Малайзиянинг энг чиройли масжидлари
Ислом Малайзияда муҳим аямиятга эга дин ҳисобланиб, ушбу мамлакатдаги масжидлар ўзининг гўзаллиги билан ажралиб туради. Қуйида Малайзиядаги энг гўзал масжидлар ҳақида маълумот берилади..
Жамек масжиди
Жамек масжиди “Жума масжиди” номи билан ҳам машҳур бўлиб, 1907 йилда Куала-Лумпурдаги қабристон ўрнида барпо этилган. Масжид Кланг ва Гомбак дарёларининг қўшилиш жойида жойлашган. Масжиднинг уч йирик гумбази ва икки минораси мавжуд.
Путра масжиди
Путра масжиди Путражая кўли бўйича жойлашган бўлиб, энг кўп зиёратчилар ташриф буюрадиган маскан ҳисобланади. Ушбу масжиднинг қурилиш дизайни Бағдоддаги Шайх Умар масжидига ўхшаш шаклда яратилган. Асосий гумбазнинг диаметри 36 метрни ташкил этиб, уни 12 та устун тутиб туради.
Федерал ҳудуд масжиди
Федерал ҳудуд масжиди давлат идоралари билан бир ҳудудда жойлашганлиги ва усмонийлар даври архитектураси асосида барпо этилгани билан ажралиб туради. Масжиднинг 22 та гумбази бор ҳамда бу ерда бир вақтнинг ўзида 17 минг мусулмон намоз ўқиш олади.
Малакка бўғозидаги масжид
Малакка бўғозидаги масжид Малакка шаҳридаги соҳилга яқин денгизда барпо этилган. Унинг 30 метрли минораси денгизчилар учун маёқ вазифасини ҳам бажаради.
Султон Салоҳиддин Абдул Азиз масжиди
Ушбу масжид Шоҳ Алам шаҳрида жойлашган бўлиб, кўк рангли гумбази сабаб Қўк масжид сифатида машҳурдир. Ушбу масжид Жанубий-шарқий Осиёдаги энг катта масжид ҳисобланади. Энг йирик гумбаз ва минораларга эга масжид Яқин Шарқ ва малай услубларини ўзида мужассам этган.
Тенгку Тенгах Захара масжиди
Тенгку Тенгах Захара масжиди Малайзиядаги биринчи сув ичида қурилган масжиддир. У Куала-Теренггану шаҳрида жойлашган бўлиб кўл ичида қурилган.
Кота-Кинабалу шаҳри масжиди
Кота-Кинабалу шаҳри масжиди Мадинадаги Пайғамбар масжидига ўхшаш услубда қурилган. Масжидда бир вақтнинг ўзида 12 минг киши намоз ўқиши мумкин.
Султон Абу Бакар масжиди
Султон Абу Бакар масжиди Жоҳар-Бару шаҳрига яқин жойдаги тоғ чўққисида жойлашган. Қурилиш материаллари Туркия, Чехия, Италиядан олиб келинган бўлиб, минорасининг тузилиши британ соатли минораларини эслатади.
Капитан Келинг масжиди
Капитан Келинг масжиди 1801 йилда ҳиндистонлик бўлган мусулмонлар томонидан Пенанга мавзесида қурилган.
Ал Бухорий масжиди
Ал Бухорий масжиди Алор-Сетар шаҳрида жойлашган бўлиб, буюк муҳаддис номи билан аталувчи мажмуанинг бир қисми ҳисобланади. Мажмуа таркибида тиббиёт маркази, жамоатчилик маркази, қариялар уйи, болалар уйи ва ўқув маркази киради.
Биллур масжид
Биллур масжид ўзининг шаклига кўра Малайзияда ягона ҳисобланади. У Вон Мэн оролидаги слом мероси боғида жойлашган. Масжид бетон қоришмасидан қурилган ва шиша билан қопланган. Шиша гумбаз масжид ҳуснига ҳусн қўшади.
Убудия масжиди
Куала-Кангсар шаҳри аҳолисига хизмат кўрсатувчи Убудия масжиди ўзининг тилларанг гумбази ва саккиз қиррали биноси билан ажралиб туради.
ЎМИ Матбуот хизмати
Меҳр-саховат ва инсон қадри — эзгуликка йўғрилган хайрли ташаббус
Инсонга меҳр кўрсатиш, муҳтожнинг ҳолидан хабар олиш, беморга тасалли бериш ва эҳтиёжмандларга кўмак қўлини чўзиш халқимиз маънавиятининг азалий фазилатларидандир. Ислом таълимотида ҳам саховат, меҳр-оқибат ва инсон қадрини улуғлаш энг улуғ амаллардан бири сифатида эътироф этилган. Чунки бир инсоннинг кўнглини кўтариш, унинг қалбига умид ва ишонч бағишлаш жамиятда меҳр-муҳаббат, ҳамжиҳатлик ва тотувликни мустаҳкамлайди.
Шу эзгу қадриятларни ҳаётга татбиқ этиш, аҳолининг эҳтиёжманд қатламларини қўллаб-қувватлаш ва юртдошларимиз қалбида меҳр-шафқат туйғуларини янада кучайтириш мақсадида 2026 йил 13 август куни Самарқанд вилояти Ургут туманида кенг кўламли маънавий-маърифий ҳамда хайр-саховат тадбирлари ўтказилди.
Мазкур хайрли тадбирларда Самарқанд вилояти бош имом-хатиби вазифасини вақтинча бажарувчи Нурсултонхон домла Абдуманнонов, вилоят бош имом-хатиби ўринбосари Хайрулло домла Саттаров, ВАҚФ хайрия жамоат фонди Самарқанд вилояти филиали раҳбари Ёқубжон домла Мансуров, унинг ўринбосари А.Султонов, шаҳар ва туман бош имом-хатиблари, «Ҳаж–2026» зиёратчилари, маҳалла фаоллари ва нуронийлар иштирок этдилар.
Ўзбекистон Республикаси давлат мустақиллигининг 35 йиллиги муносабати билан ўтказилган ушбу хайрли акция доирасида ижтимоий ҳимояга муҳтож, кам таъминланган ва боқувчисидан айрилган 300 та оила ҳолидан хабар олинди. Уларнинг хонадонларига ташриф буюрилиб, турмуш шароитлари ўрганилди, оилаларга зарур озиқ-овқат маҳсулотлари етказиб берилди.
Ташрифлар давомида бемор ва кексаларнинг ҳолидан хабар олиниб, улар билан самимий суҳбатлар ўтказилди. Уларнинг ҳаққига шифо, хонадонларига файзу барака, юртимизга тинчлик-хотиржамлик тилаб дуолар қилинди. Зеро, муҳтожнинг кўнглини кўтариш ва уни ёлғиз эмаслигини ҳис эттириш ҳам инсонпарварликнинг юксак кўринишидир.
Шу билан бирга, ҳаётида турли ижтимоий қийинчиликларга дуч келган ҳамда ёт ғоялар таъсирига тушиб қолиш хавфи мавжуд бўлган айрим фуқаролар билан якка тартибда мулоқотлар ташкил этилди. Суҳбатларда соф эътиқод, оила муқаддаслиги, фарзанд тарбияси, ҳалол меҳнат, Ватанга садоқат, миллий ва диний қадриятларга ҳурмат, шунингдек, турли бузғунчи ғояларга нисбатан маънавий иммунитетни мустаҳкамлаш масалалари ҳаётий мисоллар асосида тушунтирилди.
Тадбирлар доирасида Ургут туманидаги жоме масжидларда пешин намозидан сўнг маънавий-маърифий учрашувлар ҳам ўтказилди. Уларда меҳр-оқибат, қўни-қўшничилик муносабатларини мустаҳкамлаш, ёшларни миллий ва диний қадриятларга содиқлик руҳида тарбиялаш, оила тинчлигини асраш, жамиятда ўзаро ҳурмат ва аҳиллик муҳитини қарор топтириш каби долзарб мавзулар атрофлича ёритилди.
Учрашувлар якунида мамлакатимиз тинчлиги, халқимиз фаровонлиги, Ватанимиз равнақи ва ёш авлоднинг илмли, одобли ҳамда ватанпарвар инсонлар бўлиб вояга етиши ҳақида хайрли дуолар қилинди.
Бугун юртимизда инсон қадрини улуғлаш, аҳолининг эҳтиёжманд қатламларини ҳар томонлама қўллаб-қувватлаш, жамиятда меҳр-саховат ва ўзаро ғамхўрлик муҳитини қарор топтиришга алоҳида эътибор қаратилмоқда. Ургут туманида ўтказилган мазкур хайрли тадбирлар ҳам ана шу эзгу мақсадларга хизмат қилиб, аҳоли ўртасида ҳамжиҳатлик, бағрикенглик ва инсонпарварлик туйғуларини янада мустаҳкамлади.
Меҳр бор жойда ишонч, саховат бор жойда барака, инсон қадри улуғланган жамиятда эса тинчлик ва фаровонлик қарор топади. Ана шундай эзгу амаллар халқимиз ўртасидаги бирдамлик ришталарини мустаҳкамлаб, юртимизнинг янада обод ва файзли бўлишига хизмат қилади.
Самарқанд вилояти вакиллиги матбуот хизмати
