Ўзбекистоннинг бир гуруҳ исломшунос, шарқшунос олимлари Буюк Британияга сафари чоғида Кембриж университетига ташриф буюриб, ушбу нуфузли таълим даргоҳининг профессор ва мутахассислари билан учрашувлар ўтказди, деб хабар беради ЎзА. 

Кембриж университетининг Марказий Осиё форуми директори профессор Сидхарт Саксена билан Ўзбекистонда яқинда ташкил этилган Ислом цивилизацияси маркази, Имoм Бухорий халқаро илмий-тадқиқот маркази, Ўзбекистонга оид хориждаги маданий бойликларни татқиқ этиш маркази ҳамда Тошкент ислом университетининг исломшунослик илмий-тадқиқот маркази ўртасида ҳамкорлик бўйича келишувга эришилди. 

Олимнинг таъкидлашича, Кембриж профессор-ўқитувчилари Тошкент ислом университети, Ўзбекистон Ислом академиясининг талаба ва тадқиқотчилари учун махсус маърузалар ўқийди, Ўзбекистонда ўтказиладиган халқаро форумларда иштирок этади. 

«Жаҳон рейтингларида Оксфорд университетидан кейин иккинчи ўринни мунтазам эгаллаб келаётган Кембрижнинг нуфузли нашрларида ўзбекистонлик мутахассислар илмий мақолалари чоп этилади. Икки томон олимлари қўшма илмий гуруҳи ташкил этилади. Ҳамкорликда долзарб мавзуларда тадқиқотлар амалга оширилади», — дейилади хабарда. 

Томонлар, шунингдек, Кембриж университетида Хоразмий ва Ибн Сино стипендияларини таъсис этиш тўғрисида ҳам келишиб олди. 

Қайд этилишича, жорий йилнинг 12 февралидан эътиборан Кембриж университетида ўзбек тили дарслари ташкил этилди. Эришилган келишувларга мувофиқ, янги ўқув йилидан бошлаб Ўзбекистондан келган мутахассислар ушбу курсларда дарс бера бошлайди. 

ЎМИ Матбуот хизмати