингизни зикр қилинг (яъни, "иншааллоҳ", денг) ва: "Шояд, Роббим мени бундан ҳам яқинроқ Тўғри йўлга ҳидоят этса", денг!" (Каҳф сураси, 23-24-оятлар).

"...(Тонгда уйқудан) турган пайтингизда, Роббингизга ҳамд билан тасбеҳ айтинг! Шунингдек, тундан (маълум вақт ажратиб) ва юлдузлар юз ўгиргач (ботган, саҳарда) ҳам, Унга тасбеҳ айтинг!" (Тур сураси, 48-49-оятлар).

"Эй имон келтирганлар! Бирон тўдага тўқнаш келсангиз, сабот (ва матонат) билан турингиз ва Аллоҳни кўп ёд этингиз, шояд (шунда) нажот топсангиз!" (Анфол сураси, 45-оят).

Саҳиҳ ҳадисда айтилади: "Парвардигорини эсловчи билан эсламайдиган одамнинг ўхшаши ҳудди тирик билан ўлик кабидир".

Расулуллоҳ соллаллоҳу алайҳи вассалам: "Ёлғиз ҳолда қолганлар ўзиб кетдилар", дедилар. Саҳобалар: "Улар кимлар, эй Аллоҳнинг элчиси", деб сўрашди. Шунда у зот: "Аллоҳни кўп эслайдиган эркаклар ва кўп эсламайдиган аёллардир", деб жавоб бердилар.

Расулуллоҳ соллаллоҳу алайҳи васаллам саҳобаларига: "Сизларга амаллардан энг афзалининг хабарини берайми? Бу амал Раббингиз олдида энг пок, сизлар учун олтин-кумушни инфоқ қилишдан ҳам яхшироқ, душманга, йўлиқиб, ғазот қилишдан ҳам афзалроқдир", дедилар. Саҳобалар: "Ҳа, айтинг, ё Аллоҳнинг элчиси", дейишди. У зот: "Бу (амал) Аллоҳни эслашдир", деб жавоб бердилар.

Яна бир ҳадисда: "Бир киши Расулуллоҳ соллаллоҳу алайҳи васалламнинг ҳузурларига келиб: "Ё Аллоҳнинг элчиси, Ислом буюрган амаллар менга кўплик қилмоқда. Ёшим ҳам улғайиб қолди. Шунинг учун мен маҳкам ушлашим керак бўлган амални айтинг", деди. Шунда у зот алайҳиссалом: "Тилинг доим Аллоҳнинг зикри билан нам бўлсин", дедилар.

"Ўкинма" китобидан