“Девонабой” жоме масжидида катта байрам!
2018 йилнинг 27-апрель куни вилоятимиз аҳолиси учун унутилмас кун бўлди десак асло муболаға бўлмайди. Сабаби куни кеча вилоятимиз бўйлаб ўтказилган Қуръон карим мусобақаларида ғолибликни қўлга киритган Анндижон фарзанди Убайдуллоҳ қори Исақов жорий йилнинг 21-24 апрель кунлари Тошкент шаҳрида ўтказилган “Ўзбекистон Қуръон мусобақаси-2018”нинг Республика босқичида фахрли биринчи ўринни қўлга киритди.
Шу боис Андижон шаҳридаги “Девонабой” жоме масжидида жума намозидан аввал “Ўзбекистон Қуръон мусобақаси-2018”нинг Республика босқичида Андижон вилоятидан иштирок этиб, фахрли биринчи ўринни қўлга киритган Убайдуллоҳ қори Исақовнинг тантанали кутиб олиш ва тақдирлаш маросими ўтказилди.
Тақдирлаш маросимида ЎМИнинг Андижон вилояти вакили, вилоят бош имом-хатиби Н.Холиқназаров сўзга чиқиб, Убайдуллоҳ қори тимсолида унинг ота-онаси, устозларини ҳам қутлаб, ўзининг эзгу тилакларини билдирди. Тадбирга ташриф буюрган Андижон вилояти ҳокими Ш.Абдураҳмонов, барча йиғилганларни ушбу ғалаба билан табриклади ҳамда
Юртбошимиз томонидан мамлакатимизда амалга оширилаётган ислоҳатлар, муқаддас динимизни асраб-авайлаш йўлида амалга оширилаётган кенг кўламли ислохотлар ҳусусида гапириб, бутун Республикамиз бўйлаб ўтказилган Қуръони карим мусобақасининг мақсади ва моҳияти тўғрисида кенг тушунчалар бериб ўтди.
Шундан сўнг, “Ўзбекистон Қуръон мусобақаси-2018”нинг Республика босқичида Андижон вилояти шаънини муносиб ҳимоя қилган, Республикада биринчи ўринни қўлга киритган Убайдуллоҳ қори Исақовга Андижон вилояти ҳокими Ш.Абдураҳмонов Neksia-3 автоуловини тантанали равишда совға қилди.
Шунингдек, ғолиб ва унинг ота-онасига ЎМИнинг Андижон вилоят вакилли томонидан совғалар ва ташаккурномалар топширилди.
Тадбир сўнгида Юртимизнинг тинчлиги ва осойишталиги, ҳалқимизнинг фаровонлиги ҳамда юртбошимизнинг хаққига дуои-хайрлар қилинди.
ЎМИ Матбуот хизмати
Қувайтлик эксперт: Ўзбекистон ва Қувайтни бой тарихий мерос ва умумий манфаатлар бирлаштиради
Қувайтнинг нуфузли “Al-Seyassah”, “Alwakt News” ва “The Times Kuwait” нашрларида қувайтлик эксперт ва жамоат арбоби, Кўрфаз араб давлатлари ҳамкорлик кенгаши Тижорат арбитраж марказининг собиқ бош котиби Тариқ Юсуф аш-Шумаймирийнинг “Самарқанддан Файлакагача: замин цивилизация тилида сўзлаганда номли мақоласи чоп этилди, деб хабар бермоқда “Дунё” АА мухбири.
Муаллиф жорий йилнинг август ойида юртимизга амалга оширган ташрифи давомида Тошкент ва Самарқанд шаҳарларида бўлгани, бой тарихий-маданий мерос, меъморий обидалар, қадимий бозорлар ҳамда халқимизнинг меҳмондўстлик анъаналари унда катта таассурот қолдиргани ҳақида ёзади.
Мақолада таъкидланишича, Марказий Осиёнинг қадимий шаҳри Самарқанд ҳамда Форс кўрфазидаги тарихий Файлака ороли халқлар ва маданиятларни бирлаштирувчи ўзига хос цивилизацион кўприк вазифасини бажарган. Самарқанд Шарқ ва Ғарбни боғлаган қуруқликдаги карвон йўллари чорраҳаси бўлган бўлса, Файлака денгиз савдо йўлларида муҳим стратегик макон ҳисобланган. Юртимиздаги илм-маърифатга бўлган юксак эҳтиром ва жамоатчилик анъаналари Қувайт жамиятидаги қадриятлар билан муайян муштаракликка эга экани алоҳида эътироф этилади.
Нашрда Ўзбекистон Президенти Шавкат Мирзиёевнинг 2025 йил 17–18 февраль кунлари Қувайт Давлатига амалга оширган давлат ташрифи икки томонлама муносабатларни кенг қамровли шериклик даражасига кўтаргани таъкидланади. Ташриф якунлари бўйича саноат, авиация, “ақлли шаҳарлар”, соғлиқни сақлаш, туризм, маданият ва санъат каби соҳаларда умумий қиймати қарийб 4,9 миллиард долларлик келишувлар ва инвестиция лойиҳалари пакети шакллантирилди.
Шунингдек, Қувайт Араб иқтисодий тараққиёт жамғармасининг юртимиздаги инфратузилма ва соғлиқни сақлаш лойиҳаларидаги иштироки амалий ҳамкорликнинг муҳим йўналиши сифатида кўрсатиб ўтилади.
Мақола якунида таъкидланганидек, Самарқанд ва Файлака ўртасидаги тарихий муштараклик ҳамда бугунги тўғридан-тўғри авиақатновлар, фаол инвестициялар ва маданий алмашинувлар икки халқ ўртасидаги ўзаро англашув ва ҳамкорликни янада мустаҳкамлашга хизмат қилмоқда.
Ўзбекистон мусулмонлари идораси Матбуот хизмати
