Усмон қудуғи
Усмон розияллоҳу анҳу бадавлат савдогар эдилар. Табук ғазотида мусулмонларнинг қўшинини тўлиқ қуроллантирган киши ҳам Усмон розияллоҳу анҳу эдилар. Ибни Исҳоқ раҳматуллоҳи алайҳ: “Усмон табук жангчиларига шунчалик кўп пул сарфладиларки, ҳеч бир киши у зот баробарида пул сарфлаган эмас”, деб ёзади. Усмон розияллоҳу анҳу Расулуллоҳнинг ҳужраларига минг динор пулни олиб келиб сочиб юборганлар, 950 та туя ва 50 та от ҳадя қилиб олиб келганлар.
Расулуллоҳ ҳазратлари бундай саховатларини кўриб:
— Усмон бу иши билан асло зарар қилгани йўқ, — деганлар. Кейин эса:
— Кимки ночор аскарни қуроллантирса ва рум қудуғини сотиб олиб мусулмонларга ҳадя қилиб юборса, у кишига жаннат насиба бўлади, — деб башорат қилдилар.
Бир яҳудий рум қудуғининг сувини сотиб фойдаланарди. Усмон розияллоҳу анҳу мазкур қудуқнинг ярмини 20 000 танга ва юзта ёш туя баробарига сотиб олдилар. Мусулмонлар ўзларига белгиланган муддатда келиб ушбу қудуқ сувидан олиб кета бошладилар. Ҳеч ким яҳудийнинг сувини олмай қўйди. Буни кўриб яҳудий қолган ярмини ҳам жуда арзон нархга сотиб юборади. Мазкур қудуқнинг ҳаммасини сотиб олганларидан сўнг Усмон розияллоҳу анҳу мусулмонларга Аллоҳ йўлида ҳадя қилиб юбордилар.
Ўша қудуқ ҳозир ҳам мавжуд бўлиб, 1400 йилдан ортиқ давр мобайнида мусулмонларни ширин сув билан таъминлаб келмоқда. Қудуқ атрофида масжид ва хурмо боғи мавжуд. Бу қудуқ ҳозирда “Усмон қудуғи” деб аталади.
манба: kamolon.uz
Фарғонада ёш имом-хатиблар билан маърифий мулоқот ўтказилди
“Янги Ўзбекистон ёшлари — 2030” стратегияси ижросини таъминлаш мақсадида Фарғона вилоятида фаолият юритаётган ёш имом-хатиб ва имом-ноиблар иштирокида “Ёшлар билан бир кун” лойиҳаси доирасида учрашув ташкил этилди.
Тадбирда Фарғона вилояти бош имом-хатиби Убайдуллоҳ домла Абдуллаев иштирок этиб, ёш диний соҳа ходимлари билан самимий мулоқот ўтказди.
Суҳбат давомида мамлакатимизда ёшларга яратилаётган кенг имкониятлар ва улардан самарали фойдаланиш масалаларига алоҳида тўхталиб ўтилди. Шунингдек, ёш имомларга қуйидаги йўналишларда муҳим тавсиялар берилди:
-
Аҳоли ва жамоатчилик билан мулоқот маданиятини юксалтириш;
-
Таъсирчан ва мазмунли маърузалар тайёрлаш ҳамда воизлик одобига риоя қилиш;
-
Масжидлар фаолиятини замон талаблари даражасида тўғри ташкил этиш.
Мулоқотда ёш диний соҳа вакилларининг жамиятда тутган ўрни, айниқса, ёш авлодни ватанпарварлик, соф маърифат ва эзгулик руҳида тарбиялашдаги масъулияти юқори экани таъкидланди.
Очиқ ва самимий руҳда ўтган учрашувда иштирокчилар ўзларини қизиқтирган саволларга батафсил жавоб олдилар.
Тадбир якунида ёш мутахассислар вилоят вакиллиги ва соҳа мутасаддиларининг иш жараёни билан яқиндан танишдилар.
Ўзбекистон мусулмонлари идораси
Фарғона вилояти вакиллиги
Матбуот хизмати
