Мамлакатимизда 18-19 март кунлари Наврўз байрамига бағишланган умумхалқ хайрия ҳашари бўлиб ўтди.
Азалдан халқимизда байрамларга катта тайёргарлик кўрилиб, кўча-кўйлар, маҳаллаларни обод қилишга, ён-атрофни озода, покиза, тартибли, саранжом ҳолда сақлашга жиддий эътибор қаратилган. Президентимиз Шавкат Мирзиёевнинг 2018 йил 23 февралда қабул қилинган "2018 йилги Наврўз умумхалқ байрамига тайёргарлик кўриш ва уни ўтказиш тўғрисида"ги қарорида барча шаҳар ва қишлоқларда Наврўзнинг тарихи, мазмуни ва фалсафасини, ушбу байрамни ўтказиш билан боғлиқ урф-одатлар, қадрият ва анъаналарнинг моҳиятини акс эттирган оммавий сайиллар ўтказиш, ёрдамга муҳтож инсонлар, кексалар, ногиронлар ва кам таъминланган оилалар ҳолидан хабар олиш, уларга беғараз кўмак бериш, жамиятда ўзаро ҳурмат, дўстлик ва ҳамжиҳатликни кучайтиришга қаратилган савоб ишлар, хайрия тадбирлари ва оммавий ҳашарларни амалга ошириш муҳим вазифалардан бири сифатида белгиланган.
ЎзА хабарига кўра, бўлиб ўтган ҳашар тадбирида ёши, миллати, диний эътиқодидан қатъи назар, барча фуқаролар фаол иштирок этди. Юртимизни янада обод, файзли, тоза ва озода бўлиши таъминланиши билан бирга ёш авлодда миллий анъана ва қадриятларимизга ҳурмат, ўзаро меҳр-оқибат, меҳнатсеварлик, фидойилик, эзгуликка хайрихоҳлик сингари фазилатларининг мустаҳкам қарор топтиришда умумхалқ хайрия ҳашарининг ўрни ва аҳамияти беқиёс бўлди.
Шу кунларда юртимиздаги барча маҳаллалардаги турар жойлар, хиёбонлар, боғлар, йўл ва йўлаклар, муқаддас қадамжолар ҳашарчилар саъй-ҳаракати билан тартибга келтирилди. Кўплаб мевали дарахт, гул кўчатлари ўтқазилди. Болалар майдончалари, спорт билан шуғулланиш учун мўъжаз масканлар, маҳалла гузарлари, кутубхоналар, савдо, маиший хизмат кўрсатиш шохобчалари барпо этилди.
— Умумхалқ ҳашари тадбирлари вилоятимизда ҳам жуда кўтаринки руҳда бўлиб ўтди, – дейди Фуқароларнинг ўзини ўзи бошқариш органлари фаолиятини мувофиқлаштириш бўйича Қашқадарё вилояти кенгаши раисининг биринчи ўринбосари Дўстмурод Султонов. – Энг аввало, кексалар, фахрийлар, кўнгли ярим фуқаролар, ёрдамга муҳтож оилалар ҳолидан хабар олишга жиддий эътибор қаратилди. Уларнинг турар жойларини таъмирлаб берилди. Янги маҳалла гузарлари, болалар спорт майдончалари бунёд этилди.
Пойтахтимизнинг Учтепа туманидаги Учтепа маҳалла фуқаролар йиғини биноси ҳашар кунлари қайтадан тўлиқ таъмирланди. Янада кўркам кўриниш касб этган бинонинг аввалгиларидан афзаллик жиҳати — бу ерда нуронийлар учун дам олиш хонаси, фуқароларни қабул қилиш учун зарур барча шароит ва имкониятлар яратилди.
— Шу ернинг ўзида маҳаллада истиқомат этаётган оилаларнинг фарзандлари учун мўъжаз кутубхонанинг ташкил этилгани ўғил-қизлар учун ўзига хос Наврўз туҳфаси бўлди, – дейди маҳалла фуқаролар йиғини раиси Мухтор Илҳомов. - Зиё маскани учун бадиий, маърифий китоблар, болалар адабиётидан намуналар фаоллар, маҳалла жонкуярлари томонидан келтирилди.
Юртимизнинг барча маҳаллаларида бўлгани каби мазкур масканда ҳам беморлар ҳолидан хабар олиниб, уларга совға-саломлар топширилди. Мевали, манзарали дарахтлар, арча, гул кўчатлари ўтқазилди.
Бир сўз билан айтганда, кўтаринки ва юксак савияда ўтказилган умумхалқ ҳашарида ҳамюртларимиз фаол иштирок этди.
Ўзбекистон мусулмонлар идораси матбуот хизмати
Шу йил 9 январь куни Фарғона вилояти бош имом-хатиби Убайдуллоҳ домла Абдуллаев бошчилигида вакиллик ходимлари, шаҳар-туман бош имом-хатиблари ва иқтидорли имомлар иштирокида тузилган ишчи гуруҳ Ўзбекистон туманига ташриф буюрди.
Дастлаб тумандаги 7 та масжид ва 7 та маҳаллада, шунингдек, “Ҳаж — 2024” зиёратчилари ва маҳалла фуқаролар йиғини раислари иштирокида йиғилиш ўтказилиб, амалий тадбир режаси тузилди.
Ишчи гуруҳ аъзолари ва имом-хатибларга бириктирилган маҳалла ҳудудидан “Ҳаж – 2024” зиёратчисини маънавий-маърифий тадбирларга жалб этди. Биргаликда маҳалланинг энг камида 3 тагача муаммоли хонадонига кириб, у ерда яшаётганлардан ҳол-аҳвол сўради. Уларнинг муаммоларини ўрганди, таклиф, фикр-мулоҳазаларини тинглади. Имом-хатиблар 22 та оилага кириб, маънавий-маърифий тарғибот ва амалий ёрдам тадбирларини олиб борди.
Шунингдек, тумандаги "Қудаш" мурувват уйига ташриф буюрилиб, ташриф чоғида мурувват уйида яшовчи имконияти чекланган, меҳр-мурувватга муҳтожларни ҳолидан хабар олиниб, мурувват уйи учун маиший техника ва маиший жиҳозлар ҳамда бошқа турдаги зарурий ашёлар хайрия қилинди.
Шу билан бирга, мурувват уйида "Яшил макон" дастури доирасида 100 туп мевали ва манзарали кўчатлар экилди.
Туманнинг "Боғи Эрам" маҳалласида яшовчи кам таъминланган оилага ҳомийлар кўмаги билан замонавий қулай шароитларга эга бир хоналик уй қуриб берилди. Ишчи гуруҳ мазкур хонадонга ташриф буюриб, хонадон эгалари билан мулоқот қилди.
Пешин намози сўнгида масжидларда жамоатга маъруза қилиниб, одамларга манфаат етказишнинг фазилати, офият улкан неъмат экани, ёшлар тарбияси доимий эътибор марказда бўлиши зарурлиги, бу борада ота-оналарнинг ўрни ҳақида илмий ва ҳаётий мисоллар ёрдамида тушунтирилди.
Масжидлар ва имомлар фаолияти кўздан кечирилди ҳамда мавжуд камчиликларни бартараф этиш юзасидан керакли тавсиялар берилди.
Ўзбекистон мусулмонлари идораси
Фарғона вилояти вакиллиги
Матбуот хизмати